ပင်စင်စားများအတွက် မြေကွက်များ ရောင်းချပေးမည့် အစီအစဉ် မရှိကြောင်း ရန်ကုန်တိုင်းဒေသကြီး အစိုးရအဖွဲ့ ပြောကြား

ရန်ကုန်တိုင်းဒေသကြီး အစိုးရအဖွဲ့က အငြိမ်းစားယူခဲ့သည့် ပင်စင်စားဝန်ထမ်းများအတွက် မြေကွက်များ ရောင်းချပေးမည်ဟုဆိုကာ ရန်ကုန်စာတိုက်ကြီးမှတစ်ဆင့် နေ့စဉ်လာရောက် လျှောက်ထားသည့် ပင်စင်စား အများအပြား ရှိနေကြောင်း ယင်းသို့ လျှောက်လွှာများကို အချို့မြို့နယ် ရပ်ကွက်များတွင်ပါ မိတ္တူများ ဆွဲ၍ ရောင်းချနေမှုများ ရှိနေရာ ထိုသို့ ပင်စင်စားများအတွက် မြေကွက်များ ရောင်းချပေးမည်မှာ ဟုတ်ပါသလားဟု ရန်ကုန်တိုင်းဒေသကြီး အစိုးရအဖွဲ့သို့ ဆက်သွယ်မေးမြန်းရာ ရန်ကုန်တိုင်းဒေသကြီး အစိုးရအဖွဲ့က ယင်းသို့ ရောင်းချပေးမည် မဟုတ်ကြောင်း ရန်ကုန်တိုင်းဒေသကြီး အစိုးရအဖွဲ့မှ တာဝန်ရှိသူတစ်ဦးက ပြန်လည် ဖြေကြားသည်။

• 
• 

သို့သော် ပင်စင်စားများ အနေဖြင့် နေထိုင်ရန် အခက်အခဲများ ရှိနေသဖြင့် ရလိုရငြား မျှော်လင့်ချက်များဖြင့် လာရောက် လျှောက်ထားနေကြခြင်းဖြစ်ကြောင်း၊ အချို့မှာ ရန်ကုန်မြို့စွန် နေရာများမှပင် လာရောက် လျှောက်ထားကြခြင်း ဖြစ်သည်ဟု လာရောက်လျှောက်ထားသူ အချို့က ဆိုသည်။

ထို့ပြင် ပြီးခဲ့သည့် ၂၀၁၅ ခုနှစ် ဒီဇင်ဘာလ အတွင်းကလည်း ရန်ကုန်တိုင်းဒေသကြီး အစိုးရအဖွဲ့က စစ်မှုထမ်းဟောင်းများ၊ ပင်စင်စားများအတွက် မြေကွက်များတိုက်ခန်းများ ချပေးမည်ဆိုသည့် သတင်းများ ပျံ့နှံ့ခဲ့ပြီး ရန်ကုန်တိုင်းဒေသကြီး အစိုးရအဖွဲ့ရုံးသို့ လာရောက်လျှောက်ထားသူ စစ်မှုထမ်းဟောင်း၊ ပင်စင်စား သောင်းဂဏန်းအထိ ရှိခဲ့သည်။

ထိုအချိန်က ရန်ကုန်တိုင်းဒေသကြီး အစိုးရအဖွဲ့ အစီအစဉ်ဖြင့် ရွှေပြည်သာရှိ တန်ဖိုးနည်းအိမ်ရာ အခန်းများကို အနည်းဆုံး ကျပ် ၁၀၉ သိန်းဖြင့် ရောင်းချမည်ဟု အစိုးရသတင်းစာများမှတစ်ဆင့် ကြေညာခဲ့ခြင်းဖြစ်ပြီး မြေကွက်များရောင်းချပေးရန် ကြေညာခဲ့ခြင်းမရှိကြောင်း၊ သို့သော် ရန်ကုန် တိုင်းဒေသကြီးအစိုးရအဖွဲ့က စစ်မှုထမ်း ဟောင်းများ၊ ပင်စင်စားများအတွက် မြေကွက်များ တိုက်ခန်းများ ချပေးမည်ဟုဆိုကာ သတင်းများ ပျံ့နှံ့ခဲ့ခြင်းဖြစ်ပြီး လာရောက် လျှောက်ထားသူ သောင်းနှင့်ချီ၍ ရှိခဲ့ခြင်းကြောင့် ရှင်းပြ၍ မရတော့ဘဲ လျှောက်လွှာများကို လက်ခံခဲ့ရကြောင်း ယင်းအချိန်က ရန်ကုန်တိုင်းဒေသကြီး အစိုးရအဖွဲ့က ပြန်လည် ရှင်းလင်းခဲ့သည်။

Credit: ElevenMediaGroupa