အိမ်ဆောက်တဲ့အခါ ဘယ်နေ့နံသားက ပန္နက်ရိုက်ရမလဲ.....

မြန်မာ့ရိုးရာထုံးတမ်းအစဥ်အလာအရကတော့....ပန္နက်ရိုက်တာကို ပန္နက်တော်တင်မင်္ဂလာလို့လဲ ခေါ်ကြတယ်။ စေတီ၊ ပုထိုး၊ သိမ်၊ တန်ဆောင်၊ ဇရပ်၊ ဘုန်းတော်ကြီးကျောင်း၊ နန်းတော်၊ မြို့ရိုး၊ ခံတပ်၊ စစ်သူကြီးနေအိမ်၊ မူးမတ်ကြီးနေအိမ်၊ သူကြွယ်သူဌေးနေအိမ်၊ မင်းမှုထမ်းနေအိမ်တွေ ဆောက်လုပ်ဖို့အတွက် "ပန္နက်တော်မင်္ဂလာလို့ခေါ်တဲ့ "တွင်းတော်ဝန်မင်္ဂလာ" ပြုလုပ်ပုံလို့ခေါ်ကြတယ်။

ပန္နက်ရိုက်တဲ့အခါ နက္ခတ် ပညာရပ်တွေနဲ့ တွက်ချက်ပြီး ကြားနိမိတ်၊ မြင်နိမိတ်တွေကို ယူပြီး ပန္နက်တော်တင်မင်္ဂလာပြုလုပ်ပုံတွေက သိပ်ကိုနက်နဲပါတယ်။ မြန်မာ့ရိုးရာ ထုံးတမ်းစဥ်လာနည်းပညာတွေရဲ့ အတိမ်အနက်ကို ဆောက်လုပ်ရေးလုပ်ငန်းတွေမှာ အသုံးချဖို့ဆိုရင် အရပ်ထုံးလောက်ပဲသိထားရင် ရပါပြီ

အဓိကမှတ်ထားရမှာက နေ့သား၊ နံသားအလိုက် ပန္နက်ရိုက်ပုံလောက်သိရင် ရပါပြီ။

~တနင်္ဂနွေသားသမီးအိမ်ဆောက်ရင်...

ကြာသပတေးသားကကြိုးရင်းကိုင်ပြီး သောကြာသားက ကြိုးဖျားကိုင်ရမယ်။ ပန္နက်တံက အင်သား၊ ပန္နက်ရိုက်မဲ့တုတ်က ကံ့ကော်သားဖြစ်ရမယ်။

(စနေသားက ပန္နက်ရိုက်ရမယ်)

~တနင်္လာသားသမီးအိမ်ဆောက်ရင်... သောကြာသားကကြိုးရင်းကို ကိုင်ပြီး စနေသားကကြိုးဖျားကိုင်ရမယ်။ ပန္နက်တံက ကံ့ကော်သား၊ ရိုက်မဲ့တုတ်က ဇီးသားဖြစ်ရမယ်။

(တနင်္ဂနွေသားက ပန္နက်ရိုက်ရမယ်)

~အင်္ဂါသားသမီးအိမ်ဆောက်ရင်...

စနေသားက ကြိုးရင်းကိုကိုင်ပြီး တနင်္ဂနွေသားက ကြိုးဖျားကိုကိုင်ရမယ်။ ပန္နက်တံက ဇီးသား၊ ပန္နက်ရိုက်မဲ့တုတ်က ဝါးရင်းသားဖြစ်ရမယ်။

(တနင်္လာသားက ပန္နက်ရိုက်ရမယ်)

~ဗုဒ္ဓဟူးသားသမီးအိမ်ဆောက်ရင်...

တနင်္ဂနွေသားက ကြိုးရင်းကိုကိုင်ပြီး တနင်္လာသားက ကြိုးဖျားကိုကိုင်ရမယ်။ ပန္နက်တံက ဝါးရင်းသား၊ ပန္နက်ရိုက်မဲ့တုတ်က သပြေသားဖြစ်ရမယ်။

(အင်္ဂါသားက ပန္နက်ရိုက်ရမယ်)

~ကြာသပတေးသားသမီးအိမ်ဆောက်ရင်...

တနင်္လာသားက ကြိုးရင်း ကိုင်ပြီး အင်္ဂါသားက ကြိုးဖျားကိုင်ရမယ်။ ပန္နက်တံက သပြေသား၊ ပန္နက်ရိုက်မဲ့တုတ်က သိဟိုဠ်သားဖြစ်ရမယ်။

(ဗုဒ္ဓဟူးသားက ပန္နက်ရိုက်ရမယ်)

~သောကြာသားသမီးအိမ်ဆောက်ရင်

အင်္ဂါသားက ကြိုးရင်းကိုင်ပြီး ဗုဒ္ဓဟူးသားက ကြိုးဖျားကိုင်ရမယ်။ ပန္နက်တံက သိဟိုဠ်သား၊ ပန္နက်ရိုက်မဲ့ တုတ်က ထန်းသားဖြစ်ရမယ်။

(ကြာသပတေးသားက ပန္နက်ရိုက်ရမယ်)

~စနေသားသမီးအိမ်ဆောက်ရင်...

ဗုဒ္ဓဟူးသားက ကြိုးရင်းကိုင်ပြီး၊ ကြာသပတေးသားက ကြိုးဖျားကိုင်ရမယ်။ ပန္နက်တံက ထန်းသား၊ ပန္နက်ရိုက်မဲ့တုတ်က အုန်းသား၊ အင်သားဖြစ်ရမယ်။

(သောကြာသားက ပန္နက်ရိုက်ရမယ်)

နေ့နံတွေကွဲသွားတာက အိမ်ဆောက်မဲ့သူရဲ့ နေ့နံကိုမူတည်ပြီး ပဥ္စပွတ်၊ ဆပွတ်၊ အမြစ်၊ အညွန့်ဖြစ်တဲ့ နေ့နံသားနဲ့ ပန္နက်တံ၊ ပန္နက်ရိုက်တုတ်တွေကိုဟရွေးသွားခြင်းပါ

မြန်မာ့ရိုးရာ ထုံးတမ်းအစဥ်အလာအရကတော့ ပန္နက်ရိုက်ရမဲ့နေ့တွေကို သောမနနေ့ရက်တွေဖြစ်တဲ့ ဗုဒ္ဓဟူး၊ ကြာသပတေး၊ သောကြာနေ့တွေဖြစ်ရမယ်။

ရက်ရာဇာ သို့မဟုတ် အမြိတ္တစုတ်ရက်တွေနဲ့လည်း တိုက်ရမယ်လို့ ရေးသားဖော်ပြထားကြပါတယ်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

original writer - ကိုဝင်းဇော်(သစ်တော)