ဟောလိဝုဒ်ကြယ်ပွင့်၊ ထပ်ဆင့် အော်စကာဆုရှင် ဟီလာရီဆွမ့်ခ် နေထိုင်ခဲ့ဖူးသော နယူးယောက်မြို့ရှိ ၃ ထပ်တိုက်ကို အမေရိက၏ နာမည်ကျော် စတိုးဆိုင်အုပ်စု Macy’s ၏ ဥက္ကဌက ဝယ်ယူလိုက်ကြောင်း နယူးယောက်အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
ဟီလာရီဆွမ့်ခ်၏ အမည်အပြည့်အစုံမှာ ဟီလာရီ အန်း ဆွမ့်ခ်ဖြစ်ပြီး အမေရိကန်ရုပ်ရှင်မင်းသမီး၊ ရုပ်ရှင်ထုတ်လုပ်သူတစ်ဦးဖြစ်ကာ ၁၉၇၄ ခုနှစ်၊ ဇူလိုင်လ ၃၀ ရက်တွင် မွေးဖွားသည်။
နာမည်ကျော်အက်ရှင်ဇာတ်လမ်းတွဲတစ်ခုဖြစ်သော ၁၉၉၄ ခုနှစ်ရုပ်ရှင် The Next Karate Kid တွင် ပါဝင်သရုပ်ဆောင်ကာ ကမ္ဘာသိသရုပ်ဆောင်ဖြစ်လာခဲ့သည်။
၁၉၉၉ ခုနှစ်တွင် ရိုက်ကူးထုတ်လုပ်ခဲ့သည့် Boys Don't Cry ဇာတ်ကားတွင် လိင်ပြောင်းလဲထားသူ အမျိုးသမီးတစ်ဦးအဖြစ် ပါဝင်သရုပ်ဆောင်ကာ အကောင်းဆုံးဇာတ်ဆောင်မင်းသမီးအဖြစ် အော်စကာဆုနှင့် ရွှေကမ္ဘာလုံးဆုတို့ ရရှိခဲ့သည်။
၂၀၀၄ ခုနှစ်တွင်လည်း ကလင့်အိစ်ဝုဒ်ရိုက်ကူးသည့် Million Dollar Baby ဇာတ်ကားတွင် ပါဝင်သရုပ်ဆောင်ကာ အကောင်းဆုံးဇာတ်ဆောင်မင်းသမီးအဖြစ် အော်စကာဆု ထပ်မံရရှိခဲ့သည်။
ရောင်းချလိုက်သည့်နေအိမ်တည်နေရာမှာ အမေရိကန်ပြည်ထောင်စု၊ နယူးယောက်မြို့၊ မန်ဟက်တန်ဒေသ West Village အရပ်၊ ချားလ်စ်လမ်း အမှတ် ၃၃ တွင် တည်ရှိသည်။
ဝယ်ယူသွားသူ ဟယ်ရီ အေ-လောတန် III သည် Macy’s စတိုးဆိုင်အုပ်စု၏ ဥက္ကဌဖြစ်ပြီး ယခုနေအိမ်ကို ကန်ဒေါ်လာ ၁၀ ဒသမ ၅ သန်းဖြင့် ဝယ်ယူလိုက်ခြင်း ဖြစ်သည်။
၂၀၁၆ ခုနှစ်၊ ဇူလိုင်လအချက်အလက်များအရ Macy’s စတိုးသည် အမေရိကန်ပြည်ထောင်စု၊ ဟာဝိုင်အီ၊ ပြူတိုရီကိုနှင့် ဂူအမ်တို့တွင် ဆိုင်ခွဲပေါင်း ၇၂၈ ဆိုင်အထိ ဖွင့်လှစ်ထားပြီး ဖြစ်သည်။
၁၈၉၉ ခုနှစ်တွင် ဆောက်လုပ်ခဲ့သည့်နေအိမ်ဖြစ်ပြီး သက်တမ်းနှစ် ၇၀ ပြည့်သည့် ၁၉၆၉ ခုနှစ်တွင် နယူးယောက်မြို့၏ ပြယုဂ်အဆောက်အအုံတစ်ခုအဖြစ် သတ်မှတ်ခြင်းခံခဲ့ရသည်။
ဟီလာရီဆွမ့်ခ်သည် ယင်းနေအိမ်ကို ကန်ဒေါ်လာ ၃ ဒသမ ၉ သန်းဖြင့်ဝယ်ယူခဲ့ပြီး ခင်ပွန်း(ဟောင်း)ဖြစ်သူ ချက်ဒ်လိုဝီနှင့်အတူ ၂၀၀၂ ခုနှစ်မှ စတင်ကာ နေထိုင်ခဲ့ကြပြီး ၂၀၀၆ ခုနှစ်တွင် ကန်ဒေါ်လာ ၈ ဒသမ ၂၅ သန်းဖြင့် ပြန်လည်ရောင်းထုတ်ခဲ့သည်။
မှတ်တမ်းများအရ ယင်းနေအိမ်ကို ယခုနှစ်ဇွန်လအတွင်း Corcoran ကုမ္ပဏီမှတစ်ဆင့် ကန်ဒေါ်လာ ၁၁ ဒသမ ၉၅ သန်းဖြင့် စတင်ဈေးကွက်တင်ခဲ့ခြင်းဖြစ်ပြီး ရောင်းချသူများမှာ အမေရိကတွင် ဒုတိယမြောက်အကြီးမားဆုံး စာအုပ်ဆိုင်အုပ်စုဖြစ်သော Books-a-Million ၏ ပိုင်ရှင်များဖြစ်သော ကလိုင်ဒီနှင့် ဆမ်းမား အန်ဒါဆန်တို့ ဖြစ်ကြသည်။
နေအိမ်အကျယ်အဝန်းမှာ စတုရန်းပေ ၃၇၃၆ ရှိပြီး အိပ်ခန်း ၃ ခန်း၊ ရေချိုးခန်း ၂ ခန်း၊ စာကြည့်တိုက်တစ်ခု၊ ရုံးခန်းတစ်ခု၊ မီးလင်းဖိုများစွာနှင့် အိမ်နောက်ဘက်ပန်းဥယျာဉ်တို့ ပါဝင်သည်။Master bedroom တွင် ဓာတ်ငွေ့သုံးမီးလင်းဖိုပါဝင်ကာ တတိယထပ်တွင် အိပ်ခန်း ၂ ခန်း ထပ်မံပါဝင်သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
