အုတ်တိုက်၏ ခန့်မှန်း တန်ဖိုး တွက်နည်း

ထုထည် ခန့်မှန်းခြေ တွက်နည်းဖြင့် တွက်ယူခြင်း

ထုထည်ခန့်မှန်းခြေ တွက်နည်းသည် အဆောက်အအုံ၏ စုစုပေါင်း ထုထည်ကို ၎င်းဒေသရှိ အလားတူ အဆောက်အအုံ၏ ထုထည် တစ်ယူနစ် ကုန်ကျစရိတ်နှုန်းနှင့် မြှောက်ယူသော နည်း ဖြစ်၏။

ထုထည်တွက်ရာတွင် အောက်ခံခုံ ဧရိယာကို အဆောက်အအုံ၏ အမြင့်နှင့် မြှောက် ရ၏။ ပျဉ်ထောင်အိမ်များတွင် အမြင့်သည် အောက်ခံခုံ မျက်နှာပြင်မှ လျောက်တန်း(Pole plate) အထက်ခေါင်မိုး အမြင့်၏ နှစ်ပုံတစ်ပုံအထိ အကွာအဝေး ဖြစ်၏။

အုတ်တိုက်များတွင်မူ အမြင့်သည် အုတ်မြစ် အုတ်နံရံမှ မိကျောင်းတုံး (Wall Plate) အထက်ခေါင်မိုး အမြင့်၏ နှစ်ပုံတစ်ပုံအထိ အကွာအဝေး ဖြစ် ၏။ အောက်ခံခုံ ဧရိယာအတွက် အတိုင်းအတာများမှာ အောက်ခံခုံ ဧရိယာ တွက်နည်းအတိုင်းပင် ဖြစ်၏။

ပုံစံ (၃-၁) တွင်ဖော်ပြထားသည့် အုတ်တိုက်၏ ခန့်မှန်းတန်ဖိုးကို ထုထည် ခန့်မှန်းခြေ နည်းဖြင့် ရှာမယ်ဆိုရင်။

အုတ်တိုက်၏ အမြင့်သည် မြေမျက်နှာပြင်မှ မိကျောင်းတုံးအပေါ် အနား အ ထိ ( 15 ပေ)၊ အုတ်မြစ်အနက် ( 4 ပေ) နှင့် ခေါင်မိုးအမြင့်သည် ( 6 ပေ) ရှိ၏။ ၎င်းဒေသတွင် အလားတူ အဆောက်အအုံ၏ ထုထည် တစ်ယူ နစ် နှုန်းမှာ (1000)ကျပ် ဖြစ်သည်။

ပုံစံ (၃-၁) ၏ စုစုပေါင်း အောက်ခံခုံ ဧရိယာ = ဧရိယာ A + ဧရိယာ B + ဧရိယာ C
= (30’ x 16’ ) + (16’ x 14’ ) + (20’ x 14’)
= 480 sq-ft + 224 sq-ft + 280 sq-ft
= 984 sq-ft

အုတ်တိုက်၏ စုစုပေါင်းအမြင့် = 15’ + 4’ + 0.5 (6’) = 22’

အုတ်တိုက်၏ ထုထည် = အောက်ခံခုံ ဧရိယာ စုစုပေါင်း x အမြင့်
= 984 x 22
= 21648 ကုဗပေ

အုတ်တိုက်၏ ခန့်မှန်းတန်ဖိုး = စုစုပေါင်းထုထည် x တစ်ယူနစ်နှုန်း
= 21648 x 1000 ကျပ်
= 216.5 သိန်းခန့်

ထို့ကြောင့် ပုံ (၃-၁) တွင် ဖေါ်ပြထားသော အုတ်တိုက်၏ ခန့်မှန်းတန်ဖိုးမှာ 216 သိန်း 5 သောင်းခန့် ကုန်ကျနိုင်ပါသည်။

မှတ်ချက် ။ ။ အဆောက်အအုံ၏ တစ်ယူနစ်နှုန်းကို နေရာဒေသပေါ် မူတည်ပြီး အစားထိုး တွက်ယူပါရန်။

Credit: Nay Nann Thukha Construction