ဗြိတိန်ဂန္ထဝင် ပေါ့ပ်အဆိုတော်ကြီး ဆာကလစ်ဖ် ရစ်ချတ်၏ ပေါ်တူဂီရှိ စပျစ်ခြံကြီး အရောင်းဈေးကွက်ဝင်လာ

ဗြိတိန်ဂန္ထဝင် ပေါ့ပ်အဆိုတော်ကြီး ဆာ ကလစ်ဖ် ရစ်ချတ်၏ ပေါ်တူဂီနိုင်ငံ တောင်ဘက်စွန်းရှိ စပျစ်ခြံကြီး အရောင်းဈေးကွက်ဝင်လာသည်။
ယင်းစပျစ်ခြံမှ နာမည်ကျော် ကလစ်ဖ်ရစ်ချတ်ဝိုင်များ ထုတ်လုပ်သည်ဟု
ဆိုသည်။

စပျစ်ခြံကို Quinta do Miradouro & Adega do Cantor ဟုအမည်ပေးထားပြီး “အဆိုတော်၏ ဝိုင်ထုတ်လုပ်ရာ နေရာ” ဟု အဓိပ္ပာယ်ရသည်။
ပင်လယ်ကမ်းခြေတွင် တည်ရှိပြီး အယ်လ်ဘူဖိုင်ရာ မြို့ကလေးနှင့် အနည်းငယ်သာ ကွာဝေးသည်။

အယ်လ်ဘူဖိုင်ရာသည် ပေါ်တူဂီနိုင်ငံတောင်ပိုင်း၊ အယ်လ်ဂါဗီဒေသရှိ ကမ်းရိုးတန်းမြို့ကလေးဖြစ်သည်။ယခင်က တံငါရွာကလေးဖြစ်ပြီး နောက်ပိုင်းတွင်မူ လှပသည့် သဲသောင်ကမ်းခြေများရှိခြင်းကြောင့် အပန်းဖြေမြို့ကလေး ဖြစ်လာခဲ့သည်။

ကလစ်ရစ်ချတ်သည် ဗြိတိန် ပေါ့ပ်အဆိုတော်၊ ဂီတပညာရှင်၊ ရုပ်ရှင်သရုပ်ဆောင်၊ ပရဟိတသမားတစ်ဦးဖြစ်ပြီး ၁၉၄၀ ပြည့်နှစ်၊ အောက်တိုဘာလ ၁၄ ရက်တွင် မွေးဖွားသည်။
ကမ္ဘာတစ်ဝန်းတွင် တေးအယ်လ်ဘမ်ပေါင်း သန်း ၂၅၀ ကျော် ရောင်းချခဲ့ရပြီးဖြစ်သည်။

ဗြိတိန်တွင် သူ၏ ဆင်ဂယ်ဓာတ်ပြားပေါင်း ၂၁ သန်းရောင်းချခဲ့ရရာ ဘီးတဲလ်နှင့် အဲလ်ဗစ် ပရက်စလေတို့ပြီးလျှင် တတိယမြောက် အရောင်းရဆုံး အနုပညာရှင်အဖြစ် ရပ်တည်နေသည်။၁၉၅၈ ခုနှစ်တွင် Move It အမည်ရှိ ရော့ခ်အင်ရိုး ဆင်ဂယ်ဖြင့် တဟုန်ထိုးကျော်ကြားလာခဲ့ကာ ဗြိတိန်အတွက် အဲလ်ဗစ် ပရက်စလေကို အစားထိုးပေးမည့် အဖြေတစ်ရပ်ဖြစ်လာခဲ့သည်။

ကလစ်ဖ်ရစ်ချတ်သည် ဂီတလောကတွင် နှစ်ပေါင်းများစွာ အောင်မြင်ကျော်ကြားခဲ့ပြီးနောက် ပေါ်တူဂီနိုင်ငံတွင် သူပိုင်ဆိုင်ထားသော စပျစ်ခြံမှ ကမ္ဘာ့အဆင့်မီဝိုင်များ ထုတ်လုပ်ရန် အချိန်ပေးလာခဲ့သည်။

ယင်းကာလများက ပေါ်တူဂီရှိ စပျစ်ခြံသို့ ရောက်သွားခဲ့မည်ဆိုပါက ညစ်ပေနေသော အင်္ကျီဖြင့် အလုပ်ရှုပ်နေသော ကလစ်ဖ်ရစ်ချတ်ကို တွေ့ရမည် ဖြစ်သည်။

အဆိုပါခြံမှ ဒေသတွင်းတွင် အကောင်းဆုံးဝိုင်များထွက်ရှိရာ Mistletoe နှင့် Vida Noda တို့ ပါဝင်သည်။စပျစ်ခြံအတွင်းတွင် နေအိမ် ၂ လုံးလည်း ပါဝင်ရာ အိပ်ခန်း ၃ ခန်းနှင့် ၄ ခန်း အသီးသီး ပါဝင်ကြသည်။

ထို့အပြင် ရေကူးကန်နှင့် တင်းနစ်ကွင်းတို့လည်း ပါဝင်ပြီး ယူရို ၅ ဒသမ ၅ သန်းဈေးခေါ်ထားသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)