အဆုံးစီရင်သွားသည့် ကမ္ဘာကျော် အော်တာနေးတစ်ကြယ်ပွင့် ကတ်ကိုဘိန်း၏ ဇနီးအမေရိကန်အဆိုတော် ကော့တ်နေးလာ့ဗ်၏ နယူးယောက်နေအိမ် အရောင်းဈေးကွက်ဝင်လာ

မိမိကိုယ်မိမိ သေနတ်ဖြင့်ပစ်ကာ အဆုံးစီရင်သွားသည့် ကမ္ဘာကျော် အော်တာနေးတစ်ကြယ်ပွင့် ကတ်ကိုဘိန်း၏ ဇနီးအမေရိကန်အဆိုတော် ကော့တ်နေးလာ့ဗ်၏ နယူးယောက်နေအိမ် အရောင်းဈေးကွက်ဝင်လာသည်။

ကော့တ်နေးလာ့ဗ်၏ အမည်အပြည့်အစုံမှာ ကော့တ်နေး မီရှဲလ် လာ့ဗ်ဖြစ်ပြီး ၁၉၆၄ ခုနှစ်၊ ဇူလိုင်လ ၉ ရက်တွင် မွေးဖွားကာ အမေရိကန်အဆိုတော်၊ တေးရေး၊ သရုပ်ဆောင်တစ်ဦး ဖြစ်သည်။

၁၉၈၉ ခုနှစ်တွင် The Leaving Trains အဖွဲ့၏ ရှေ့ထွက်အဆိုတော် ဂျိမ်းစ် မိုးရ်လန်းနှင့် လာ့စ်ဗီးဂပ်တွင် လက်ထပ်ခဲ့ပြီးနောက် ထိုနှစ်အတွင်းတွင်ပင် ကွာရှင်းပြတ်စဲခဲ့ကြသည်။

၁၉၉၁ ခုနှစ်တွင် ရော့ခ်ဝိုင်းတစ်ခုဖြစ်သည့် Smashing Pumpkins မှ ဘီလီကော်ဂန်နှင့် ခေတ္တ ချစ်ကျွမ်းဝင်ခဲ့ပြန်သည်။

ကော့တ်နေးလာ့ဗ်၏ အချစ်ရေးတွင် အထင်ရှားဆုံးမှာ အော်တာနေးတစ်ဂီတကို စတင်လမ်းဖောက်ခဲ့သည့် Nirvana အဖွဲ့မှ အဆိုတော် ကတ်ကိုဘိန်းနှင့် အချစ်ရေးဖြစ်သည်။

ကိုဘိန်းနှင့် လာ့ဗ်တို့ မည်သည့်အချိန်တွင် တွေ့ရှိခဲ့သည်ဟူသော ခိုင်မာသည့်မှတ်တမ်းများမရှိဘဲ ရေးသားသူအလိုက် အမျိုးမျိုးကွဲပြားနေသည်။
သတင်းစာဆရာ မိုက်ကယ် အဇာရက်ဒ်၏ ဖော်ပြချက်အရ အော်ရီဂွန်ပြည်နယ်၊ ပို့တ်လန်းမြို့ Satyricon အမည်ရှိ ညကလပ်တစ်ခုတွင် ဆုံစည်းခဲ့ခြင်းဖြစ်သည်ဟု ဆိုသည်။

သို့ရာတွင် ကိုဘိန်း၏ အတ္ထုပ္ပတ္တိရေးသားသူ ချားစ်ခရော့စ်ကမူ ၁၉၉၀ ပြည့်နှစ်၊ ဖေဖော်ဝါရီလ ၁၂ ရက်တွင် ဆုံစည်းခဲ့ခြင်းဖြစ်သည်ဟု ရေးသားထားသည်။
ကိုဘိန်းနှင့် ကော့တ်နေးလာ့ဗ်တို့သည် ၁၉၉၂ ခုနှစ်တွင် လက်ထပ်ခဲ့ကြပြီး ၁၉၉၄ ခုနှစ်၊ ဧပြီလ ၅ ရက်တွင် ကတ်ကိုဘိန်း အဆုံးစီရင်သွားသည်။

ယခုဈေးကွက်ဝင်လာသည့် နေအိမ်မှာ ၁၈၂၆ ခုနှစ်တွင် ဆောက်လုပ်ခဲ့ခြင်းဖြစ်သောကြောင့် နှစ်ပေါင်း ၂၀၀ နီးပါးသက်တမ်းရှိပြီဖြစ်ပြီး ထိုသက်တမ်းအတွင်း ပိုင်ရှင်အနည်းငယ်သာ ပြောင်းလဲဖူးသေးသည်။

ကန်ဒေါ်လာ ၁၁ ဒသမ ၂၅ သန်းဈေးခေါ်ထားပြီး ကြမ်းခင်းဧရိယာ စတုရန်းပေ ၃၀၀၀ ခန့်ရှိကာ အိပ်ခန်း ၃ ခန်း၊ ရေချိုးခန်း ၅ ခန်း ပါဝင်သည်။

မျက်နှာကြက်များမှာ ၁၂ ပေခန့်မြင့်မားပြီး မီးလင်းဖိုနှစ်ခု၊ ဘားတစ်ခုနှင့် ရုံးခန်းတစ်ခန်း ပါဝင်သည်။စတုတ္ထထပ်တွင် master bedroom ပါဝင်ကာ အခန်းတွင်း၌ ထင်းသုံးမီးလင်းဖိုကြီးတစ်ခု ပါဝင်သည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)