လက်ပွားမင်းသားဟု လူသိများသော ဘောလိဝုဒ်ကြယ်ပွင့် ရီသစ်ရိုရှန်နှင့် ဖခင်ဖြစ်သူ ရုပ်ရှင်ဒါရိုက်တာ ရာကက်ရှ် ရိုရှန်တို့က မွမ်ဘိုင်းမှ တိုက်ခန်း ၃ ခန်းကို ရောင်းချ

မြန်မာပရိသတ်များအကြား လက်ပွားမင်းသားဟု လူသိများသော ဘောလိဝုဒ်ကြယ်ပွင့် ရီသစ် ရိုရှန်နှင့် ၎င်း၏ ဖခင် ရုပ်ရှင်ဒါရိုက်တာ ရာကက်ရှ် ရိုရှန်တို့သည် မွမ်ဘိုင်းမြို့၊ အန်ဒီရီအရပ်တွင် ၎င်းတို့ပိုင်ဆိုင်ထားသော တိုက်ခန်း ၃ ခုကို မကြာသေးမီက ရောင်းထုတ်ခဲ့ကြောင်း SquareYards သတင်းဌာနက ကြည့်ရှုခွင့်ရခဲ့သော အိမ်ခြံမြေမှတ်ပုံတင်စာရွက်စာတမ်းများအရ သိရသည်။

ဖခင်ဖြစ်သူ ရာကက်ရှ် ရိုရှန်မှာ ရုပ်ရှင်သရုပ်ဆောင်အဖြစ် ဇာတ်ကားပေါင်း ၈၄ ကားတွင် ပါဝင်ခဲ့ဖူးပြီး နောက်ပိုင်းတွင် ရုပ်ရှင်ထုတ်လုပ်သူ၊ ရုပ်ရှင်ဒါရိုက်တာ ၊ ဇာတ်ညွှန်းရေး ဆရာအဖြစ် လုပ်ကိုင်သည်။

ထူးခြားသည်မှာ ရာကက်ရှ် ရိုရှန်သည် ၎င်းရိုက်ကူးခဲ့သော ရုပ်ရှင်များအနက် အင်္ဂလိပ်အက္ခရာ K ဖြင့် စသော ဇာတ်ကားများမှာ နာမည်ကြီးခဲ့ခြင်း ဖြစ်သည်။

စာရွက်စာတမ်းများတွင် ဖော်ပြချက်အရ ရီသစ်ရိုရှန်တို့ သားအဖ ရောင်းထုတ်လိုက်သော အခန်း ၃ ခန်းမှာ စတုရန်းပေ ၂၀၀၀ နီးပါးရှိပြီး အဆောက်အအုံ ၂ ခုတွင် တည်ရှိကြောင်း သိရသည်။

(ဆက်စပ်သတင်း)

ချစ်သူသစ်နှင့် တွဲနေသူ ဘောလိဝုဒ်ကြယ်ပွင့် ရီသစ်ရိုရှန်၏ စံအိမ်

https://www.iMyanmarHouse.com/news/read/1025925

ပထမအခန်းမှာ ဖခင်ဖြစ်သူ ရာကက်ရှ် ရိုရှန်ပိုင်သောအခန်းဖြစ်ပြီး Veejays Niwas CHS Limited ဟုအမည်ရသော အဆောက်အအုံတွင် တည်ရှိကာ အကျယ်အဝန်း စတုရန်းပေ ၁၀၂၅ ရှိသည်။

ထိုအခန်းကို ရူပီး ၃ ဒသမ ၇၅ ကုဋေဖြင့် ဆိုနာလိ အဂျေးမရား ဆိုသူထံ ရောင်းချခဲ့ခြင်းဖြစ်ပြီး အခန်းအတွက် ကားပါကင် ၂ နေရာစာ ပါဝင်သည်။

ထိုအရောင်းအဝယ်တွင် တံဆိပ်ခေါင်းခွန် ရူပီး ၁၈ ဒသမ ၇၅ သိန်းနှင့် မှတ်ပုံတင်ကြေး ရူပီး ၃၀,၀၀၀ ပေးခဲ့ရကြောင်း အိမ်ခြံမြေမှတ်တမ်းများတွင် ဖော်ပြသည်။

ဒုတိယအခန်းမှာလည်း ရာကက်ရှ် ရိုရှန်၏ အခန်းပင်ဖြစ်ပြီး မွမ်ဘိုင်းမြို့၊ Andheri West လမ်းမှ Raheja Classique အမည်ရှိ အဆောက်အအုံတွင် တည်ရှိသည်။

အခန်းအကျယ် ၆၂၅ စတုရန်းပေရှိပြီး ရူပီး ၂ ဒသမ ၂ ကုဋေဖြင့် ဂျီဗန် ဘာဗာနာနီ၊ ရှီလ်ပါ ဝါဒဝါနီနှင့် ဂေါရဗ် ဝါဒဝါနီဆိုသူ ၃ ဦးထံ ရောင်းချခဲ့ခြင်း ဖြစ်သည်။

ထိုအခန်း အရောင်းအဝယ်တွင် တံဆိပ်ခေါင်းခွန် ရူပီး ၁၃ ဒသမ ၂ သိန်းနှင့် မှတ်ပုံတင်ကြေး ရူပီး ၃၀,၀၀၀ ပေးရသည်။

တတိယအခန်းမှာမူ ရီသစ် ရိုရှန်၏ အခန်းဖြစ်သည်။

ထိုအခန်းမှာ ရာကက်ရှ်ရိုရှန်၏ ဒုတိယအခန်းတည်ရှိသည့် အဆောက်အအုံတွင်ပင် ဖြစ်သည်။

ဝယ်ယူသွားသော ဝယ်လက်မှာလည်း ဒုတိယအခန်းကို ဝယ်ယူသွားသူများပင်ဖြစ်ပြီး ရူပီး သိန်း ၈၀ ဖြင့် ဈေးတည့်သွားသည်။

ယင်းအခန်းအတွက်မူ တံဆိပ်ခေါင်းခွန်ကြေး ရူပီး ၄ ဒသမ ၈ သိန်းနှင့် မှတ်ပုံတင်ကြေး ရူပီး ၃၀,၀၀၀ သာ ပေးရသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Hrithik Roshan, Rakesh Roshan sell their three Mumbai apartments due to…, new owners are…