တရုတ်ပြည်မကြီးအခြေစိုက် လုပ်ငန်းစုံကုမ္ပဏီကြီးဖြစ်သည့် HNA Group က ကြွေးမြီများ ပေးဆပ်ရန်အတွက် ဟောင်ကောင်ရှိ အဆောက်အအုံကြီး ၂ ခုကို Henderson Land ထံ ကန်ဒေါ်လာ ၂ ဘီလီယံဖြင့် ရောင်းချ

တရုတ်ပြည်မကြီးအခြေစိုက် လုပ်ငန်းစုံကုမ္ပဏီကြီးဖြစ်သည့် HNA Group သည် ကြွေးမြီများ ပေးဆပ်ရန်အတွက် ဟောင်ကောင်ရှိ အဆောက်အအုံကြီး ၂ ခုကို ဟောင်ကောင်အခြေစိုက် အိမ်ခြံမြေကုမ္ပဏီကြီးတစ်ခုဖြစ်သော Henderson Land ထံ ကန်ဒေါ်လာ ၂ ဘီလီယံဖြင့် ရောင်းချရန် ဆွေးနွေးလျက်ရှိကြောင်း စင်္ကာပူအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

HNA Group နယူးယောက်၊ ချီကာဂို၊ ဆန်ဖရန်စစ္စကိုနှင့် မင်နာပိုလစ်တို့တွင် တည်ရှိသော ကန်ဒေါ်လာ ၄ ဘီလီယံ တန်ကြေးရှိ အိမ်ခြံမြေများကို ကြွေးမြီများပေးဆပ်ရန်အတွက် ပြန်လည်ရောင်းထုတ်လျက်ရှိခြင်း ဖြစ်သည်။

HNA Group သည် လေကြောင်းလုပ်ငန်းမှစကာ ဘဏ်လုပ်ငန်းအထိ လုပ်ငန်းစုံလုပ်ကိုင်သည့် ကုမ္ပဏီတစ်ခုဖြစ်သည်။
ဟောင်ကောင်ရှိ အဆောက်အအုံ ၂ ခုကို Henderson Land Development Co Ltd ထံ ဟောင်ကောင်ဒေါ်လာ ၁၆ ဘီလီယံ (ကန်ဒေါ်လာ ၂ ဘီလီယံ)ဖြင့် ရောင်းချနေခြင်း ဖြစ်သည်။

ယခင်လေဆိပ်ဟောင်းတစ်ခု တည်ရှိခဲ့ရာ ကိုင်တက်ခ်အရပ်ရှိ မြေနေရာကို ဖေဖော်ဝါရီလ ၁၄ ရက်တွင် အပြီးသတ်အရောင်းအဝယ် လုပ်ရန် မျှော်လင့်ခဲ့ကြပြီး အဆိုပါနေ့က အပြီးသတ်အရောင်းအဝယ်ဖြစ်၊ မဖြစ်ကိုမူ မသိရသေးချေ။

HNA Holding Group သည် အဆိုပါမြေနေရာများကို ၂၀၁၆ ခုနှစ် နှစ်ကုန်ပိုင်းတွင် ဟောင်ကောင်ဒေါ်လာ ၁၄ ဒသမ ၂ ဘီလီယံခန့်ဖြင့် ဝယ်ယူခဲ့ခြင်းဖြစ်ပြီး ထိုစဉ်က ဈေးကွက်ပေါက်ဈေးထက် ပိုမိုပေးအပ်ကာ ဝယ်ယူခဲ့ခြင်းလည်း ဖြစ်သည်။

ဟောင်ကောင်သည် အာရှ၏ ဘဏ္ဍာရေးဗဟိုချက်တစ်ခုဖြစ်ပြီး ကမ္ဘာပေါ်တွင် အိမ်ခြံမြေဈေးအမြင့်မားဆုံးနေရာတစ်ခုလည်း ဖြစ်သည်။

ပြီးခဲ့သည့် ၁၃ လဆက်တိုက် သမိုင်းဝင်စံချိန်တင်အောင် ဈေးနှုန်းများ မြင့်တက်လာရာ ၂၀၀၈ ခုနှစ်နှင့် နှိုင်းယှဉ်လျှင် ၂၀၀ ရာခိုင်နှုန်းခန့် အထိ ဈေးနှုန်းများ မြင့်တက်လျက်ရှိသည်။

လွန်ခဲ့သည့် ၂ နှစ်တာ ကာလအတွင်း HNA Holding Group သည် ကန်ဒေါ်လာ ၅၀ ဘီလီယံဖိုးခန့်အထိ အိမ်ခြံမြေများ ဝယ်ယူခဲ့ပြီးနောက်ပိုင်း ဘဏ္ဍာရေးအကျပ်အတည်းပေါ်ပေါက်လာကာ ယခုကဲ့သို့ ပြန်လည်ရောင်းထုတ်မှုများ ပြုလုပ်လာရခြင်းလည်း ဖြစ်သည်။

HNA ၏ အမှုဆောင်အရာရှိချုပ် အဒမ်တန်က ပြောကြားရာတွင် ဗဟိုအစိုးရက ကျောထောက်နောက်ခံမပေးသည့် ဒေသများတွင် ရင်းနှီးမြှုပ်နှံမှုများ ပြုလုပ်တော့မည်မဟုတ်ကြောင်း ပြောကြားသည်။

ပြီးခဲ့သည့်လအတွင်းကလည်း HNA သည် သြစတေးလျနိုင်ငံ၊ ဆစ်ဒနီရှိ အဆောက်အအုံတစ်ခုကို သြစတေးလျဒေါ်လာ ၂၀၅ သန်း (ကန်ဒေါ်လာ ၁၆၆ သန်း)ဖြင့် ရောင်းချခဲ့သေးသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)