အိန္ဒိယတွင် လယ်သမားတစ်ဦးက မိုးဦးတဖြိုက်ကျအပြီး လယ်ကွင်းထဲသို့ ဆင်းခဲ့ရာ စိန်ကြီးတစ်ပွင့် ရှာတွေ့ခဲ့အပြီး တစ်ရွာလုံး အုံးအုံးကြွက်ကြွက်ဖြစ်ကာ လယ်ထဲတွင် စိန်ရှာပွဲကြီး အလုအယက်လုပ်နေကြပုံ

အိန္ဒိယ၏ အချို့သောပြည်နယ်များမှာ အလွန်မိုးခေါင်သည်။

ပူပြင်းလှသော နွေအကုန် မိုးတဖြိုက်ကျလာခြင်းသည် လယ်သမားတို့၏ သောကအပူမီးများကို ငြိမ်းအေးစေခြင်းလည်း ဖြစ်သည်။

အိန္ဒိယနိုင်ငံ၊ အန်ဒရာ ပရာဒက်ရှ်ပြည်နယ်၊ ကာနူးလ်ခရိုင်၊ ပါတိကွန်ဒါမြို့၊ ဂျိုနာဂီရိကျေးရွာတွင် မိုးစတင်ရွာသွန်းခဲ့ပြီး မြေပျော့လာချိန်၌ မြေအောက်မှ ပစ္စည်းများ ထွက်ပေါ်လာရာ လယ်သမားကြီးတစ်ဦးမှာ သူ၏ လယ်ထဲတွင် စိန်တစ်ပွင့် တွေ့ရှိခဲ့သည်။

ထိုသို့ လယ်ထဲတွင် စိန်တွေ့ခြင်းကြောင့် အနီးဝန်းကျင် ကျေးရွာများမှ ရွာသားများသည် ဂျိုနာဂီရိသို့ ရောက်လာကြပြီး အနီးဝန်းကျင်လယ်များတွင် အလုအယက် စိန်ရှာလျက်ရှိနေသည်။

ကာနူးလ်ခရိုင်သည် ရှေးယခင်ကတည်းမှသည် လက်ရှိအချိန်အထိ ရွှေထွက်ရှိသော ရွှေတောဖြစ်သည်။

ထို့အပြင် ဂျိုနာဂီရိမှာ ဘူမိဗေဒဖွဲ့စည်းပုံကြောင့် စိန်များ မကြာခဏ ရှာတွေ့လေ့ရှိသော ရွာကလေးတစ်ခုအဖြစ် နာမည်ကြီးသည်။

HansIndia သတင်းဌာန၏ ဖော်ပြချက်အရ ဂျိုနာဂီရိကျေးရွာမှ လယ်သမားကြီးတစ်ဦးသည် မိုးဦးတဖြိုက်ကျလာပြီးနောက် စတင်လယ်ထွန်နေချိန်တွင် စိန်တစ်ပွင့် ရှာတွေ့ခဲ့ခြင်းဖြစ်သည်ဟု ဆိုသည်။

လယ်သမားကြီးက ဒေသခံ ရတနာကုန်သည်တစ်ဦးထံ ရူပီး ၁၅၀,၀၀၀ ဖြင့် ရောင်းချလိုက်သည်။

ထိုငွေပမာဏမှာ တောသူတောင်သားတို့အတွက် များပြားလှသော ငွေပမာဏလည်း ဖြစ်သည်။

ဒေသခံတစ်ဦး ပြောပြချက်အရ ကျေးလက်တောရွာသားများစွာမှာ တမိသားစုလုံးကို ခေါ်လာကာ လယ်ကွင်းများထဲတွင် တနေကုန် တူးဆွရှာဖွေလျက်ရှိသည်ဟု ဆိုသည်။

“ကလေးသူငယ်တွေတောင် ကူရှာပေးကြတယ်” ဟု စိန်ရှာပွဲကြီးကို ကြည့်ရှုလေ့လာခဲ့သူတစ်ဦးက ပြောပြသည်။

၎င်းတို့သည် လယ်တောတခွင် ရက်ပေါင်းများစွာ နေထိုင်ရှာဖွေကြခြင်းဖြစ်ပြီး စားသောက်ဖွယ် အလုံအလောက် ယူဆောင်လာကြသည်။

“တချို့ မိဘတွေက လမ်းလျှောက်စ အရွယ်လေးတွေတောင် ခေါ်လာကြတယ်။ နည်းနည်းကြီးတဲ့ ကလေးတွေက ကူရှာပေးကြတယ်” ဟု ဒေသခံတစ်ဦးက ပြောသည်။

ထိုဒေသတွင် တန်ဖိုးကြီး ကျောက်သံပတ္တမြားများ မကြာခဏ ရှာတွေ့လေ့ရှိခဲ့ပြီး ယခုတွေ့ရှိလိုက်မှုကြောင့် ကျောက်မျက်ရတနာ ရှာလိုစိတ်များ မီးရှို့ပေးလိုက်သကဲ့သို့ ဖြစ်စေသည်။

ကျွမ်းကျင်ပညာရှင်တို့က သတိပေးသည်မှာမူ ဤဒေသတွင် ယခင်ကလည်း စိန်များရှာတွေ့ခဲ့ဖူးသည် ဆိုသော်လည်း ရှားပါးဖြစ်စဉ်သာဖြစ်ပြီး မည်သို့မှ မှန်းဆ၍ မရနိုင်သည့်အကြောင်းရပ် ဖြစ်ကြောင်း ပြောသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Farmer finds a diamond after the first rain in field, causes a treasure hunting frenzy for locals