အီရန်နိုင်ငံ၏ မြို့တော် တီဟီရန်တွင် မိုးမျှော်တိုက်တစ်လုံး မီးလောင်ပြိုကျရာ လူပေါင်း ၃၀ ခန့် သေဆုံး

အီရန်နိုင်ငံ၏ မြို့တော် တီဟီရန်တွင် မိုးမျှော်တိုက်တစ်လုံး မီးလောင်ပြိုကျမှုဖြစ်ပွားရာ မီးသတ်သမားများ အပါအဝင် အနည်းဆုံး လူပေါင်း ၃၀ ခန့် သေဆုံးခဲ့ကြောင်း အီရန်အစိုးရပိုင် သတင်းမီဒီယာတို့က ထုတ်ပြန်သည်ဟု အရှေ့အလယ်ပိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

မီးလောင်ပြိုကျမှု ဖြစ်ပွားသည်မှာ တီဟီရန်မြို့လယ်ရှိ အထင်ကရအဆောက်အအုံတစ်ခုဖြစ်သော Plasco အဆောက်အအုံကြီးဖြစ်ပြီး အနည်းဆုံး လူပေါင်း ၇၀ ခန့် ပိတ်မိခဲ့ကြသည်။
ယင်းဖြစ်ရပ်တွင် မီးသတ်သမားပေါင်း ၄၅ ဦး ထိခိုက်ဒဏ်ရာရရှိခဲ့ကြောင်း အစိုးရပိုင် IRNA သတင်းဌာနက ထုတ်ပြန်သည်။

Plasco အဆောက်အအုံကြီးသည် စတီးဖြင့်အခြေခံဆောက်လုပ်ထားသည့် အဆောက်အအုံဖြစ်ကာ ၁၇ ထပ်အမြင့်ရှိပြီး အီရန်တွင် သက်တမ်းအရင့်ဆုံး အဆောက်အအုံဖြစ်သည်။

မီးသတ်သမားများသည် နာရီပေါင်းများစွာငြိမ်းသတ်ခဲ့သော်လည်း နောက်ဆုံးတွင် အဆောက်အအုံပြိုကျသွားခဲ့ရသည်။
မိမိတို့၏ တန်ဖိုးရှိသောပစ္စည်းများကို သိမ်းဆည်းရယူရန် အဆောက်အအုံအတွင်း ဝင်ရောက်ကြသည့် ဆိုင်ရှင်များကို ရဲတပ်ဖွဲ့က ထိန်းသိမ်းခဲ့ရသည်ဟု ဆိုသည်။

အဆောက်အအုံ၏ ဘေးဘက်အခြမ်းမှ စတင်ပြိုကျခဲ့ပြီး အားလုံးပြိုကျခဲ့ပြီးနောက်တွင် အညိုရောင်မီးခိုးလုံးကြီးများ ဝန်းကျင်တွင် ဖုံးလွှမ်းသွားခဲ့ကာ အနီးဝန်းကျင်မှ စောင့်ကြည့်သူများ များစွာကြေကွဲဝမ်းနည်းခဲ့ကြသည်။

မီးလောင်မှုဖြစ်ပွားရာသို့ မီးသတ်တပ်ဖွဲ့ ၁၀ ခုမှ လာရောက်ငြိမ်းသတ်ခဲ့ပြီး အီရန်စစ်သည်တို့လည်း ရောက်ရှိလာခဲ့ကြသည်။
Plasco အဆောက်အအုံကြီးကို ၁၉၆၀ ပြည့်လွန်ကာလများတွင် ဆောက်လုပ်ခဲ့ပြီး ထိုစဉ်က တီဟီရန်တွင် အမြင့်မားဆုံး အဆောက်အအုံကြီးတစ်ခု ဖြစ်ခဲ့သည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)