ဖုန်းရွှေနည်းအရ ဘယ်လိုမြေကွက်ပုံစံကို ဘယ်လိုပြုပြင်တည်ဆောက်မလဲ

ဖုန်းရွှေနည်းအရပြောရင် တြိဂံမြေကွက်ပေါ်မှာ ဘယ်လိုအိမ်ပုံစံမျိုးနဲ့ပဲဖြစ်ဖြစ် အိမ်ဆောက်နေမယ်ဆိုရင် အိမ်သူအိမ်သားတွေဟာ စိတ်ဖိစီးမှုကို ခံရမယ်။ အိမ်သူအိမ်သားတွေ စည်းလုံးမှုမရှိဘဲ မသင့်မြတ်မှုတွေသာ ဖြစ်မယ်။

စီးပွားရေးလုပ်ငန်းကြီးတွေလုပ်ရင် ဆုံးရှုံးမယ်။ အိမ်ထောင်ရှင်တွေရှိရင်လည်း အိမ်ထောင်ဘက် တစ်ဦးဦး သစ္စာဖောက်လိမ့်မယ်။ တြိဂံမြေကွက်ပေါ်မှာ အိမ်ဆောက်ရင် အိမ်ရှေ့ဘက်ကျတဲ့ထောင့်စွန်းမှာ ဓာတ်မီးတိုင်ထားရမယ်။ ဒါမှမဟုတ်ရင် အလံတိုင်တစ်ခု ထားရမယ်။ အလံတိုင်ကို အလံလွှင့်ထားရင် ပိုကောင်းမယ်။ တြိဂံမြေကွက်ထဲမှာပဲ ကြက်လျှားစွန်းလို မြေကွက်မျိုးမှာ ချွန်မြတဲ့ထောင့်စွန်းတစ်ခုပါစမြဲပဲ။ အဲသည်ထောင့်စွန်းကို စည်းရိုးပင်တွေ ထူထူစိုက်ပြီး ဖြတ်ပစ်လိုက်ပါ။

• 
• 

မြန်မာပြည်မှာ အများဆုံး အစိုက်များတာက ပုဏ္ဏရိပ်ပင်တွေများတယ်။ ပုဏ္ဏရိပ်ပင်ဟာ အကောင်းဆုံး ခြံစည်းရိုးပင်ပါ။ ထောင့်ချိုးမညီတဲ့ မြေကွက်တွေ၊ တြာပီဇီယံပုံ မြေကွက်တွေ၊ ဇလားပုံမြေကွက်တွေကို အထူးရှောင်ရမယ်။ ဖုန်းရွှေကောင်းလာအောင် ယင်၊ ယန်ညှိ ပေးဖို့ သိပ်ခက်ပါတယ်။ ထောင့်မှန်မကျတဲ့ဘက်မှာ ပုဏ္ဏရိပ်ပင်တွေစိုက်ပြီး ယင်၊ ယန်ကို ညှိပေးရတယ်။ အုတ်တံတိုင်းကာထားရင်လည်း အုတ်တံတိုင်းတစ်လျှောက်မှာ ပန်းအိုးလေးတွေစီပြီး အလှစိုက်ထားပါ။ အနားမညီ၊ ပုံစံမမှန်တဲ့ မြေကွက်တွေကတော့ မြို့ပြအိမ်ရာကွက်တွေမှာ တွေ့ခဲ့ပါတယ်။

အနားမညီ၊ ထောင့်မညီ၊ ပုံစံမမှန်တဲ့ မြေကွက်တွေထဲမှာဆိုရင် ရှေ့ကားပြီး နောက်ရှူးသွားတဲ့ မြေကွက်ရယ်၊ ရှေ့ရှူးပြီး နောက်ကို ကားသွားတဲ့ ဇလားပုံလို့ခေါ်တဲ့ တြာပီဇီယံပုံစံမြေကွက်တွေ အတွေ့များတတ်ပါတယ်။ အထူးသဖြင့် အဲသည်မြေကွက်မျိုးတွေက လမ်းထောင့်တွေမှာ ရှိတာများတယ်။

အဲသည်လို ဇလားပုံ အမှောက်မြေကွက်၊ ဇလားပုံအလှန်မြေကွက်တွေမှာ လမ်းကျဉ်ထောင့်လို့ခေါ်တဲ့ အနံသေးသွားတဲ့ဘက်မှာ မီးတိုင်စိုက်ပေးရတယ်။ လျှပ်စစ်ဓာတ်တိုင်တွေ စိုက်ပေးရတယ်။ အုန်းပင်၊ ကွမ်းသီးပင်တွေ စိုက်ရင်လည်း ရပါတယ်။ အလံတိုင်စိုက်ရင်လည်း ရပါတယ်။ ဒါပေမဲ့ လျှပ်စစ်မီးတိုင်ကတော့ အကောင်းဆုံးပါပဲ။

Credit: The Modern