ကမ္ဘာ့အသေးဆုံး ပန်းဥယျာဉ်အဖြစ် ဂင်းနက်စ်စံချိန်တင်သွားသော ဂျပန်မှ ပန်းဥယျာဉ်မှာ A4 စာရွက် ၄ ရွက်စာ အကျယ်အဝန်းသာရှိ

စိမ်းလန်းသော မြက်ခင်း၊ ကျောက်တုံးပန်းပုများနှင့် အပန်းဖြေနားနေရန် နှစ်သက်စဖွယ် ခုံတန်း….။

ဂျပန်နိုင်ငံ၊ တိုကျိုမြို့ပြင် နဂိုင်းဇုမိမြို့လေးရှိ ပန်းဥယျာဉ်လေးတစ်ခုတွင် ချမ်းမြေ့သာယာသောပန်းဥယျာဉ်တို့၌ တွေ့ရမြဲဖြစ်သည့် အထက်ပါအချက်များ အားလုံးရှိသည်။

ပြောစရာရှိသည်မှာ ပန်းဥယျာဉ်အကျယ်အဝန်း ၂ ဒသမ ၅၈ စတုရန်းပေသာ ရှိခြင်းဖြစ်သည်။

A4 စာရွက် ၄ ရွက်စာ အကျယ်မျှသာဖြစ်ပြီး အုတ်ခဲ ၂ ဆင့် စတုရန်းပုံ ဝန်းပတ်ထားသော ပန်းဥယျာဉ်ငယ်လေးဖြစ်သည်။

နဂိုင်းဇုမိ မြို့တော်ခန်းမနှင့် များစွာမဝေးသော လူနေရပ်ကွက်တစ်ခုတွင် တည်ရှိခြင်း ဖြစ်သည်။

အဆိုပါ ပန်းဥယျာဉ်ငယ်လေးသည် ကမ္ဘာ့အသေးဆုံး ပန်းဥယျာဉ်အဖြစ် ပြီးခဲ့သော ရက်သတ္တပတ်အတွင်း ဂင်းနက်စ်စံချိန်မှတ်တမ်းတွင် ဖော်ပြခံရသည်။

သေးငယ်သော ပန်းဥယျာဉ်လေးမှာ ဒေသခံတို့ အလွန်သဘောကျသောနေရာလေးဖြစ်ခဲ့သည်မှာ ကာလကြာမြင့်ခဲ့ပြီ ဖြစ်သည်။

မြို့ခံတို့သည် လမ်းလျှောက်ထွက်ချိန်များတွင် ပန်းဥယျာဉ်လေးရှိ ခုံတန်းတွင် ထိုင်ကာ အပန်းဖြေလေ့ရှိသည်။

ရပ်ဝေးမှလာသည့် ခရီးသည်တို့မှာ ပန်းဥယျာဉ်လေးကို အမှတ်တရ ဓာတ်ပုံရိုက်ကြသည်။

ဖေဖော်ဝါရီ ၂၅ တွင် ဂင်းနက်စ်စံချိန်အဖွဲ့က တရားဝင်ကြေညာခြင်းမခံရသေးမီကတည်းက နဂိုင်းဇုမိ မြို့သားတို့က အဆိုပါဥယျာဉ်ငယ်လေးကို ကမ္ဘာ့အသေးဆုံးပန်းဥယျာဉ်ဟု သုံးနှုန်းနေခဲ့ကြသည်။

“ကျွန်တော်တို့အနေနဲ့ ဒီဥယျာဉ်လေးကို ဒေသခံတွေနဲ့အတူ ဆက်လက်ထိန်းသိမ်းစောင့်ရှောက်သွားလို ပါတယ်။ ဒါ့အပြင် လူမှုကွန်ရက်မှာ တင်လို့ကောင်းမယ့် မြေယာအလှအပတစ်ခုခု ဆက်လက်ဖန်တီးလိုပါတယ်။ ကျွန်တော်တို့မြို့လေးမှာ လူတွေကို ဆွဲဆောင်နိုင်မယ့်နေရာတွေ ပိုများလာစေချင်ပါတယ်” ဟု နဂိုင်းဇုမိမြို့လေး၏ ဆောက်လုပ်ရေးဆိုင်ရာ စီမံခန့်ခွဲရေးဌာနမှ အဖွဲ့ခေါင်းဆောင် ရှုဂျိ ကိုယားမားက ဂင်းနက်စ်စံချိန်အဖွဲ့သို့ ပြောသည်။

အဆိုပါဌာနမှ ဝန်ထမ်းတစ်ဦးဖြစ်သူက အမေရိကန်ပြည်၊ အော်ရီဂွန်ပြည်နယ်၊ ပေါ့တ်လန်းမြို့ရှိ Mill Ends Park အမည်ရှိ ပန်းဥယျာဉ်ငယ်လေးသို့ ရောက်ရှိခဲ့ပြီးနောက်ပိုင်း ထိုသို့သော ဥယျာဉ်လေးတစ်ခုဖန်တီးရန် ၁၉၈၈ ခုနှစ်တွင် စိတ်ကူးပေါ်ခဲ့ကြောင်း ကိုယားမားက ပြောသည်။

ထိုအချိန်က Mill Ends Park မှာ ကမ္ဘာ့အသေးဆုံးပန်းဥယျာဉ်အဖြစ် ဂင်းနက်စ်စံချိန်တင်ထားခြင်းဖြစ်ပြီး အကျယ်အဝန်းမှာ ၃ ဒသမ ၁၄ စတုရန်းပေ ဖြစ်သည်။

ဂျပန်သို့ ပြန်ရောက်ချိန်တွင် နဂိုင်းဇုမိမြို့လေး၏ လမ်းမကြီးတစ်နေရာတွင် မြေလွတ်နေရာငယ်တစ်ခုတွေ့ရာ ပန်းဥယျာဉ်ငယ်လေးတစ်ခု ဖန်တီးရန် စီစဉ်ခဲ့သည်။

ကမ္ဘာ့အသေးဆုံးပန်းဥယျာဉ်အဖြစ် တရားဝင်မှတ်တမ်းတင်ခံရရန်အတွက် ကွင်းဆင်းစစ်ဆေးရေးမှူးတို့ကို ဖိတ်ခေါ်ခဲ့ပြီးနောက် ဂင်းနက်စ်စံချိန်အဖွဲ့၏ စံနှုန်းများအတိုင်း အချက်အလက်များ ကောက်ယူခဲ့ကြသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: This Is the Smallest Park in the World—and It’s the Size of Just 4 Pieces of Paper