ကမ္ဘာကျော်ရုပ်ရှင်ဒါရိုက်တာကြီး စတီဗင် စပီးလ်ဘတ်၏ သရဲခြောက်သောနေအိမ် (ကမ္ဘာကျော်တို့၏ သရဲခြောက်သော နေအိမ်များ)

အော်စကာဆုရှင် ဟောလိဝုဒ် ဂန္ထဝင် ရုပ်ရှင်မင်းသမီးကြီး မဲရဲလ် စထရိက ဒါရိုက်တာကြီး စတီဗင် စပီးလ်ဘတ်၏ နေအိမ်သရဲခြောက်သောကြောင့် မကောင်းဆိုးဝါးနှိမ်နင်းနိုင်မည့်သူ ရှာဖွေပေးခဲ့ရသည်ဟု indiatimes သတင်းတစ်ရပ်တွင် ဖော်ပြသည်။

အကယ်၍ သင့်အနေဖြင့် တစ္ဆေသရဲ မကောင်းဆိုးဝါးများ နှင်ထုတ်လိုပါက မဲရဲစထရိထံတွင် အကြံတောင်းပါက သင့်အတွက် တန်ဖိုးရှိမည့် လမ်းညွှန်ချက်များ ပေးနိုင်မည် အမှန်ပင် ဖြစ်လေသည်။

အသက် ၆၈ နှစ်ရှိပြီဖြစ်သော မဲရဲစထရိသည် ၂၀၀၁ ခုနှစ်အတွင်း A.I. Artificial Intelligence ဇာတ်ကားတွင် စတီဗင် စပီးဘတ်နှင့် လက်တွဲရိုက်ကူးခဲ့ဖူးသည်။

“A.I., ဇာတ်ကားရိုက်နေတုန်းက သူ့နေအိမ်ဘယ်လို သရဲခြောက်တယ်ဆိုတဲ့အကြောင်း ပြောဖြစ်ကြတယ်။ ကျွန်မကို သူကမေးတယ်။ မကောင်းဆိုးဝါးတွေ နှင်နိုင်တဲ့သူမျိုး မရှိဘူးလားပေါ့။ ကျွန်မလည်း ရှိပါတယ်လို့ပြောလိုက်တယ်။ ဒီလိုနဲ့ သူ့ဆီကို ဘုန်းတော်ကြီးတစ်ပါး လွှတ်ပေးလိုက်တာဖြစ်ပါတယ်။ အခုတော့ မကောင်းဆိုးဝါးတွေ ရှင်းလင်းသွားပါပြီ” ဟု မဲရဲ စထရိက ပြန်လည်ပြောပြသည်။

အတည်ပြုနိုင်သည့်သတင်းမဟုတ်သော်လည်း သတင်းထွက်လာသည်ကား စပီးဘတ်၏နေအိမ်မှ တစ္ဆေကိုနှင်ထုတ်ပေးခဲ့သူ၏ အမည်မှာ ဘီလ် မာရေးဖြစ်သည်ဟု ဆိုကြသည်။

စပီးဘတ်မတိုင်မီ အဆိုပါနေအိမ်တွင် နေထိုင်ခဲ့သူများ ခြောက်လှန့်ခံရခြင်းရှိ၊ မရှိဟူသည်မှာ စိတ်ဝင်စားဖွယ် မေးခွန်းတစ်ခု ဖြစ်၏။
စပီးဘတ်၏ ယခုနေအိမ်ကို မြေထဲပင်လယ်ဗိသုကာဟန်ဖြင့် ဆောက်လုပ်ထားပြီး ကယ်လီဖိုးနီးယားပြည်နယ်၊ လော့စ်အိန်ဂျလိမြို့၊ ပစိဖိတ် ပါလစ်ဆိတ်အရပ်တွင် တည်ရှိသည်။

မူလက စပိန်ဗိသုကာဟန်ဖြစ်ပြီး ၁၉၈၀ ပြည့်လွန်ကာလများအတွင်း စပီးဘတ်က ဝယ်ယူခဲ့ခြင်းဖြစ်ကာ မိသားစု၏ ပင်မနေအိမ်အဖြစ် အသုံးပြုရန် ဝယ်ယူခဲ့ခြင်း ဖြစ်သည်။

