မန္တလေးတိုင်းဒေသကြီးတွင် ကုမ္ပဏီမှတ်ပုံတင်ဥပဒေသစ်ဖြင့် မှတ်ပုံတင်ရမည့် ကုမ္ပဏီအရေအတွက် ၅ဝဝဝ ကျော်ရှိ
မြန်မာနိုင်ငံ ကုမ္ပဏီများ ဥပဒေသစ်အရ မန္တလေးတိုင်းဒေသကြီးတွင် ကုမ္ပဏီမှတ်ပုံတင်ဥပဒေသစ်ဖြင့် မှတ်ပုံတင်ရမည့် ကုမ္ပဏီအရေအတွက် ၅ဝဝဝ ကျော်ရှိကြောင်း စီမံကိန်း နှင့် ဘဏ္ဍာရေးဝန်ကြီးဌာန မန္တလေးတိုင်းဒေသကြီး ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားရေးမှုဦးစီးဌာနထံမှ သိရသည်။
ဥပဒေသစ်အရ မြန်မာနိုင်ငံအတွင်းရှိ ကုမ္ပဏီများအားလုံးသည် ၂ဝ၁၈ခုနှစ် သြဂုတ် ၁ ရက် မှ စတင်၍ ၂ဝ၁၉ခုနှစ်ဇန်နဝါရီ ၃၁ ရက်အထိ ကုမ္ပဏီဆိုင်ရာ မှတ်ပုံတင် လုပ်ငန်းများကိုအီလက်ထရွှန်နစ် မှတ်ပုံတင်စနစ် Myanmar Companies Online(MyCO)ဖြင့် ပြန်လည်မှတ်ပုံတင်ရမည်ဖြစ်ကြောင်း အဆိုပါဌာန လက်ထောက်ညွှန်ကြားရေးမှူး မှ ပြောသည်။
ကုမ္ပဏီများမှ သတ်မှတ်ထားသည့်ခြောက်လအတွင်း ပြန်ပြီးမှတ်ပုံမတင်ဘူးဆိုလျှင် ထိုကုမ္ပဏီသည် စာရင်းပျက်ပြယ်သည့် အထဲတွင်ပါသွားမည်။
Online မှ မှတ်ပုံတင်ရသည်ဖြစ်သည့် အတွက် ကိုယ်တိုင်ဖုန်းနှင့်ဖြစ်စေ Laptop နှင့် ဖြစ်စေ Online ကနေ မှတ်ပုံတင် ၍ ရသည်။
ယခင် မှတ်ပုံတင်ထားပြီးသား ကုမ္ပဏီများ အနေနှင့် Online တွင် မှတ်ပုံတင်ကြေးလည်း အခမဲ့ပင်။
ယခင်ကလည်း မှတ်ပုံတင်မထားသည့် ကုမ္ပဏီအနေဖြင့် မူလ မှတ်ပုံတင်ကြေး နှစ်သိန်းခွဲသွင်းရမည်ဖြစ်သည်။
မှတ်ပုံတင်သက်တမ်းကလည်း ယခင်လို ငါးနှစ်မဟုတ်တော့ဘဲ ရာသက်ပန်ဖြစ်သွားမည် ဟု သိရသည်။
ကုမ္ပဏီများ မှတ်ပုံတင်ခြင်းနှင့် ပတ်သက်၍ ကြိုတင်ပြင်ဆင်မှုအဖြစ် ဌာနအတွင်းမှ ဝန်ထမ်းများကို ရုံးချုပ်မှ ခေါ်ယူသင်တန်းပေးသွားမည်ဖြစ်ပြီး
ဥပဒေသစ်အရ ကုမ္ပဏီများ မှတ်ပုံတင်ရာတွင် ပိုမိုလွယ်ကူသွားမည်ဖြစ်ကြောင်း သိရသည်။ယခု ဥပဒေသစ်အရ Online စနစ်ဖြင့် ကုမ္ပဏီများ မှတ်ပုံတင်အသစ်တင်ရာတွင် လွယ်ကူအဆင်ပြေရန်အတွက် ဌာနဝန်ထမ်းများကို ယခု ဇူလိုင်လအတွင်း Online Registering Trainingများအား ဖွင့်လှစ်ပေးသွားမည်ဖြစ်သည်။
လုပ်ငန်းရှင်များကိုလည်း Registering ပြုလုပ်ပုံ များကို ရုပ်သံမီဒီယာများမှ တဆင့် ကြေညာပေးသွားမည်ဖြစ်သည်။
မန္တလေးတိုင်းဒေသကြီးတွင် လက်ရှိဥပဒေဟောင်းဖြင့် မှတ်ပုံတင်သည့် ကုမ္ပဏီအရေအတွက်နှစ်စဉ်တိုးတက်နေပြီး လစဉ်မှတ်ပုံတင်သည့် ကုမ္ပဏီပေါင်း ၇ဝ ခန့် ရှိကြောင်း သိရသည်။
မြန်မာနိုင်ငံ တစ်နိုင်ငံလုံးအနေဖြင့် ယခုဇူလိုင် ၂၃ ရက်မှ သြဂုတ် ၁ ရက် မတိုင်မီအထိ ကုမ္ပဏီများ သက်တမ်းတိုးခြင်း၊မှတ်ပုံတင်ခြင်း၊လုပ်ငန်းများအား ယာယီရပ်နားထားမည်ဖြစ်ကြောင်း အဆိုပါ ဌာနထံမှ သိရသည်။
Credit :News Watch
