ရွှေ ဗဟိုဈေးကွက်နှင့် တန်ဖိုးမြှင့်ကျောက်မျက်ဈေးကွက် တည်ထောင်နိုင်ရေး ပုဂ္ဂလိကကဏ္ဍမှ နိုင်ငံတော်အစိုးရအား အကြံပြု

မြန်မာ့ ရွှေထည်နှင့် ရွှေထည်လက်ဝတ်ရတနာ အရောင်းအဝယ်ကဏ္ဍ တွင် အာမခံစနစ်၊ ဘဏ်စနစ်များ အသုံးပြုနိုင်မှုမရှိခြင်းကြောင့် ယုံကြည်မှုဖြင့်သာလည်ပတ်နေပြီး၊ ထုတ်လုပ်ရောင်းဝယ်မှု ကိန်းဂဏာန်း မရရှိခြင်းကြောင့် မူဝါဒချမှတ်ရာတွင် ခက်ခဲနေကြောင်း ကုန်သည်စက်မှုအသင်းချုပ်၌ ယနေ့ကျင်းပသည့် နိုင်ငံတော် ဒုတိယသမ္မတ ၁ ဦးမြင့်ဆွေနှင့် ပုဂ္ဂလိကကဏ္ဍကိုယ်စားလှယ်များ သတ္တမအကြိမ်တွေ့ဆုံပွဲတွင် မြန်မာနိုင်ငံရွှေလုပ်ငန်းရှင်များအသင်းက နိုင်ငံတော်အစိုးရထံ တင်ပြသည်။

အကျိုးဆက်အနေဖြင့် နိုင်ငံခြားငွေကြေးလဲလှယ်မှု တည်ငြိမ်စေရန် ရွှေလုပ်ငန်းကဏ္ဍမှ ထိန်းညှိရန် ခက်ခဲပြီး၊ ငွေကြေးခဝါချမှုမှလည်း ကာကွယ်ရန် ခက်ခဲကြောင်းနှင့် မြန်မာ့ရွှေလုပ်ငန်းကဏ္ဍ ဖွံ့ဖြိုးတိုးတက်လာရေးအတွက် ဘဏ်များ၊ အာမခံအဖွဲ့အစည်းများ၊ ငွေကြေးအဖွဲ့အစည်းများပါဝင်သော ခိုင်မာပြီး စနစ်ကျသည့် ရွှေ ဗဟိုဈေးကွက်အား တည်ထောင်သင့်ကြောင်း ရွှေလုပ်ငန်းရှင်များအသင်း အတွင်းရေးမှူး ဦးကျော်ဝင်းက တင်ပြခဲ့သည်။

• 

သို့မှသာ လုပ်ငန်းရှင်များ၊ ပြည်သူများအနေဖြင့် အာမခံနှင့်အတူ လွယ်ကူစွာ ရောင်းဝယ်နိုင်မည်ဖြစ်ပြီး ရွှေလုပ်ငန်းကဏ္ဍအနေဖြင့် နိုင်ငံတော်ငွေကြေးတည်ငြိမ်ရေးနှင့် ကုန်သွယ်မှုထိန်းညှိ မြှင့်တင်ရေးအတွက်ပါ များစွာအထောက်အကူ ပြုနိုင်ကြောင်း ၄င်းက အကြံပြုခဲ့သည်။

ရွှေလုပ်ငန်းဆိုင်ရာ အခွန်နှင့် ပတ်သက်၍ ၂၀၁၇ ခုနှစ် အခွန်အကောက်ဥပဒေအရ ရွှေထည် လက်ဝတ်ရတနာမျာအား တံဆပ်ခေါင်းကပ်၍ ကုန်သွယ်လုပ်ငန်းခွန် (၁) ရာခိုင်နှုန်း ကောက်ယူခြင်းမှာ ရန်ကုန်နှင့် မန္တလေးမြို့များတွင် အောင်မြင်နေသော်လည်း၊ ကုန်ကြမ်းဖြစ်သည့် မီးလင်းရွှေတုံးရွှေခဲများ အပေါ် ကုန်သွယ်လုပ်ငန်းခွန် (၅) ရာခိုင်နှုန်းကောက်ယူရန်မှာ ခက်ခဲနေသဖြင့် မှောင်ခိုဈေးကွက်အဖြစ် ပြောင်းလဲသွားနိုင်ကြောင်း ဆက်လက် ပြောကြားခဲ့သည်။

