အမေရိကန်ပြည် ဖလင့်ထ်မြို့ရှိ နေအိမ်တစ်လုံး ၁၈၈ ဒေါ်လာ (မြန်မာငွေ နှစ်သိန်းခွဲဝန်းကျင်) ဖြင့် ရောင်းချမည်

အမေရိကန်ပြည်ထောင်စု၊ မီချီဂန်ပြည်နယ်၊ ဂျဲနက်ဆီခရိုင်တွင် ဖလင့်ထ်အမည်ရှိ မြို့ကလေးတစ်မြို့တည်ရှိသည်။

ဖလင့်ထ်မြစ်ကမ်းတစ်လျှောက်တွင် တည်ရှိပြီး ဒက်ထရွိုက်မြို့၏ အနောက်မြောက်ဘက် ၆၆ မိုင်အကွာတည်ရှိသည်။

ယခုရောင်းချမည့်နေအိမ်မှာ မီချီဂန်ပြည်နယ်၏ အမှတ် ၅၉ လမ်းမကြီးအနီးတွင် တည်ရှိပြီး ဝန်းကျင်တွင် ပုံစံတူနေအိမ်များစွာ ရှိနေသည်။
ဖလင့်ထ်၏ လူဦးရေသည် ၁၉၆၀ ပြည့်နှစ်တွင် ၁၉၆၀၀၀ ဦးကျော်ရှိခဲ့ရာမှ နောက်ပိုင်းတွင် တစ်သိန်းပင် မရှိတော့ချေ။

ဖလင့်ထ်၏ လူလတ်တန်းစားဝင်ငွေမှာ ကန်ဒေါ်လာ ၂၇၀၀၀ ကျော်သာရှိပြီး တစ်နိုင်ငံလုံး၏ တစ်ဦးချင်းပျှမ်းမျှဝင်ငွေမှာ ကန်ဒေါ်လာ ၅၁၀၀၀ ဖြစ်သည်။
ဖလင့်ထ်၏ စီးပွားရေးအခြေအနေမှာ အလွန်ယိုယွင်းသွားခဲ့ပြီးနောက် ဒေသတွင်း နေ့စဉ်ထုတ်သတင်းစာဖြစ်သော Flint Journal မှာ တစ်ပတ်လျှင် ၃ ရက်သာ ထွက်ရှိနိုင်တော့သည်။

လွန်ခဲ့သည့် နှစ်ပေါင်း ၃၀ ခန့်က ဖလင့်ထ်တွင် စက်ရုံအလုပ်သမားပေါင်း ၁၄၀၀၀ ခန့် လာရောက်အလုပ်လုပ်ကိုင်ခဲ့ကြကာ General Motors Corp. အတွက် မော်တော်ကားအစိတ်အပိုင်း သန်းပေါင်းများစွာကို ထုတ်လုပ်ခဲ့ကြသည်။
၂၀၀၅ ခုနှစ်တွင် စက်ရုံအလုပ်ရုံများ ပြောင်းရွှေ့ကုန်ကြသဖြင့် မြို့မှာ ပျက်လုနီးပါးဖြစ်ကျန်ခဲ့သည်။

အလုပ်သမားများကိုလည်း တစ်ဦးတစ်လေမျှပင် မတွေ့ရတော့ချေ။
လက်ရှိအားဖြင့် အမေရိကန်ပြည်၊ ဒက်ထရွိုက်မြို့တွင် နေအိမ်တစ်လုံးကို ကန်ဒေါ်လာ ၁၀၀၀ ခန့်ဖြင့် ရရှိနိုင်ပြီး နေအိမ်ဈေးနှုန်း အနည်းပါးဆုံးဖြစ်သည်ဟု ဆိုနေကြသော်လည်း ဖလင့်ထ်ရှိ ယခုနေအိမ်မှာမူ ၁၈၈ ဒေါ်လာ( မြန်မာငွေ နှစ်သိန်းခွဲကျော်) သာ ဈေးခေါ်ထားသည်။

နေအိမ်တည်နေရာမှာ ဖလင့်ထ်မြို့၊ Dakota Ave လမ်း၊ အမှတ် ၂၅၁၈ တွင် တည်ရှိသည်။နေအိမ်အကျယ်အဝန်းမှာ စတုရန်းပေ ၁၂၂၅ ပေ ရှိပြီး အိပ်ခန်း ၃ ခန်း၊ ရေချိုးခန်း တစ်ခန်း ပါဝင်သည်။ခြံဝန်းအကျယ်မှာ ၅၆၆၃ စတုရန်းပေရှိပြီး နေအိမ်ကို ၁၉၂၈ ခုနှစ်တွင် ဆောက်လုပ်ခဲ့ခြင်း ဖြစ်သည်။

အိမ်နီးချင်းတစ်ဦး၏ ပြောကြားချက်အရ ယင်းနေအိမ်မှာ လူမနေသည်မှာ နှစ်ပေါင်းများစွာကြာမြင့်ခဲ့ပြီဖြစ်ပြီး မီး ၂ ကြိမ်လောင်ကျွမ်းခဲ့ဖူးသည်ဟု ဆိုသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)