တစ်လလျှင် ကျပ်သုံးသောင်းနှုန်း၊ နှစ် (၃၀)ပေးသွင်းမှုဖြင့် အိမ်ခန်းပေါင်းနှစ်သိန်းကျော် အကောင်အထည်ဖော်မည့် အခြေခံလူတန်းစားတို့အတွက် ဖြစ်နိုင်ခြေရှိသော အိမ်ရာစီမံကိန်း အစီအစဉ်မှာ စူးစမ်းဆဲအဆင့်သာရှိပြီး ယခုထိမြေနေရာ၊ ဆောက်လုပ်မည့်ကုမ္ပဏီပင် မရှိသေးကြောင်း စက်တင်ဘာ ၁၃ ရက်က ရန်ကုန်မြို့ရှိ Central Hotel ၌ ကျင်းပသည့် အခြေခံလူတန်းစားများအတွက် ဖြစ်နိုင်ခြေရှိသော အိမ်ရာစီမံကိန်းအတွက် စာနယ်ဇင်းများနှင့် တွေ့ဆုံဆွေးနွေးပွဲ အခမ်းအနားမှ သိရသည်။
အဆိုပါ အခြေခံလူတန်းစားတို့အတွက် ဖြစ်နိုင်ခြေရှိသော အိမ်ရာစီမံကိန်းအား ၀ယ်သူ၏ အဆိုပြုလွှာပုံစံများကို ဂျာနယ်တိုက်အသီးသီးသို့ ကြော်ငြာအနေဖြင့် ပေးပို့သွားမည်ဖြစ်ကြောင်း၊ တိုက်ခန်းဝယ်ယူလိုသူများမှ အဆိုပါကြော်ငြာပုံစံများကို သက်ဆိုင်ရာ ဂျာနယ်အသီးသီးသို့ ပြန်လည်ပေးပို့ရမည်ဖြစ်ကြောင်း၊ ယင်းသို့ ပြည်သူများ၏ အဆိုပြုလွှာပုံစံများအရ မည်သည့်နေရာတွင် အိမ်ရာမည်မျှ ဖော်ဆောင်ရမည်ဆိုသည်ကို သိနိုင်မည်ဖြစ်ကြောင်း စာနယ်ဇင်းရှင်းလင်းပွဲမှ သိရသည်။
“ကျွန်တော်တို့က ဒီအဆိုပြုလွှာတွေကို သက်ဆိုင်ရာဂျာနယ်တိုက်တွေကနေ ကြော်ငြာအနေနဲ့ ထည့်ပို့ထားမယ်။ ပြည်သူတွေက ဒီပုံစံကို ဂျာနယ်တိုက်တွေကို ပြန်ပို့ရမယ်။ ဂျာနယ်တိုက်တွေက ဘယ်ခရိုင်မှာတော့ ဘယ်လောက်ရှိသွားပြီဆိုတာ လက်ခံရရှိမယ်။ ကျွန်တော်တို့က ဂျာနယ်တိုက်တွေကနေ စုစည်းမယ်” ဟု Royal Summit Co.,Ltd မှ မန်နေးဂျင်းဒါရိုက်တာ ဦးသန်းဦးက ပြောကြားခဲ့သည်။
ယင်းကဲ့သို့ အိမ်ရာများဖော်ဆောင်ရန် မြေနေရာနှင့်ပတ်သက်၍ “အခုလက်ရှိမှာ လူတွေက ဘယ်မှာနေမယ်မှန်းတောင် မသိသေးတော့ ကျွန်တော်တို့က ဘယ်နေရာမှာ မြေသွားဝယ်ထားမလဲ။ မြေနေရာ ဘယ်နေရာမှာ သွားတောင်းပေးထားရမလဲ။ ဒါ အဓိကပြဿနာပဲ။ နောက်တစ်ခုက ဒီအချိန်မှာ ကျွန်တော်တို့ဘယ်နေရာမှာ လုပ်ပါမယ်ဆိုတာ ကြေညာလိုက်မယ်ဆိုရင် မြေဈေးတွေ ကမောက်ကမဖြစ်သွားနိုင်တယ်။ တကယ်ကမောက်ကမဖြစ်လာရင် ကျွန်တော်တို့ဘယ်လိုမှ ဖြေရှင်းပေးနိုင်မှာ မဟုတ်ဘူး။ ဖြေရှင်းမပေးနိုင်တဲ့ အခါကျတော့ နစ်နာစရာရှိရင် ပြည်သူပဲနစ်နာမှာ။ ဒါကြောင့် ကျွန်တော်တို့ ဒါနဲ့ပတ်သက်ရင် မြေနေရာ ဘယ်နေရာမှာ ဘာရှိတယ်ဆိုတာ ပြောလို့မရတာ သေချာပါတယ်” ဟု ၎င်းကဆက်လက်ပြောကြားခဲ့သည်။