ယင်းနေအိမ်ကို ယခင်က ပိုင်ဆိုင်ခဲ့ဖူးသူများမှာ ဒေါက်ဂလပ် ဖဲရ်ဘန့်ခ် (ဂျူနီယာ)၊ ဒေးဗစ် အို-ဆဲလ်ဇနစ်၊ ကာရီ ဂရန့်နှင့် ဘာဘရာ ဟတ်တန်၊ ဘော်ဘီ ဗင်တန်တို့ ဖြစ်ကြသည်။

“Gone With the Wind ရုပ်ရှင်ဇာတ်ကားကြီး ရိုက်ကူးနေစဉ်ကာလအတွင်း ဒေးဗစ် ဆဲလ်ဇနစ် ဒီမှာနေထိုင်သွားခဲ့ဖူးတယ် ဆိုတဲ့အချက်က ကျွန်တော့်အတွက် အရေးကြီးပါတယ်။ ဒီအိမ်ကြီးမှာ အခြေခံကောင်းတွေရှိနေပါတယ်” ဟု စပီးလ်ဘတ်က ပြောကြားသည်။

စပီးဘတ်၏ အဆိုပါနေအိမ်တွင် ခိုအောင်းနေသည့် ဝိဥာဉ်မှာ တစ်ခုထက်ပိုနိုင်ပြီး ဆဲလ်ဇနစ် (သို့မဟုတ်) ကာရီ ဂရန့်တို့၏ ဝိဥာဉ်များ ဟုတ်၊ မဟုတ် မေးခွန်းထုတ်ဖွယ်ရာလည်း ဖြစ်လေသည်။

မဲရဲစထရိသည် အော်စကာဆုရှင် မင်းသမီးကြီးဖြစ်ပြီး ၁၉၄၉ ခုနှစ်၊ ဇွန်လ ၂၂ ရက်တွင် အမေရိကန်ပြည်ထောင်စု၊ နယူးဂျာစီပြည်နယ်၊ ဆမ်းမစ်မြို့တွင် မွေးဖွားသည်။

မီဒီယာတို့က မဲရဲစထရိကို သူဖြတ်သန်းရာခေတ်၏ အကောင်းဆုံးမင်းသမီးအဖြစ် ဖော်ပြခဲ့ကြသည်။
အော်စကာဆုရှင်အဖြစ် ၂၁ ကြိမ် ဇကာတင်စာရင်းပါဝင်ခဲ့ပြီး အော်စကာဆု ၃ ဆု ရရှိခဲ့သည်။

ပြင်သစ်အစိုးရက ၂၀၀၃ ခုနှစ်တွင် Commander of the Order of Arts and Letters ဆုချီးမြှင့်ခဲ့၏။
သမ္မတအိုဘားမားက မဲရဲစထရိကို ၂၀၁၀ ပြည့်နှစ်တွင် National Medal of Arts ဆုနှင့် ၂၀၁၄ ခုနှစ်တွင် Presidential Medal of Freedom ဆုများ ပေးအပ်ချီးမြှင့်ခဲ့သည်။

မဲရဲစထရိသည် ၁၉၇၉ ခုနှစ်တွင် ရိုက်ကူးထုတ်လုပ်ခဲ့သည့် Kramer vs. Kramer ရုပ်ရှင်ဇာတ်ကားတွင် အကောင်းဆုံးဇာတ်ပို့၊ ၁၉၈၂ ခုနှစ်တွင် ထွက်ရှိသည့် Sophie's Choice ဇာတ်ကားတွင် အကောင်းဆုံးဇာတ်ဆောင်၊ ၂၀၁၁ ခုနှစ်တွင် ထွက်ရှိသည့် The Iron Lady ဇာတ်ကားတွင် အကောင်းဆုံးဇာတ်ဆောင် အော်စကာဆုများ ရရှိခဲ့သည်။

ကမ္ဘာကျော် ရုပ်ရှင်ဒါရိုက်တာကြီး စတီဗင်စပီးလ်ဘတ်ကို ၁၉၄၆ ခုနှစ်၊ ဒီဇင်ဘာလ ၁၈ ရက်တွင် အမေရိကန်ပြည်ထောင်စု၊ အိုဟိုင်းအိုးပြည်နယ်၊ စင်စင်နတီမြို့တွင် မွေးဖွားသည်။

