လယ်ယာမြေ ရောင်းချခြင်း၊ ပေါင်နှံခြင်း၊ ငှါးရမ်းခြင်းနှင့် စပ်လျဉ်း၍ လိုက်နာရမည့်အချက်အလက်များ

၂၀၁၂ ခုနှစ်၊ လယ်ယာမြေဥပဒေပုဒ်မ - ၃ အရ လယ်ယာမြေအား လုပ်ပိုင်ခွင့်ရရှိသူသည် လယ်ယာမြေနှင့် စပ်လျဉ်း၍ အမည်ပေါက်ပုံစံ-(၇)လျှောက်ထားရယူရမည် ဖြစ်ပါသည်။ လယ်ယာမြေလုပ်ပိုင်ခွင့် လက်မှတ်ရရှိမှသာ လယ်ယာမြေအား လက်ရှိထားပိုင်ခွင့် အခွင့်အရေးနှင့် လယ်ယာမြေအား အကျိုးအမြတ်ခံစားပိုင်ခွင့် ရရှိမည်ဖြစ်ပါသည်။ လယ်ယာမြေလုပ်ပိုင်ခွင့် ပုံစံ(၇)အမည်ပေါက်မရရှိထားပါက လယ်ယာမြေအား လုပ်ပိုင်ခွင့်ရရှိသူအဖြစ် အသိအမှတ်ပြု မခံရသည့်အပြင် လယ်ယာမြေကို လုပ်ပိုင်ခွင့် အခွင့်အရေးလဲ မရှိပါ။

မိမိအမည်ပေါက်လယ်ယာမြေအား ပြန်လည်ရောင်းချလိုသည့်အခါတွင်လဲ လယ်ယာမြေနည်းဥပဒေပါ သတ်မှတ်သည့် စည်းကမ်းချက်များအတိုင်းလိုက်နာပြီး လယ်ယာမြေ တစ်စိတ်တစ်ဒေသကိုဖြစ်စေ၊ လယ်ယာမြေ အားလုံးအားဖြစ်စေ၊ ရောင်းချခြင်း၊ ပေါင်နှံခြင်း၊ ဌားရမ်းခြင်း၊ လဲလှယ်ခြင်းနှင့် ပေးကမ်းခြင်းပြုနိုင်ပါသည်။

နည်းဥပဒေအရ အရောင်းအဝယ်ပြုသည့်အခါ ရောင်းချသူနှင့် ဝယ်ယူသူသည် အခွန်ရုံးတွင် တံဆိပ်ခေါင်းခွန်၊ ရောင်းခွန်၊ ဝင်ငွေခွန်များ ထမ်းဆောင်၍ သက်ဆိုင်ရာ ကျေးရွာ/ရပ်ကွက်ဗဟို လယ်စီရှေ့မှောက်၌ ရက်ပေါင်း (၁၂၀)အတွင်း မှတ်ပုံတင်အရောင်းအဝယ် စာချုပ်ချုပ်ဆိုရမည်။ ထို့နောက် ဝယ်ယူသူအမည်ပြောင်းလဲနိုင်ရန် လျှောက်လွှာပုံစံ - (၉)၊ ပုံစံ - (၇) မူရင်း၊ မှတ်ပုံတင်အရောင်းအဝယ်စာချုပ်ဖြင့် မြို့နယ် ဦးစီးဌာနရုံးသို့ ဆက်လက် လျှောက်ထားရပါမည်။

လယ်ယာမြေဥပဒေအရ ငှားရမ်းခြင်း၊ ပေါင်နှံခြင်းပြုလုပ်လျှင်လဲ ပေါင်နှံသူ၊ ငှားရမ်းသူသည် လယ်ယာ မြေ၏ စိုက်ပျိုးရေးလုပ်ငန်းများ ဆက်လက်လုပ်ဆောင်ရမည်။ နည်းဥပဒေပုဒ်မ-၇အရ လယ်ယာမြေ စီမံခန့်ခွဲမှုအဖွဲ့သည် ဆန်စပါးဖူလုံမှုရှိစေရန် စိုက်ပျိုးရေးဂတကို အဓိကထားပါသည်။ ရပ်ကွက်/ကျေးရွာ လယ်ယာမြေ စီမံခန့်ခွဲမှုအဖွဲ့မှ စီစစ်ပြီး ခိုင်လုံသော အကြောင်းပြချက်မရှိဘဲ လယ်ယာမြေကိုစိုက်ပျိုးမြေအဖြစ်မှ ချန်လပ်ထား၍ မရပါ၊ ပေါင်နှံရာတွင်လဲ အစိုးရမှ သတ်မှတ်ထားသော ဘဏ်တစ်ခုခုတွင်သာ လယ်ယာမြေလုပ်ပိုင်ခွင့်ပြု လက်မှတ်မူရင်းအား အပ်နှံ၍ ပေါင်နှံရမည်။ပေါင်နှံခြင်းပြုရာတွင် လယ်ယာမြေစီမံခန့်ခွဲမှုအဖွဲ့ ရှေ့မှောက်၌ တံဆိပ်ခေါင်းခွန် ထမ်းဆောင်၍ ရက်ပေါင်း-(၁၂၀)အတွင်း ပေါင်နှံခြင်း မှတ်ပုံတင်စာချုပ်ချုပ်ဆိုရန် လိုပါသည်။

လယ်ယာ မြေအငြင်းပွှားမှု ပေါ်ပေါက်သည့်အခါ သက်ဆိုင်ရာ ရပ်ကွက်/ကျေးရွာ လယ်ယာမြေစီမံခန့်ခွဲမှုအဖွဲ့တွင် မူလမူခင်းဖွင့်လှစ်ဆောင်ရွက်ရမည်ဖြစ်ပါသည်။ အငြင်းပွှားမှုဖြေရှင်း ဆောင်ရွက်နေစဉ်အတွင်းတွင် လယ်ယာမြေအား ရောင်းချခြင်း၊ပေါင်နှံခြင်း၊ပေးကမ်းခြင်း၊ လဲလှယ်ခြင်း ဆောင်ရွက်မရပါ။

လယ်ယာမြေနည်းဥပဒေပုဒ်မ- ၅၅ အရ နိုင်ငံခြားသားနှင့် ၎င်းနှင့်သက်ဆိုင်သည့် အဖွဲ့အစည်းအား လယ်ယာမြေကို ရောင်းချခြင်း၊ပေါင်နှံခြင်း၊ ငှားရမ်းခြင်း၊လဲလှယ်ခြင်း၊ ပေးကမ်းခြင်း ဆောင်ရွက်မရပါ။ နိုင်ငံခြားသားနှင့် အဖွဲ့အစည်းများအား လယ်ယာမြေအား လွှဲပြောင်းခြင်းဆောင်ရွက်ပါက လယ်ယာမြေနည်း ဥပဒေပုဒ်မ - ၆၅(ဂ) အရ လယ်ယာမြေလုပ်ပိုင်ခွင့်ကို ပြန်လည် သိမ်းယူခြင်းခံရမည်အပြင် လယ်ယာမြေဥပဒေပုဒ်မ-(၃၇)အရ တရားစွဲဆိုခြင်းလဲ ခံရနိုင်ကြောင်း ဥပဒေဗဟုသုတ အနေဖြင့် ရေးသားဖော်ပြပေးလိုက်ပါသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

iMyanmarHouse.com ၏ ဥပ​ဒေအကြံ​ပေး ပညာရှင်​အဖွဲ့ မှ အထူးရေးသားဖော်ပြသည်။

Credit: iMyanmarHouse.com