အခြေခံလူတန်းစားတို့အတွက် ဖြစ်နိုင်ခြေရှိသော အိမ်ရာစီမံကိန်းမှ အိမ်ခန်းပေါင်းနှစ်သိန်းကျော် ရောင်းချမည်ဖြစ်ကြောင်း၊ တစ်လလျှင် ကျပ်သုံးသောင်းနှုန်း၊ နှစ်(၃၀)ငွေပေးသွင်းမှု၊ နှစ်နှစ်အတွင်း အကောင်အထည် ပြီးစီးမည်ဖြစ်ကြောင်း၊ အကျယ်အ၀န်းမှာ စတုရန်းပေ ၆၀၀ နှင့် အမြင့်ရှစ်ပေနှင့် ၁၀ ပေကြားရှိမည်ဖြစ်ကြောင်း၊ ရောင်းဝယ်မှုတွင် ဥပဒေနှင့်အညီ စာချုပ်ချုပ်ဆိုရာ၌ စားသုံးသူ၏ အခွင့်အရေးနှင့် ရပိုင်ခွင့်များ နစ်နာဆုံးရှုံးမှု မရှိစေရေးအတွက် ပါဝင်ရမည့် အချက်အလက်များကို လမ်းညွှန်မှုပေးနိုင်ပါရန် တောင်းခံပါကြောင်းဖြင့် ၂၀၁၄ ခုနှစ် ဧပြီ ၂၈ ရက်စွဲဖြင့် သမ္မတဦးသိန်းစိန်ထံ တင်ပြပေးပို့ခဲ့ကြောင်း သိရသည်။
“အခုချိန်အထိတော့ ကျွန်တော်တို့ တင်ပြထားတာနဲ့ပတ်သက်ပြီး သမ္မတကြီးဆီက ဘာမှအကြောင်းပြန်ကြားချက်မှ မရသေးပါဘူး” ဟု ဦးသန်းဦးက ပြောကြားခဲ့သည်။
“ကျွန်တော်တို့ ဒီစီမံကိန်းက ဘယ်လောက်ကြာမလဲဆိုရင် ဂျာနယ်သမားတွေ ဘယ်လောက်အထိ ပြည်သူတွေလက်ထဲကို လျင်မြန်စွာ ဘယ်လိုရောက်အောင် စွမ်းဆောင်ပေးနိုင်မလဲ ဆိုတဲ့အပေါ် မူတည်ပါတယ်။” ဟု ၎င်းကဆက်လက်သုံးသပ် ပြောကြားခဲ့သည်။
“ဂျာနယ်တိုက်တွေက လက်ခံမယူဘူးဆိုရင် ကျွန်တော်တို့က လက်ခံယူပေးမယ်။ နေရာတွေပေးမယ်။ ကျွန်တော်တို့ အခုသိသွားတာက ဂျာနယ်တိုက် ၈၀ ရှိရင် ၈၀ ကို အားကိုးလိုက်တာ။ အဲဒီ ၈၀ သာ အလုပ်လုပ်ပေးရင် ကျွန်တော်တို့မြန်တယ်။ အခုလောလောဆယ်တော့ ဂျာနယ်တွေထဲကို ကြော်ငြာအမြန်ဆုံးရောက်အောင် လုပ်ဆောင်သွားပါမယ်။ ကျွန်တော်တို့ ပြန်ပို့လို့ရမယ့် လိပ်စာကိုလည်း စီစဉ်ပေးမယ်” ဟု The Infrastructure of Myanmar မှ တာဝန်ရှိသူတစ်ဦးက ပြောကြားခဲ့သည်။
အခြေခံလူတန်းစားများအတွက် ဖြစ်နိုင်ခြေရှိသော အိမ်ရာစီမံကိန်းအား The Infrastructure of Myanmar အမည်ဖြင့် ဆက်လက်အကောင်အထည် ဖော်သွားမည်ဖြစ်သော်လည်း လတ်တလောတွင် အဆိုပါ The Infrastructure of Myanmar မှာမူ မှတ်ပုံတင်ခြင်း မပြုရသေးဘဲ partnership အနေဖြင့်သာ ဆောင်ရွက်နေကြောင်း ဦးသန်းဦးက ပြောကြားခဲ့သည်။
အဆိုပြုလွှာများ လက်ခံရရှိပြီးပါက နိုင်ငံတော်သမ္မတထံ တင်ပြသွားမည်ဖြစ်ကြောင်း၊ ခွင့်ပြုချက်ရသည်နှင့် စီမံကိန်း စတင်အကောင်အထည်ဖော်ရန် စီစဉ်ထားသည်ဟု ၎င်းက ဆက်လက်ပြောကြားခဲ့သည်။
Credit: Eleven Media
