တရုတ်ပြည် ရှန်ကျန်းအခြေစိုက် developer က တရုတ်ပြည်တွင် အမြင့်မားဆုံး မိုးမျှော်တိုက်ကြီး ဆောက်လုပ်ရန် စီစဉ်

တရုတ်ပြည် ရှန်ကျန်းအခြေစိုက် developer ဖြစ်သော Shenzhen Kingkey Group က တရုတ်ပြည်တွင် အမြင့်မားဆုံး မိုးမျှော်တိုက်ကြီးတစ်ခု ဆောက်လုပ်ရန် စီစဉ်လျက်ရှိသည်။

H700 shenzhen tower ဟု အမည်ပေးထားပြီး အမြင့် ၇၃၉ မီတာ ( ၂၄၂၅ ပေ) ရှိမည်ဖြစ်ပြီး ရှန်ကျန်းမြို့ ၏ စီးပွားရေးအချက်အခြာဒေသ အဝင်တွင် တည်ရှိမည်ဖြစ်သည်။

လက်ရှိအားဖြင့် တရုတ်ပြည်၏ အမြင့်မားဆုံးမိုးမျှော်တိုက်မှာ gensler မှ ဒီဇိုင်းရေးဆွဲ ဆောက်လုပ်ခဲ့သည့် ရှန်ဟိုင်းတာဝါဖြစ်ပြီး ၆၃၂ မီတာ ( ၂၀၇၃ ပေ ) မြင့်မားသည်။

H700 shenzhen tower ကို ချီကာဂိုနှင့် ရှန်ဟိုင်းတို့တွင် အခြေစိုက်သော bKL ဗိသုကာအဖွဲ့က ဒီဇိုင်းရေးဆွဲပေးခဲ့ခြင်းဖြစ်ကာ ဟောင်ကောင်မှ ရှန်ကျန်းသို့ အဝင်ဖြစ်သော လိုဟူခရိုင်တွင် တည်ရှိမည်ဖြစ်သည်။

Huanyu Building အမည်ရှိ အဆောက်အအုံကြီးနေရာတွင် အစားထိုးတည်ဆောက်သွားမည်ဖြစ်ပြီး ယခုစီမံကိန်းနှင့် မျက်နှာချင်းဆိုင်လမ်းဘက်တွင်လည်း Jindu ဟိုတယ်နေရာတွင် ၆၈၀ မီတာအမြင့်ရှိ မိုးမျှော်တိုက်ကြီးတစ်လုံး ဆောက်လုပ်ရန် စီစဉ်နေမှုများ ရှိသည်။

အဆောက်အအုံကြီး ၂ ခုအကြားရှိ ရှန်းနန်လမ်းမကြီးကို မိုးပျံလမ်းတစ်ခုဖြင့် ဖြတ်သန်းကာ အဆောက်အအုံ ၂ လုံးတို့ကို ဆက်သွယ်ပေးထားမည်ဟုလည်း ဆိုသည်။

ပါဝင်မည့် အထပ်ပေါင်းမှာ အထပ်ရေ ၁၃၀ ခန့်အထိဖြစ်သည်ဟုလည်း ဆိုသည်။

ဆောက်လုပ်ပြီးစီးပါက ကမ္ဘာပေါ်တွင် ဒုတိယအမြင့်မားဆုံး မိုးမျှော်တိုက်ကြီးဖြစ်လာမည် ဖြစ်သည်။

စီမံကိန်းတည်ရှိရာနေရာမှာ ရှန်ကျန်း၏ ဝေါစထရိဟုတင်စားကြသော ကိုင်ဝူဝေအရပ်တွင်တည်ရှိသည်။

အဆိုပါအရပ်သည် ဘဏ်လုပ်ငန်း ၇၄ ရာခိုင်နှုန်း၊ အာမခံကုမ္ပဏီများ၏ ၈၀ ရာခိုင်နှုန်း၊ စတော့ရှယ်ယာများဆိုင်ရာ အင်စတီကျူးရှင်းများ၏ ၄၀ ရာခိုင်နှုန်း အခြေစိုက်ရာဒေသဖြစ်ပြီး နိုင်ငံခြားဘဏ်များ၏ ၉၀ ရာခိုင်နှုန်းမှာလည်း ယင်းဒေသတွင်ပင် အခြေစိုက်ထားသည်။


Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)