Local Property News | Posted by Zarni Kyaw
မြန်မာနိုင်ငံတွင် အကြီးမားဆုံးသော စက်မှုလုပ်ငန်းနှင့် အခြေခံအဆောက်အအုံဆိုင်ရာ ပြပွဲကို UBM မှ ကြီးမှူး၍ရန်ကုန်မြို့ Yangon Convention Centre တွင် အောက်တိုဘာ ၁၁ ရက်မှ ၁၃ရက်ထိ ပြုလုပ်မည်ဖြစ်ရာ အဆိုပါအခမ်းအနားတွင် တရုတ်၊ စင်္ကာပူ၊ မလေးရှား ၊ထိုင်း၊ ထိုင်ဝမ်၊ အိန္ဒိယ၊ အစ္စရေး၊ ကိုရီးယားနှင့် ဂျပန် နိုင်ငံတို့မှ နိုင်ငံတကာပြခန်းတွဲ (၁၆) ခု အပါအဝင်၂၃ နိုင်ငံမှ ကုမ္ပဏီပေါင်း ၃၅၀ ကျော်တို့ ပါဝင်ပြသမည်ဖြစ်သည်။
ထို့ကြောင့် စီးပွားရေးလုပ်ငန်းရှင်များအတွက် အကျိုးဖြစ်ထွန်းစေမည်ဖြစ်ကြောင်း UBM Myanmar အထွေထွေမန်နေဂျာ Mr.Fraser Hawkesက ပြောသည်။
၎င်းပြပွဲနှင့် ပတ်သက်ပြီး သတင်းစာရှင်းလင်းပွဲကို မန္တလေးမြို့ Hotel Mandalay တွင် စက်တင်ဘာ ၁၉ရက် နံနက်ပိုင်းက ပြုလုပ်ခဲ့သည်။ နည်းပညာသစ်နှင့် ဝန်ဆောင်မှုများကို တင်ပြမည့် နည်းပညာသစ်နှင့်ဝန်ဆောင်မှုများဆိုင်ရာ ဆွေးနွေးပွဲများလည်း ပါဝင်မည်ဖြစ်သည်။
“ ပြပွဲမှာ နည်းပညာဆိုင်ရာ ဟောပြောပွဲတွေပါဝင်မှာပါ။အားလုံးအခမဲ့တက်ရောက်နိုင်တယ်။ ကုန်ထုတ်လုပ်မှု၊သယ်ယူပို့ဆောင်မှု၊စွမ်းအင်နဲ့ အခြေခံအဆောက်အအုံကဏ္ဍတွေမှာ အကောင်းဘက်ကတည်ရှိနေတယ်။ ပြည်တွင်းလုပ်ငန်းရှင်များအတွက် နည်းပညာနဲ့ လုပ်ငန်းအမျိုးမျိုးအတွက်ကိရိယာများထုတ်လုပ်မှုစက်ယန္တယားတွေကို တွေ့မြင်နိုင်ပြီး မိမိတို့ စီးပွားရေးလုပ်ငန်းတွေမှာအသုံးချနိုင်အောင် ပေါင်းကူးပေးတာဖြစ်ပါတယ် ”ဟု ၄င်းက ပြောသည်။
အဆိုပါပြပွဲတွင် စီးပွားကူးသန်းဝန်ကြီးဌာနကဲ့သို့ ဌာနများကလည်းဟောပြောမှုများလုပ်ဆောင်မှာဖြစ်ပြီး ရေသန့်စင်မှုစနစ်နှင့်နည်းပညာများ၊ဆောက်လုပ်ရေးပစ္စည်းနှင့် နည်းပညာများ၊ပြန်လည်ပြည့်ဖြိုးမြဲစွမ်းအင် ဆိုင်ရာတို့လည်းပါဝင်မှာဖြစ်ကြောင်း၊ တက်ရောက်လာသည့်နိုင်ငံတကာလုပ်ငန်းရှင်များနှင့် ပြည်တွင်း လုပ်ငန်းရှင်များ ချိတ်ဆက်ကာဈေးကွက်နှင့် နည်းပညာများဖလှယ်နိုင်မည်ဖြစ်ကြောင်း သိရသည်။
ပြပွဲသို့လာရောက်ရန်အတွက် အစုအဖွဲ့လိုက်ဖြစ်စေ၊တစ်ဦးချင်းဖြစ်စေ လာရောက်လေ့လာနိုင်ရန် စာရင်းပေးသွင်းနိုင်ကာ အဆင်ပြေချောမွေ့စေရန်ကူညီပေးမှာဖြစ်ပြီး လိုအပ်ပါက ပြပွဲတွင် မှတ်ပုံတင်စာရင်းပေးသွင်းကာလေ့လာနိုင်မည်ဖြစ်ကြောင်း၊www.ubm.com/asia တွင်အသေးစိပ်ဝင်ရောက်ကြည့်ရှုနိုင်ကြောင်း သိရသည်။
Credit: The Myanmar Times
