ယခုနှစ်အတွင်းမန်းအိမ်ခြံမြေ ပြန်လည် လှုပ်ခတ်လာနိုင်ဟုဆို

လတ်တလောမှာအကျဈေးနဲ့ အရောင်းအဝယ်ဖြစ်နေတဲ့ မန္တလေးအိမ်ခြံမြေဈေးကွက်ဟာ ၂၀၁၇ ခုနှစ် လယ်လောက်မှာတော့ ဈေးနှုန်းပြန်လည် လှုပ်ခတ်လာနိုင်တယ်လို့ မန္တလေးမြို့က ဝါရင့်အိမ်ခြံမြေအကျိုးဆောင်အချို့က သုံးသပ်ကြပါတယ် ။

ရွိုင်ရယ်ထွန်းသစ္စာအိမ်ခြံမြေအကျိုးဆောင် ကုမ္ပဏီမှာဦးတင်မောင်က ‘လူဦးရေထူထပ်လာတာနဲ့အမျှ အိမ်ရာလိုအပ်ချက်များလာရင် ဈေးကတက်မှာပဲ ၊ ၂၀၁၇ မှာအိမ်ရာလိုအပ်ချက် အခုထက် ပိုမြင့်တက်လာနိုင်တယ် ၊ ဈေးနှုန်းအတက်အကျကတော့ အရင်လိုမဖောင်းပွနိုင်တော့ဘဲတက်တယ်ဆိုလဲလူတိုင်းစီးပွားရေးကောင်းတဲ့အပေါ်မှုတည်ပြီးဈေးကွက်ဖြစ်နေမယ် ၊ အရင်ကလိုဈေးကစားတဲ့ ပုံစံမျိုးနဲ့ သုံးဆလေးဆ ဖြစ်မလာနိုင်တော့ဘူး ၊ မှန်းထားတာက ၂၀၁၇ နှစ်လယ်လောက်မှာအိမ်ခြံမြေဈေးနှုန်းတွေ လှုပ်ခတ်လာနိုင်တယ်’ လို့ ပြောပါတယ်။

၂၀၁၃ ခုနှစ်ကနေ ၂၀၁၆ နှစ်ကုန်အထိလေးနှစ်ကြာအိမ်ခြံမြေဈေးကျနေခဲ့တာ ဖြစ်ပါတယ် ။ ဈေးကျနေတာကလေးနှစ်လောက်ကြာရင် အိမ်ခြံမြေဈေးကွက် ပြန်ဖြစ်လာတတ်ကာငါးနှစ်မြောက် ၂၀၁၇ မှာဈေးနှုန်းတွေ တက်လာဖို့တော့ အလားအလာရှိတယ်လို့ ဆိုပါတယ် ။

မန္တလေးအိမ်ခြံမြေဈေးကွက်က ၂၀၁၃ ခုနှစ်ကနေ ၂၀၁၆ ခုနှစ် နှစ်ကုန်ခါနီးအထိအရောင်းအဝယ်အေးနေခဲ့တာ ဖြစ်ပါတယ် ။
အိမ်ခြံမြေဈေးနှုန်းတွေဟာပျမ်းမျှအားဖြင့် ၂၅ ရာခိုင်နှုန်းကနေ ၄၀ ရာခိုင်နှုန်းအထိကျဆင်းခဲ့ပါတယ် ။

၂၀၁၇ မှာ နိုင်ငံခြားရင်းနှီးမြှုပ်နှံမှုတွေ အခုထက်ပိုဝင်ရောက်လာနိုင်ပြီး ပြည်ပရင်းနှီးမြှုပ်နှံမှုတွေကြောင့် အိမ်ခြံမြေဝယ်လိုအားမြင့်လာရင် ဈေးတက်လာမှာပဲလို့ မန္တလေးမြို့က ဝါရင့်အိမ်ခြံမြေအကျိုးဆောင်အချို့က ပြောပါတယ် ။

လက်ရှိမှာတော့ ပြည်တွင်းစစ်ပွဲတွေနဲ့ စီးပွားရေးမတည်ငြိမ်တဲ့အတွက် ပြည်ပကရင်းနှီးမြှုပ်နှံလိုသူတွေတုန့်ဆိုင်းနေတဲ့ သဘောရှိတယ်လို့ သုံးသပ်ကြပါတယ် ။
မန္တလေးအိမ်ခြံမြေဈေးကွက် ၂၀၁၆ ခုနှစ် နိုဝင်ဘာလမှာအရောင်းအဝယ် ပြန်လိုက်လာခဲ့ပြီးအိမ်ခြံမြေဈေးတွေကတော့ အကျဈေးနဲ့ အရောင်းအဝယ်ဖြစ်ခဲ့တာ ဖြစ်ပါတယ် ။ လတ်တလောမှာကျပ်သိန်း ၃၀၀ နဲ့ ကျပ်သိန်း ၅၀၀ ဝန်းကျင် တန်ဖိုးရှိတဲ့ မြေကွက်တွေ အရောင်းအဝယ်ဖြစ်နေတယ်လို့ သိရပါတယ် ။


Credit: The Kumudra