ဒူဘိုင်းအိမ်ခြံမြေဈေးကွက်သည် ၂၀၁၇ နှစ်သစ်တွင် အဖွင့်ကောင်းခဲ့ပြီး နှစ်စပထမ ၄၅ ရက်အတွင်း ဒူဘိုင်းငွေ ၄၂ ဘီလီယံ (ကန်ဒေါ်လာ ၁၁ ဒသမ ၄ ဘီလီယံ) ဖိုးအထိ အရောင်းအဝယ်ဖြစ်ခဲ့ကြောင်း ဒူဘိုင်းမြေယာဌာန (DLD) က ထုတ်ဖော်ပြောကြားသည်ဟု အရှေ့အလယ်ပိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
ယင်းပမာဏမှာ ပြီးခဲ့သော ၂၀၁၆ ခုနှစ် တစ်နှစ်တာကာလပတ်လုံး စုစုပေါင်းအိမ်ခြံမြေကဏ္ဍ အရောင်းအဝယ် တန်ဖိုး ဒူဘိုင်းငွေ ၉၁ ဘီလီယံ (ကန်ဒေါ်လာ ၂၄ ဒသမ ၇ ဘီလီယံ) ၏ ထက်ဝက်နီးပါးရှိနေသည်ဟု ဆိုသည်။
၂၀၁၆ အိမ်ခြံမြေအရောင်းအဝယ် ၉၁ ဘီလီယံရှိခဲ့ရာတွင် ရင်းနှီးမြှုပ်နှံသူပေါင်း ၄၂၀၁၈ ဦး ပါဝင်လုပ်ကိုင်ခဲ့ကြခြင်းဖြစ်ကြောင်း ဒူဘိုင်းမြေယာဌာနမှ အိမ်ခြံမြေရင်းနှီးမြှုပ်နှံမှု စီမံခန့်ခွဲရေးနှင့် အရောင်းမြှင့်တင်ရေးဌာန၏ အဆင့်မြှင့်ညွှန်ကြားရေးမှူး မဂျစ် ဆကာ အယ်လ် မာရီက ပြောကြားသည်။
အယ်လ်မာရီထံသို့ အိမ်ခြံမြေကုမ္ပဏီများမှ အကြီးအကဲများ လာရောက်တွေ့ဆုံကာ ဒူဘိုင်းတွင် ကျင်းပမည့် ၁၃ ကြိမ်မြောက် နိုင်ငံတကာ အိမ်ခြံမြေပြပွဲ ၂၀၁၇ ကျင်းပရာတွင် ပြုလုပ်မည့် ၎င်းတို့၏ အစီအစဉ်များကို တင်ပြခဲ့ကြသည်ဟုဆိုသည်။
ယင်းအိမ်ခြံမြေပြပွဲတွင် ပြည်တွင်းနှင့် နိုင်ငံတကာမှ အိမ်ခြံမြေများကို ရောင်းချခြင်း၊ ဝယ်ယူခြင်းများ ပြုလုပ်ခွင့်ပေးမည် ဖြစ်သည်။
နိုင်ငံပေါင်း ၄၀ ကျော်မှ ကုမ္ပဏီပေါင်း ၁၀၀ ကျော် ပါဝင်ပြသမည်ဖြစ်ပြီး နိုင်ငံတကာ အိမ်ခြံမြေ developer များ၊ အိမ်ခြံမြေအကျိုးဆောင်များ၊ အတိုင်ပင်ခံပုဂ္ဂိုလ်များ၊ ကမ္ဘာတစ်ဝန်းမှ ရင်းနှီးမြှုပ်နှံသူများ လာရောက်ကြမည်ဖြစ်ကြောင်း အိမ်ခြံမြေပြပွဲစီစဉ်သည့် Strategic Marketing & Exhibitions က ထုတ်ဖော်ပြောကြားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)