Local Property News | Posted by Aye Myat Thu
ဇွန်လ ၂၁ ရက်တွင် ဒလ ဒေသဖွံ့ဖြိုးရေးနှင့် ရန်ကုန်-ဒလ တံတားတည်ဆောက်ရေး ဆောက်လုပ်ရေးဝန်ကြီး၊ ရန်ကုန်တိုင်းအစိုးရအဖွဲ့ နှင့် ကိုရီးယားသံအမတ်တို့ ဆွေးနွေးခဲ့သည်။
ဆောက်လုပ်ရေးဝန်ကြီးဌာန ဒုတိယညွှန်ကြားရေးမှူးချုပ်ဦးကျော်ကောင်းချိုက “ဒလဒေသဖွံ့ဖြိုးရေး ကို ကိုရီးယားနိုင်ငံမှ ဆောင်ရွက်ရန် ကိုရီးယားသံအမတ်က လာရောက် ဆွေးနွေးခြင်း ဖြစ်ကြောင်း၊အဓိက က ဒလ ဒေသဖွံ့ဖြိုးရေးလုပ်ဖို့ လာဆွေးနွေးတာပါ၊ တံတားတည်ဆောက်တာ အဆင်ပြေပြေဆောင်ရွက်နေပါတယ်” ဟု ၎င်းကပြောသည်။
ကိုရီးယား-မြန်မာချစ်ကြည်ရေးတံတား ရန်ကုန်-ဒလတံတားစီမံကိန်း ဖောင်ဒေးရှင်းတည်ဆောက်မှုကို ဇွန်လ ၂၈ ရက်တွင် ဒလဘက်အခြမ်း၌ စတင်ဆောင်ရွက်မည်ဟု ဦးကျော်ကောင်းချိုကပြောသည်။
အဆိုပါ တံတားစီမံကိန်းနှင့်ပတ်သက်၍ မြန်မာ့စက်မှုဆိပ်ကမ်း (MIP) ကဦးဆောင်၍ အခြားပုဂ္ဂလိက ဆိပ်ကမ်းများက ကန့်ကွက်မှုကြောင့် ပင်မတံတား၏ ခန်းဖွင့်အကျယ် မီတာ ၃၂၀ ကို မီတာ၃၇၀ သို့ တံတား ဒီဇိုင်းတိုးမြှင့်ပြောင်းလဲခဲ့ရပြီး၊ထိုပြောင်းလဲမှုကြောင့် ကိုရီးယားထံမှ ဒေါ်လာသန်း ၂၀ ထပ်မံချေးယူမှု ညှိနှိုင်းနေဆဲဖြစ်ကြောင်း၊ ထပ်ချေးငွေ ပေးမပေးကို ကိုရီးယားဘဏ်က ဆုံးဖြတ်မည်ဟု ၎င်းကဆိုသည်။
နောင်တစ်ချိန် တွင် ပေါ်ပေါက်လာမည့် ဒလ ဒေသမြို့သစ် စက်မှုဇုန် တည်ဆောက်ရေးတွင် ယခု ရန်ကုန်-ဒလတံတားသည် အားထားရမည့် အခြေခံအုတ်မြစ်ဖြစ်သည်ဟု ကိုရီးယားနိုင်ငံက ကြေညာထားသည်။
ရန်ကုန်တိုင်း လသာမြို့နယ် နှင့် ဒလ ၊ တွံတေး ၊ ကော့မှူး ၊ ကွမ်းခြံကုန်း တို့ကို ဆက်သွယ်ပေးမည့် အဆိုပါတံတားသည် စုစုပေါင်း အရှည်ပေ ၆,၀၀၀ ကျော်ရှိပြီး လေးလမ်းသွားကြိုးဆိုင်းတံတား ဖြစ်သည်။တံတားတည်ဆောက်ပြီးစီးပါက ဧရာဝတီတိုင်းနှင့်ရခိုင်ပြည်နယ်သို့ ထပ်ဆင့်ဆက်သွယ်နိုင်ကြောင်း၊ တံတားတည်ဆောက်ချိန် လေးနှစ်ကြာမည်ဖြစ်ပြီး ၂၀၂၂ တွင် ပြီးဆုံးမည်ဟု ကိုရီးယားနိုင်ငံနှင့် ဆောက်လုပ်ရေးဝန်ကြီးဌာနက ခန့်မှန်းထားသည်။
ဥက္ကာသစ္စာ မှ ( iMyanmarHouse.com အိုင်မြန်မာဟောက်စ်ဒေါ့ကွန်း) အတွက် အထူးရေးသားဖော်ပြသည်။ Credit: iMyanmarHouse.com
