နယူးယောက်တွင် အဆိုတော်ဖြစ်လိုသည့် အမျိုးသမီးက ကင်မ်ကာဒါရှီယန်နှင့် ကင်ညေးဝက်စ်တို့၏ နေအိမ်ကို ဝယ်ယူ

အမေရိကန်ပြည်ထောင်စု၊ ကယ်လီဖိုးနီးယားပြည်နယ်၊ လော့စ်အိန်ဂျလိမြို့ အနောက်ဘက်တွင် ကမ္ဘာကျော်ကြယ်ပွင့်များ အခြေချစုဝေးရာ Bel Air ဟုခေါ်သည့် ဒေသရှိ၏။

အဆိုပါဒေသသည် ခြံဝန်းကျယ်ကြီးများသာ တည်ရှိပြီး စုစုပေါင်း နေအိမ် ၃၀၀ ပင်မပြည့်ချေ။ယင်းဒေသတွင် ကမ္ဘာကျော်မော်ဒယ် ကင်မ် ကာဒါရှီယန်နှင့် ခင်ပွန်းဖြစ်သူ ကင်ညေးဝက်စ်တို့က နေအိမ်တစ်လုံးပိုင်ဆိုင်ထားပြီး ယခုအခါ အဆိုပါနေအိမ်ကို ရောင်းထုတ်လိုက်ကြပြီဖြစ်သည်။

အဆိုပါအရောင်းအဝယ်တွင် ထဲထဲဝင်ဝင်ပါဝင်ခဲ့သူတစ်ဦး၏ ပြောကြားချက်အရ ကန်ဒေါ်လာ ၁၇ ဒသမ ၈ သန်းဖြင့် ရောင်းချခဲ့ခြင်း ဖြစ်သည်ဟု ဆိုသည်။
ရေကူးကန်တစ်ခု၊ အိပ်ခန်း ၆ ခန်း၊ ရေချိုးခန်း ၈ ခန်းပါဝင်ပြီး ကြမ်းခင်းဧရိယာမှာ စတုရန်းပေ ၉၀၀၀ ခန့် ကျယ်ဝန်းကာ အနီးရှိ ချောက်ကြီးကို အပေါ်စီးမှ တွေ့မြင်နေရသည်။

နေအိမ်အရောင်းအဝယ်တွင် Douglas Elliman အိမ်ခြံမြေကုမ္ပဏီက ရောင်းလက်၊ ဝယ်လက်နှစ်ဘက်လုံးမှ ပါဝင်ခဲ့သည်။

Douglas Elliman မှ အကျိုးဆောင်တစ်ဦးဖြစ်သူ ဂျို့ရှ် အယ့်လ်တ်မန်က ပြောကြားရာတွင် နေအိမ်မှာ ပြတိုက်တစ်လုံးနှင့် တူနေကြောင်း ပြောကြားသည်။
ကင်မ်ကာဒါရှီယန်တို့ ဇနီးမောင်နှံသည် အဆိုပါနေအိမ်ကို ၂၀၁၃ ခုနှစ်၊ ဇန်နဝါရီလအတွင်း ကန်ဒေါ်လာ ၉ သန်းဖြင့် ဝယ်ယူခဲ့ခြင်းဖြစ်ကြောင်း အိမ်ခြံမြေမှတ်တမ်းများတွင် ဖော်ပြသည်။

ကင်မ်ကာဒါရှီယန်တို့က မြေထဲပင်လယ်ဗိသုကာဟန်ဖြင့် ဆောက်လုပ်ထားသည့် အဆိုပါနေအိမ်ကို မှန်ပြတင်းသစ်များဖြင့် ပြန်လည်မွမ်းမံခဲ့ပြီး နေအိမ်၏ မျှော်စင်မှာ ပေ ၃၀ ခန့်အထိ မြင့်မားသည်။

ယခုနေအိမ်ကို ဝယ်ယူပြီး တစ်နှစ်ခန့်ကြာမြင့်သောအခါ ကင်မ်ကာဒါရှီယန်တို့ ဇနီးမောင်နှံသည် Hidden Hills တွင် တည်ရှိပြီး တစ်ချိန်က လီဆာမာရီပရက်စလေ ပိုင်ဆိုင်ခဲ့ဖူးသော နေအိမ်ကြီးကို ကန်ဒေါ်လာ သန်း ၂၀ ဖြင့် ထပ်မံဝယ်ယူလိုက်ကြောင်း အိမ်ခြံမြေမှတ်တမ်းများတွင် ဖော်ပြသည်။
ဝယ်ယူလိုက်သူမှာ မာရီနာ အက်ခ်တွန်အမည်ရှိ ယူကရိန်း စွန့်ဦးစီးပွားရေးလုပ်ငန်းရှင် အမျိုးသမီးတစ်ဦးဖြစ်သည်။

အက်ခ်တွန်သည် ယခုနှစ် သြဂုတ်လအတွင်း အိမ်ထောင်ကျခဲ့ပြီးနောက် လော့စ်အိန်ဂျလိတွင် အခြေချကာ အဆိုတော်တစ်ဦးအဖြစ် အသက်မွေးဝမ်းကျောင်းပြုလုပ်ရန် ရည်ရွယ်ကာ ယခုနေအိမ်ကို ဝယ်ယူလိုက်ခြင်းလည်း ဖြစ်သည်။
အသံဖမ်းစတူဒီယိုတစ်ခု တည်ထောင်နိုင်မည့်အပြင် အနုပညာဆန်သည့် နေအိမ်မျိုးကို ရှာဖွေနေရာမှ ကင်မ်ကာဒါရှီယန်၏ နေအိမ်ကို တွေ့ရှိခဲ့ခြင်းလည်း ဖြစ်သည်။

နေအိမ်အတွင်းတွင် ကင်မ်ကာဒါရှီယန်ကိုယ်တိုင်လိုက်လံပြသကာ အသေးစိတ်ရှင်းပြခဲ့သည့်အပြင် သူ၏အဝတ်ဗီရိုကိုပင် ဖွင့်လှစ်ပြသခဲ့သည်ဟု ဆိုသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)