ထားဝယ်တွင် ကျူးကော်မတီ ဖွဲ့မည်

ထားဝယ် ပိန္နဲတောရပ်ကွက်အတွင်း တည်ဆောက်ထားသည့် အစိုးရအငှားအိမ်ရာတွင် နေရာချထားပေးမည့် ကျူးကျော်များအား ကော်မတီတစ်ရပ် ဖွဲ့စည်းပေးသွားမည်ဖြစ်ကြောင်း ထားဝယ်မြို့နယ် အုပ်ချုပ်ရေးမှူး ဦးလင်းသန့်ထံမှ သိရသည်။

၎င်းကျူးကျော်များ ကိုယ်တိုင်ပါဝင်မည့် ကော်မတီမှ ယင်းအငှားအိမ်ရာတွင် နေထိုင်သူများအရေးကို ကိုယ်စားပြုဆွေးနွေးခြင်း၊ အခက်အခဲများကို တင်ပြခြင်းနှင့် အခြားစီမံခန့်ခွဲမှုများ ဆောင်ရွက်ရမည်ဖြစ်ကြောင်း မြို့နယ်အုပ်ချုပ်ရေးမှူး ဦးလင်းသန့်က ပြောသည်။

“အငှားအိမ်ရာမှာ နေထိုင်သူတွေနဲ့ ပတ်သက်တဲ့ ရေ၊ မီးကိစ္စနဲ့ သန့်ရှင်းရေးကအစပေါ့၊ အဲဒါတွေ ဆောင်ရွက်နိုင်ဖို့ သူတို့အချင်းချင်းပါဝင်တဲ့ ကော်မတီတစ်ရပ် ဖွဲ့စည်းပေးဖို့ စီစဉ်ထားပါတယ်”ဟု ဦးလင်းသန့်က ပြောသည်။

လက်ရှိတွင် လေယာဉ်ကွင်းနံဘေးရှိ ကျူးကျော်အိမ်ထောင်စု ၂၅ လုံးကို အငှားအိမ်ရာပေါ်တွင် ငှားရမ်းနေရာချထားရန် စာချုပ်ချုပ်ဆိုထားပြီး အိမ်ရာသို့ ဝင်သည့်လမ်း လက်စသတ်ပြီးသည်နှင့် အခန်းအပ်နှံသွားမည်ဟု ၎င်းက ပြောသည်။

အခန်းငှားခမှာ ၁ လလျှင် ကျပ် ၃၂၀၀၀ သတ်မှတ်ထားပြီး ရေခ၊ မီးခကို သုံးစွဲသလောက် ကျခံရမည်ဖြစ်သည်။

လေယာဉ်ကွင်းကျူးကျော်များမှာ ပန်းခြံရှင်း၊ လက်သမား၊ ပန်းရန်လုပ်စသည့် နေ့စားကျပန်းအလုပ်သမားများ ဖြစ်သည့်အတွက် ရေရှည်အတွက် ငွေပေးဆောင်ရန် မလွယ်ကူနိုင်ကြောင်း လေယာဉ်ကွင်းကျူးကျော်တစ်ဦးဖြစ်သည့် ကိုပုက ပြောသည်။

“ကော်မတီလည်း ဘာတတ်နိုင်မှာလဲ။ ကျွန်တော်တို့ဝင်ငွေနဲ့ နေဖို့ အဆင်မပြေဘူး။ ထားဝယ်မှာ မိုးတွင်းဘက်ဆို မလွယ်တော့ လခပေးပြီး မနေချင်ဘူး။ အဆင်ပြေရင်လည်းပြေ မပြေရင်လည်းပြန်ပေါ့”ဟု ကိုပုက ဆိုသည်။

အငှားအိမ်ရာတွင် နေထိုင်သူများအနေနှင့် စည်းကမ်းများတွင် နံနက် ၆ နာရီမှ ညနေ ၆ နာရီအတွင်းသာ ဝင်ထွက်ခွင့်ရှိသည်ဟူသည့်အချက်နှင့် အခြားချမှတ်ထားသည့် အခြားစည်းကမ်းချက်များမှာလည်း တင်းကျပ်လွန်းကြောင်း ၎င်းက ပြောသည်။

“ကျွန်တော်တို့ တော်တော်ဒုက္ခ ရောက်ပြီ၊ ခြံထဲပို့မှ တော်သေး၊ ခုက ထောင်ထဲထားသလိုပဲ” ဟု ၎င်းက ပြောသည်။

ယင်းအငှားအိမ်ရာနံဘေး နှင်းဆီလမ်းအတွင်းရှိ နေအိမ် ၂၃ လုံးကို လမ်း မြေကျူးဟု သတ်မှတ်ကာ အငှားအိမ်ရာပေါ်ပြောင်းရန် စီစဉ်နေမှုတွင် မူရင်းအိမ်ထောင်စုများက ပြောင်းရွှေ့ရန် လက်ရှိအချိန်ထိ လက်မခံသေးပေ။


Credit: The Voice