မြို့ကွက်သစ်ဖော်ထုတ်ရေးလုပ်ငန်းတွေကချထားပေးခဲ့တဲ့ မြေကွက်တွေမှာ အဆောက်အအုံ ဆောက်လုပ်တာတွေနဲ့ ခြံစည်းရိုးခတ်တဲ့ လုပ်ငန်းတွေကို လာမယ့်နှစ် မေလ ၁၅ ရက်နေ့နောက်ဆုံးထားပြီး လုပ်ဆောင်ရမှာဖြစ်တယ်လို့ မန္တလေးမြို့တော်စည်ပင်သာယာရေးကော်မတီကသိရပါတယ်။
မန္တလေးမြို့တော်ဝန် ဒေါက်တာရဲလွင်က လိုက်နာဆောင်ရွက်ခြင်းမရှိတဲ့ မြေကွက်တွေကိုပြန်လည်စိစစ်ပြီး မြေချထားမိန့်၊ မြေစလစ်နဲ့ မြေငှားဂရန်တွေကိုပယ်ဖျက် ပြီး အစိုးရစီမံခန့်ခွဲမှု(အစိုးရမြေ)အဖြစ် သတ်မှတ်သွားမှာဖြစ်တယ်လို့ ပြောပါတယ်။
ခြံစည်းရိုးခတ်တာတွေနဲ့ အဆောက်အအုံဆောက်လုပ်တာတွေလုပ်ဖို့ အသိပေးကြေညာခဲ့တဲ့အတွက် ချမ်းမြသာစည် မြို့နယ်ကခြံစည်းခတ်ခွင့် ၁၇၆ ဦး၊ အိမ် ဆောက်မိန့် ၇၅၅ဦး၊ ပြည်ကြီးတံခွန်မြို့နယ်က ခြံစည်းရိုးခတ်ခွင့် ၃၂၆ ဦး၊ အိမ်ဆောက် မိန့် ၇၇၇ ဦးကခွင့်ပြုမိန့်တွေလျှောက်ထားခဲ့ကာ ခွင့်ပြုမိန့်ရရှိပြီး ကိုးလ အတွင်းမှာ အကောင်အထည်ဖော်ဆောင်ရွက်ရမှာဖြစ်တယ်လို့ သိရပါတယ်။
ဆောင်ရွက်ပြီးစီးတဲ့ အခြေအနေကိုသိဖို့သီးခြားအဖွဲ့နဲ့ စာရင်းအချက်အလက်တွေပြုစုနေတယ်လို့ ဆိုပါတယ်။
မြို့ကွက်သစ်ဖော်ထုတ်ရေးအဖွဲ့ကချထားပေးခဲ့တဲ့ မြေကွက်တွေကို ခြံစည်းရိုးခတ်ဖို့၊ အဆောက်အအုံဆောက်လုပ်တာတွေပြုလုပ်ဖို့ကို ၂၀၁၃ ခုနှစ်နဲ့ ၂၀၁၄ ခု နှစ်တွေတုန်းကလည်း အသိပေးကြေညာထားတာတွေပြုလုပ်ခဲ့တယ်လို့ သိရပါတယ်။
Credit: The Kumudra
