ထားဝယ်ကမ်းနားလမ်းစီမံကိန်းကြောင့် မြေကွက်များ ဝယ်လက် စိတ်ဝင်စားမှုမြင့်

ထားဝယ်မြို့ ကမ်းနားလမ်းကို အဆင့်မြှင့်မည့်စီမံကိန်း စတင်ပြီးနောက် အဆိုပါလမ်းရှိ အိမ်၊ ခြံနှင့် မြေကွက်များကို ဝယ်လိုသူများကာ စိတ်ဝင်စားမှုမြင့်တက်နေကြောင်း တနင်္သာရီတိုင်းဒေသကြီး အိမ်၊ ခြံ၊ မြေ ဝန်ဆောင်မှုအသင်း အတွင်းရေးမှူးက ပြောသည်။

လက်ရှိတွင် အိမ်နှင့် မြေကွက်များကို ဝယ်လိုသူများ စိတ်ဝင်စားမှုမြင့်တက်နေသော်လည်း မြေကွက်ပိုင်ရှင်များက ဈေးနှုန်းအနေအထားကို စောင့်ကြည့်နေကြသည့်အတွက် အရောင်းအဝယ် မဖြစ်သေးကြောင်း တိုင်းဒေသကြီး အိမ်၊ ခြံ၊ မြေ ဝန်ဆောင်မှုအသင်း အတွင်းရေးမှူး ဦးစိုးသိန်းက ဆိုသည်။

လက်ရှိ ဆိပ်ကမ်းအာဏာပိုင်က ပိုင်ဆိုင်သည့်မြေနေရာတွင် ငှားရမ်းလုပ်ကိုင်နေသည့် လုပ်ငန်းအချို့ကို ဖယ်ရှားပြီးနောက် ထားဝယ်မြစ်မြင်ကွင်းကို ရှင်းရှင်းလင်းလင်း မြင်တွေ့လာခဲ့ပြီးနောက် ဝယ်လိုသူများက စိတ်ဝင်စားလာခြင်း ဖြစ်သည်။

“စိတ်ဝင်စားသူတော့ တကယ်ရှိတယ်၊ အမှန်တကယ်လည်း လိုက်စုံစမ်းနေရတာရှိတယ်၊ လက်ရှိအနေအထားအထိ အရောင်းအဝယ်တော့ မဖြစ်သေးဘူး”ဟု ဦးစိုးသိန်းက ပြောသည်။

ကမ်းနားလမ်း ဆိပ်ကမ်းပိုင် မြေပေါ်ရှိ ဆိုင်ခန်းများကို မဖယ်ရှားခင်က အိမ်နှင့်မြေရောင်းမည်ဟု ကြေညာထားသော်လည်း ဖယ်ရှားပြီးနောက်ပိုင်းတွင် မြေဝယ်ရန် စုံစမ်းသူများသည့်အတွက် ဆိုင်းဘုတ်ကို ပြန်ဖြုတ်လိုက်ကြောင်း ထားဝယ်မြို့ ကမ်းနားလမ်းရှိ အိမ်ပိုင်ရှင် အမျိုးသားတစ်ဦးက ဆိုသည်။

“ကမ်းနားလမ်း စလုပ်ချိန်မှာ မေးတဲ့သူတွေ အရမ်းများလာတယ်၊ ဈေးကို စောင့်ကြည့်နေတဲ့သဘောနဲ့ မရောင်းဖြစ်သေးတာ”ဟု အဆိုပါ အိမ်ပိုင်ရှင်က ပြောသည်။

လက်ရှိဖယ်ရှားနေသည့်အပိုင်းတွင် ပေ ၄၀၊ ပေ ၈၀ အကျယ်ရှိ မြေတစ်ကွက် (အိမ်မပါ) လျှင် ကျပ် သိန်း ၁ ထောင်ခန့်အထိ ခေါ်ဈေးရှိနေပြီး ယခင်က ကျပ် သိန်း ၇၀၀ ဝန်းကျင်သာ ခေါ်ဈေးရှိကြောင်း သိရသည်။

အဆိုပါကမ်းနားလမ်းကို လက်ရှိ ကွန်ကရစ်လမ်းနှင့်ယှဉ်ကာ မြစ်ဘက်ခြမ်းတွင် နောက်ထပ်ကွန်ကရစ်လမ်းတစ်ခု ခင်းသွားမည်ဖြစ်ပြီး အပန်းဖြေဧရိယာပုံစံ ဒီဇိုင်းဆွဲထားကြောင်း ထားဝယ်မြို့နယ် စည်ပင်သာယာရေးအဖွဲ့က ရေးဆွဲထားသည့် ဒီဇိုင်းပုံစံအရ သိရသည်။

Credit: The voice