ကမ္ဘာ့အမြင့်ဆုံးဆိုလာတာဝါပါဝင်သော ကမ္ဘာ့အကြီးဆုံးနေရောင်ခြည်စွမ်းအင် ဥယျာဉ် ဒူဘိုင်းတွင် ပေါ်ပေါက်လာတော့မည်

ယူအေအီးနိုင်ငံ ဒူဘိုင်းမြို့အစိုးရ၏ အမေရိကန်ဒေါ်လာ ၁၃ ဒသမ ၆ ဘီလျံတန် Mohammed bin Rashid နေရောင်ခြည်စွမ်းအင်ဥယျာဉ်စီမံကိန်း
အကောင်အထည်ဖော်မှုသည် စတုတ္ထအဆင့်သို့ ရောက်ရှိနေပြီဖြစ်ကြောင်း သိရသည်။

ကမ္ဘာ့အကြီးဆုံးနှင့် တစ်နေရာတည်းသော နေရောင်ခြည်စွမ်းအင်ဥယျာဉ်ဟု တင်စားထားသည့် ၎င်းစီမံကိန်း၏စတုတ္ထအဆင့်ဆောက်လုပ်ဆောင်ရွက်မှုအား ယူအေအီးဒုတိယသမ္မတနှင့် ၀န်ကြီးချုပ်နှင့် ဒူဘိုင်းအစိုးရမင်းဖြစ်သော ရှိတ်ခ်မိုဟာမက်ဘင်ရာရှစ်အယ်လ်မာတွမ်က ပြီးခဲ့သည့်တနင်္လာ (မတ် ၁၉) က ဖွင့်လှစ်ပေးခဲ့သည်။

လျှပ်စစ်ထပ်အား ၇၀၀ မဂ္ဂါဝပ် ထုတ်လုပ်နိုင်မည့် ၄၃ စတုရန်းကီလိုမီတာ ကျယ်ဝန်းသော ၎င်းဆိုလာဥယျာဉ်သည် Concentrated Solar Power (CSP) တွင် ကမ္ဘာ့အကြီးဆုံးရင်းနှီးမြှုပ်နှံမှု ဖြစ်လာပြီး နေအိမ်ပေါင်း ၂၇၀,၀၀၀ ကို ပြည်လည်ပြည့်ဖြိုးမြဲစွမ်းအင် ပံ့ပိုးပေးမည်ဖြစ်သည်။

စီမံကိန်းအဆင့်သစ်ဆောက်လုပ်မှုကို လေးနှစ်အတွင်း စီစဉ်သွားမည်ဖြစ်ကာ ဥယျာဉ်တည်ဆောက်ပြီးစီးခါနီးတွင် မီတာ ၂၆၀ မြင့်မည့် ကမ္ဘာ့အမြင့်ဆုံး ဆိုလာတာဝါတစ်ခုလည်း ထည့်သွင်းတည်ဆောက်မည် ဖြစ်ကြောင်း သိရသည်။

"နေရောင်ခြည်စွမ်းအင်ထုတ်လုပ်မှုမှာ ဒူဘိုင်းက ကမ္ဘာ့ကုန်ကျစရိတ်အနည်းဆုံး ဖြစ်ပါတယ်။ နိုင်ငံတစ်ဝန်းအသုံးပြုတဲ့ စုစုပေါင်းလျှပ်စစ်ဓာတ်အား ၇၅ ရာခိုင်နှုန်းကို သန့်စင်စွမ်းအင်ကနေ ၂၀၅၀ ပြည့်နှစ်မကုန်မီ ရယူသုံးစွဲနိုင်ဖို့ ရည်ရွယ်ထားပါတယ်" ဟု ရှိတ်ခ်မိုဟာမက်က လူမှုကွန်ရက်တစ်ခုဖြစ်သော Twitter တွင် ရေးသားခဲ့သည်။

Mohammed bin Rashid နေရောင်ခြည်စွမ်းအင်သုံးဥယျာဉ်သည် နှစ်စဉ် ကာဗွန်ဒိုင်အောက်ဆိုက်ဒ်ထုတ်လွှတ်မှု၏ တန်ချိန် ၆ ဒသမ ၅ သန်းကို လျှော့ချရန် ရည်ရွယ်သည်။ ၂၀၃၀ ပြည့်နှစ်မကုန်မီ လျှပ်စစ်ဓာတ်အား ၅,၀၀၀ မဂ္ဂါဝပ် ထုတ်လုပ်ရန် သို့မဟုတ် နေအိမ်ပေါင်း ၈ သိန်းခန့်ကို ဓာတ်အား လုံလုံလောက်လောက်ပေးရန် ရည်ရွယ်ထားသည်။

ယင်းဥယျာဉ်စီမံကိန်းသည် ဒူဘိုင်း၏ ရုပ်ကြွင်းလောင်စာစွမ်းအင်အသုံးပြုမှုကို လျှော့ချရန် ရည်ရွယ်သော ငါးနှစ်တာ-သန့်စင်စွမ်းအင်အစီအစဉ်၏ တစ်စိတ်တစ်ပိုင်းဖြစ်ကြောင်း သိရသည်။

ခင်အေးချမ်း မှ iMyanmarHouse.com (အိုင်မြန်မာဟောက်စ်ဒေါ့ကွန်း) အတွက် အထူးဘာသာပြန် ရေးသားဖော်ပြသည်။
Credit: iMyanmarHouse.com