မိခင်ဖြစ်သူ လီယာ (၁၉၂၀၊ ဇန်နဝါရီ ၁၂ ဖွား- ၂၀၁၇၊ ဖေဖော်ဝါရီ ၂၁ ကွယ်လွန်) မှာ စားသောက်ဆိုင်ပိုင်ရှင်၊ ပီယာနိုဂီတသမား တစ်ဦးဖြစ်ပြီး ဖခင် အာနိုးစပီးလ်ဘတ်မှာ အင်ဂျင်နီယာတစ်ဦးဖြစ်ပြီး ကွန်ပြူတာများ စတင်တီထွင်ထုတ်လုပ်ရာတွင် ပါဝင်ခဲ့သူ ဖြစ်သည်။

ဟောလိဝုဒ်ခေတ်ကြီးကို စတင်တည်ထောင်ရာတွင် စတီဗင် စပီးလ်ဘတ်ပါဝင်ခဲ့သည်ဟု သတ်မှတ်ထားကြသည်။ကမ္ဘာ့ရုပ်ရှင်နှင့်ထုတ်လုပ်သူသမိုင်းတစ်လျှောက် အကျော်ကြားဆုံးဒါရိုက်တာများတွင် တစ်ဦးအပါအဝင်လည်း ဖြစ်လေသည်။

ရုပ်ရှင်ဒါရိုက်တာအဖြစ် နှစ်ပေါင်း ၄၀ ကျော်ဖြတ်သန်းမှုကာလအတွင်း ရုပ်ရှင်နယ်ပယ်အမျိုးအစားမျိုးစုံဖြင့် ဇာတ်ကားများ ရိုက်ကူးခဲ့သည်။သူ၏ ဇာတ်ကားများအနက် အထင်ရှားဆုံးမှာ Jurassic Park (series), Indiana Jones (series), Schindler's List, Men in Black (series), Saving Private Ryan ,Star Wars နှင့်Transformers(series) တို့ ဖြစ်ကြသည်။

၁၉၈၅ ခုနှစ်တွင် စပီးဘတ်သည် The Color Purple ဇာတ်ကားရိုက်ကူးပြီးနောက်ပိုင်း နေအိမ်တစ်လုံးရှာဖွေခဲ့၏။
ထိုအချိန်က စပီးဘတ်သည် လော့စ်အိန်ဂျလိတွင် နေအိမ် ၂ လုံးပိုင်ဆိုင်ထားပြီးဖြစ်ရာ Coldwater Canyon တွင် တစ်လုံးနှင့် နာမည်ကျော် မာလီဘူးကမ်းခြေအရပ်တွင် တစ်လုံးဖြစ်သည်။

သို့ရာတွင် အဆိုပါနေအိမ်များမှာ အချိန်ပိုင်းနေထိုင်ရန်အတွက်သာ အသုံးပြုသော နေအိမ်များဖြစ်ကာ စပီးဘတ်က အမြဲအခြေချနေထိုင်ရန် စိတ်ကူးယဉ်ဆန်သည့် နေအိမ်ကြီးမျိုးရှာဖွေခြင်းလည်း ဖြစ်သည်။

သို့နှင့် ပစိဖိတ် ပါလစ်ဆိတ်အရပ်တွင် ၃ ဧက ကျယ်ဝန်းသော ခြံကြီးအတွင်း အုတ်ကြွပ်မိုးနေအိမ်ကြီးတစ်လုံးကို အကျိုးဆောင် တစ်ဦးက လိုက်လံပြသရာ စပီးဘတ်ချက်ချင်းသဘောကျသွားခဲ့သည်။

“နေအိမ်ရဲ့ပုံစံနဲ့ တည်နေရာက ကျွန်တော့်ကို ဆွဲဆောင်နိုင်သွားတယ်။ လော့စ်အိန်ဂျလိနိုင်ငံတကာလေဆိပ်နဲ့ မာလီဘူးရဲ့ လှပတဲ့ရှုခင်းတွေ တွေ့မြင်ခံစားရတယ်။ ဝဲဘက်မှာက သစ်ပင်အုပ်တွေနဲ့ စိမ်းစိုလန်းဆန်းနေပြီး ယာဘက်မှာ Will Rogers State Park ပန်းခြံရှိပါတယ်။ ဒီပန်းခြံကြီးဘေးမှာရှိနေတာက နေအိမ်ရဲ့ အကောင်းဆုံးဆွဲဆောင်မှုပါ ” ဟု စပီးဘတ်က ပြန်ပြောင်းပြောပြသည်။


Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)