ကျောက်မျက်ကဏ္ဍနှင့် ပတ်သက်၍ မြန်မာနိုင်ငံကျောက်မျက်ရတနာလုပ်ငန်းရှင်များအသင်း ဥက္ကဋ္ဌ ဦးရုံးမူက နိုင်ငံတကာနှင့် ယှဉ်ပြိုင်နိုင်စွမ်းရှိ၍ လွတ်လပ်သော ကျောက်မျက်ဆိုင်ရာ ပို့ကုန် မူဝါဒများ ချမှတ်ပေးရန်နှင့် သွင်းကုန် အကောက်ခွန်နှုန်းထားများ အလွန်မြင့်မားသည့်အတွက် တရားမဝင် လမ်းကြောင်းဖြင့် တင်သွင်းနေမှုများ ကြီးထွားနေသဖြင့် ကုန်သွယ်မှု မူဝါဒနှင့် အညီ အကောက်ခွန် နှုန်းထားများ ပြန်လည်သုံးသပ်ပေးရန် တင်ပြခဲ့သည်။

စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စု ဝန်ကြီး ဦးကျော်ဝင်းက ရွှေလုပ်ငန်းဆိုင်ရာ ကုန်သွယ်လုပ်ငန်းခွန်ပြင်ဆင်ရေးအား ဝန်ကြီးအဖွဲ့အတွင်း ဆွေးနွေးပြီးပြီဖြစ်ပြီး လွှတ်တော်သို့မကြာမီ တင်ပြတော့မည်ဖြစ်ကြောင်း ပြောပါသည်။ ရွှေဗဟိုဈေးကွက် ဖော်ဆောင်ရေးအတွက် ပုဂ္ဂလိက လုပ်ငန်းရှင်များဖက်က စီမံချက်အား တင်ပြပေးရန် ပြည်ထောင်စုဝန်ကြီးက ဖြေကြားခဲ့သည်။

“ရွှေဈေးကွက်ကြီးလိုဘဲ ကျောက်မျက်ရတနာဈေးကွက်ကြီးဖြစ်ဖို့ ပြခန်းလုပ်ပြီးမှ ရောင်းမဲ့အစား တောက်လျှောက်ရောင်းနိုင်အောင်လို့ သက်ဆိုင်ရာ ဝန်ကြီးဌာနတွေနဲ့ ညှိနှိုင်းဆောင်ရွက်သွားပါမယ်၊ ပြည်တွင်းဈေးကွက် လည်းရှိနေရမယ်၊ သင့်တော်တဲ့နေရာမှာ လုံခြုံစိတ်ချမှုလည်း ရှိနေရမယ်၊ ကုန်ကြမ်းကို မိမိတို့တိုင်းပြည်မှာပဲ အချောထည်ပြန်လုပ်ရင် Value Added ဖြစ်သွားပြီ၊ ဒါဆို Export လုပ်မယ်၊ ဒီအတွက် သယံဇာတပြည်ထောင်စု ဝန်ကြီးနှင့် ညှိပါမယ်၊ ရွှေဈေးကွက်အလားတူပဲ ကျောက်မျက်ရတနာ ဈေးကွက်တွေရရှိအောင် အကောင်အထည်ဖော်ပါမယ်” ဟု ပြည်ထောင်စုဝန်ကြီးက ဆက်လက်ဖြေကြားခဲ့ သည်။

Credit: SFJ Strategy First