ရန်ကုန်မြို့၌ မူလ လျာထားသည့် တာမွေငါးခွဆုံ၊ ရှစ်မိုင်၊ကုက္ကိုင်းခုံးကျော်တံတားများ အပြင် ခုံးကျော်တံတားအချို့ ထပ်မံဆောက်လုပ်ရန် လျာထား

လာမည့် ၂၀၁၅-၂၀၁၆ ဘဏ္ဍာနှစ်တွင် ရန်ကုန်မြို့၏ မူလလျာထားသည့် တာမွေငါးခွဆုံ၊ ရှစ်မိုင်လမ်းဆုံ၊ ကုက္ကိုင်းခုံးကျော်တံတားများအပြင် နောက်ထပ်ခုံးကျော်တံတားအချို့ ထပ်မံတည်ဆောက်ရန် လျာထားကြောင်း ရန်ကုန်တိုင်းဒေသကြီး အစိုးရအဖွဲ့မှ သိရသည်။

တာမွေငါးခွဆုံ၊ ရှစ်မိုင်လမ်းဆုံနှင့် ကုက္ကိုင်းလမ်းဆုံ ခုံးကျော်တံတား သုံးစင်းမှာမူ လာမည့် ၂၀၁၅-၂၀၁၆ ဘဏ္ဍာနှစ် ရန်ကုန်တိုင်းဒေသကြီး အစိုးရအဖွဲ့၏ အထူးစီမံကိန်း လုပ်ငန်းအနေဖြင့် ဆောက်လုပ်ရန် ဘဏ္ဍာငွေများ လျာထားပြီးဖြစ်ကြောင်း၊ သို့ရာတွင် ရန်ကုန်တိုင်းဒေသကြီးအတွင်း စက်မှုမြေကွက်လွတ်များ လေလံတင်ရောင်းချခြင်း စသည်တို့ကဲ့သို့သော ကြားပေါက်ရရှိမည့် ၀င်ငွေများ ရှိနေခြင်းကြောင့် ယင်းငွေဖြင့် ခုံးကျော်တံတားအချို့ ထပ်ဆောက်ရန် လျာထားခြင်းဖြစ်သည်ဟု သိရသည်။

• 
• 

“ပြီးခဲ့တဲ့နှစ်ထဲမှာ စက်မှုဇုန်မြေကွက်လွတ် ၂၉ ကွက်ကို လေလံတင် ရောင်းချခဲ့တာ ငွေကျပ် ၁၅ ဘီလျံလောက် ရခဲ့တယ်။ အဲဒီ ငွေကြေးတွေကို ရန်ကုန်မြို့ရဲ့ ဒေသဖွံ့ဖြိုးရေး လုပ်ငန်းတွေမှာ သုံးစွဲမှာပါ။ အလားတူ အဲဒီလို ကြားပေါက်ကနေ ၀င်လာမယ့်ငွေတွေ ရှိတယ်။ အဲဒီငွေတွေနဲ့ ခုံးကျော်တံတားအချို့ ထပ်ဆောက်ဖို့ လျာထားတာပါ။ မူလလျာထားတဲ့ တာမွေငါးခွဆုံ၊ ရှစ်မိုင်၊ ကုက္ကိုင်းခုံးကျော် တံတားတွေလည်း သူ့ဟာနဲ့သူ ရှိမယ်” ဟု ရန်ကုန်တိုင်းဒေသကြီး အစိုးရအဖွဲ့မှ တာဝန်ရှိသူ တစ်ဦးက ဆိုသည်။

သို့သော် ဆောက်လုပ်ရန် လျာထားသည့် အဆင့်သာဖြစ်၍ မည်သည့်နေရာတွင် ဆောက်လုပ်မည်ကိုမူ မပြောနိုင်သေးဟု ဆိုသည်။

ရန်ကုန်မြို့တွင် ယာဉ်ကြောပိတ်ဆို့မှု ကုစားနိုင်ရန် ရည်ရွယ်၍ လှည်းတန်း၊ ရွှေဂုံတိုင်၊ ဘုရင့်နောင်လမ်းဆုံ စသည်တို့တွင် ခုံးကျော်တံတားများ ဆောက်လုပ်ကာ ဖြေရှင်းခဲ့ကြရာ ယာဉ်ကြောပိတ်ဆို့မှုများ ပြေလည်မှု မရရှိခဲ့သော်လည်း မြေနီကုန်း ခုံးကျော်တံတားကို ထပ်မံဆောက်လုပ်ခဲ့သည်။

လာမည့် ၂၀၁၅-၂၀၁၆ ဘဏ္ဍာနှစ်တွင် တာမွေငါးခွဆုံ၊ ရှစ်မိုင်လမ်းဆုံ၊ ကုက္ကိုင်းလမ်းဆုံ စသည်တို့၌ ခုံးကျော်တံတားများကို ရန်ကုန်တိုင်းဒေသကြီး အစိုးရအဖွဲ့၏ အထူးစီမံကိန်း လုပ်ငန်းအနေဖြင့် ထပ်မံတည်ဆောက်ရန် ဘဏ္ဍာငွေ တောင်းခံမှုကို လွှတ်တော်ကိုယ်စားလှယ် အချို့က ထပ်မံဆောက်လုပ် သင့်၊ မသင့် ၂၀၁၄ ခုနှစ် ဒီဇင်ဘာက ပြုလုပ်ခဲ့သည့် ရန်ကုန်တိုင်းဒေသကြီးလွှတ်တော် အစည်းအဝေးတွင် ထောက်ပြမှုများ ရှိခဲ့သော်လည်း ရန်ကုန်တိုင်းဒေသကြီး အစိုးရအဖွဲ့က ဆောက်လုပ်ရန် လိုအပ်သည်ဟု ဆိုခဲ့သည်။ လာမည့် ဘဏ္ဍာနှစ်တွင် ဆောက်လုပ်မည့် ခုံးကျော်တံတား သုံးစင်းအတွက် တာမွေငါးခွဆုံအတွက် ကျပ် ၂၂ ဒသမ ၅ ဘီလျံ၊ ရှစ်မိုင်လမ်းဆုံအတွက် ကျပ် ၁၆ ဒသမ ၄၅ ဘီလျံနှင့် ကုက္ကိုင်းလမ်းဆုံအတွက် ၁၅ ဒသမ ၄၀ ဘီလျံတို့ ဘဏ္ဍာငွေလျာထားကြောင်း သိရသည်။

Credit: Eleven Media Group