အမေရိကန်သရုပ်ဆောင် ဂျနီဖာလောရင့်စ်က မအောင်မြင်မီနေထိုင်ခဲ့သည့် နေအိမ်ကို ကန်ဒေါ်လာ တစ်သန်းကျော်ဖြင့် ရောင်းချမည်

ကမ္ဘာကျော် အမေရိကန်သရုပ်ဆောင် ဂျနီဖာလောရင့်စ်က သူမ မအောင်မြင်မီနေထိုင်ခဲ့သည့် နေအိမ်ကို ကန်ဒေါ်လာ ၁ ဒသမ ၁၅ သန်းဖြင့် ရောင်းချရန် အရောင်းဈေးကွက်သို့ တင်သွင်းလာကြောင်း အမေရိကန်အခြေစိုက်အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

နေအိမ်တည်နေရာမှာ အမေရိကန်ပြည်ထောင်စု၊ ကယ်လီဖိုးနီးယားပြည်နယ်၊ လော့စ်အိန်ဂျလိမြို့အနောက်ဘက် ပင်လယ်ကမ်းခြေရှိ ဆန်တာမိုနီကာ မြို့ကလေးတွင် ဖြစ်သည်။

ဂျနီဖာလောရင့်စ်သည် ၂၀၁၂ ခုနှစ်တွင် ရိုက်ကူးထုတ်လုပ်ခဲ့သည့် Silver Linings Playbook အချစ်ဟာသဇာတ်မြူးဖြင့် အကောင်းဆုံးဇာတ်ဆောင် အော်စကာဆုရရှိခဲ့သူ ဖြစ်သည်။
ဆန်တာမိုနီကာရှိ အဆိုပါနေအိမ်တွင် ဂျနီဖာလောရင့်စ်သည် ၂၀၀၆ ခုနှစ်က စတင်နေထိုင်ခဲ့ခြင်းဖြစ်ပြီး ၀ယ်ယူခဲ့စဉ်က ကန်ဒေါ်လာ ၈၇၉၀၀၀ ပေးခဲ့ရသည်။
အဆိုပါကာလများက ဂျနီဖာလောရင့်စ်သည် လူမသိသူမသိ သရုပ်ဆောင်တစ်ဦးဘ၀တွင်သာ ရှိသေးသည်။

နေအိမ်၏ အကျယ်အ၀န်းမှာ စတုရန်းပေ ၁၄၁၃ ခန့်သာကျယ်ဝန်းသည်။
မီးလင်းဖိုပါဝင်သော လဟာပြင်ဧည့်ခန်းဆောင်၊ စတီးမီးဖိုဆောင်သုံးပစ္စည်းများ အပြည့်အစုံထည့်သွင်းထားသော မီးဖိုဆောင်၊ master bedroom မှာ ကျယ်ကျယ်ဝန်းဝန်းရှိပြီး အိပ်ခန်းအတွင်း သီးသန့်ရေချိုးခန်း en-suite ပါဝင်သည်။

အဆိုပါနေအိမ်မှာ ဂျနီဖာလောရင့်စ်လက်ရှိနေထိုင်လျက်ရှိသော နေအိမ်နှင့် နှိုင်းယှဉ်လျှင်မူ များစွာအဆင့်နိမ့်သည်ဟု ဆိုရမည်ဖြစ်သည်။

၂၀၁၄ ခုနှစ်တွင် ဂျနီဖာလောရင့်သည် နာမည်ကျော်ဘီဗာလီဟေးလ်တွင် အိပ်ခန်း ၅ ခန်းနှင့် ရေချိုးခန်း ၅ ခန်းပါဝင်သောအခန်းကို ကန်ဒေါ်လာ ၇ သန်းဖြင့် ၀ယ်ယူခဲ့သည်။


Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)