ဟောင်ကောင်အချမ်းသာဆုံးသူဌေးကြီးလီကာရှင်း ဟောင်ကောင်ရှိ မိုးမျှော်တိုက်ကြီးနှင့် ဈေးဝယ်စင်တာတို့ကို ၂ လအတွင်း ကန်ဒေါ်လာ ၇ ဘီလီယံဖြင့် ရောင်းချလိုက်ပြီး ယခုအခါ အပန်းဖြေစခန်းကြီးတစ်ခုကို ရောင်းချပြန်ပြီ

ဟောင်ကောင်၏ အချမ်းသာဆုံးသူဌေးကြီးလီကာရှင်းသည် ဟောင်ကောင်ရှိ ၇၃ ထပ်မိုးမျှော်တိုက်ကြီးနှင့် ဈေးဝယ်စင်တာတို့ကို ၂ လအတွင်း စုစုပေါင်း ကန်ဒေါ်လာ ၇ ဘီလီယံဖြင့် ရောင်းချလိုက်ပြီး ယခုအခါ ဘဟားမားရှိ အပန်းဖြေစခန်းကြီးတစ်ခုကို ရောင်းချလိုက်ပြန်ပြီ ဖြစ်သည်။

အပန်းဖြေစခန်းတည်ရှိသည့်နေရာမှာ အမေရိကန်ပြည်ထောင်စု၊ ဖလော်ရီဒါပြည်နယ် အရှေ့ဘက်၊ အတ္တလန္တိတ်သမုဒ္ဒရာအတွင်းရှိ ဘဟားမားကျွန်းအုပ်စုတွင် ပါဝင်သော ဂရန်းဘဟားမားကျွန်းပေါ်တွင် တည်ရှိသည်။

ဂရန်းဘဟားမားသည် အပန်းဖြေစခန်းများ၊ နာမည်ကျော်ပင်လယ်ကမ်းခြေများ၊ ဂေါက်ကွင်းများနှင့် ကမ္ဘာကျော်သည့် ကျွန်းတစ်ခုဖြစ်ပြီး နာမည်ကျော် ဇာနာဒူး ကမ်းခြေသည်လည်း အဆိုပါကျွန်းတွင် တည်ရှိသည်။

ကမ္ဘာပေါ်တွင် အချမ်းသာဆုံးသူဌေးကြီးဖြစ်သော ဘီလ်ဂိတ်က အဆိုပါကမ်းခြေအမည်ကို အစွဲပြု၍ သူ၏နေအိမ်ကြီးကို ဇာနာဒူးဟု အမည်ပေးထားသည်။

ယခုအခါ ဟောင်ကောင်၏ အချမ်းသာဆုံးသူဌေးကြီးလီကာရှင်းက ဘဟားမားကျွန်းပေါ်ရှိ ဂရန်းလူကာရန်အမည်ရှိ အပန်းဖြေစခန်းကို ရောင်းချတော့မည်ဖြစ်သည်။

(လီကာရှင်းက ဟောင်ကောင်ရှိ မိုးမျှော်တိုက်ကြီးနှင့် ဈေးဝယ်စင်တာတို့ကို ရောင်းထုတ်ခဲ့ပုံသတင်းကို iMyanmarHouse.com တွင် ရေးသားတင်ပြခဲ့ပြီး ဖြစ်ရာ ပြန်လည်ဖတ်ရှုလိုပါက (၁) https://www.imyanmarhouse.com/news/read/676197 (၂) https://www.imyanmarhouse.com/news/read/681494 (၃) https://www.imyanmarhouse.com/news/read/694389 အင်တာနက်လင့်ခ်များတွင် ဖတ်ရှုနိုင်ပါသည်။

ဝယ်ယူမည့် ဝယ်လက်မှာ ကနေဒါနိုင်ငံ၊ တိုရွန်တိုအခြေစိုက် Wynn Group ဖြစ်ပြီး ကန်ဒေါ်လာ ၆၅ သန်းဖြင့် ဝယ်ယူမည်ဖြစ်ကာ ငွေပမာဏအားလုံးကို ငွေသားဖြင့် ပေးချေမည်ဖြစ်သည်ဟု ဆိုသည်။

ပြီးခဲ့သည့် သီတင်းပတ်အတွင်း Wynn Group သည် လီကာရှင်း၏ Cheung Kong Property Holdings မှ ပိုင်ဆိုင်ထားသော ဂရန်းလူကာရန် အပန်းဖြေစခန်းကို ဝယ်ယူရန်ရည်ရွယ်ကြောင်း အတည်ပြုစာကို လက်မှတ်ထိုးခဲ့ပြီး ဖြစ်သည်။

အပန်းဖြေစခန်း အပြီးသတ်အရောင်းအဝယ်ကို လာမည့် တစ်လ၊ နှစ်လအတွင်း လုပ်ဆောင်သွားဖွယ်ရာရှိသည်ဟု ဆိုသည်။
ယခင်ကမူ ဂရန်းဘဟားမားကျွန်း အုပ်ချုပ်ရေးအဖွဲ့က အပန်းဖြေစခန်းများစွာ ပိုင်ဆိုင်လည်ပတ်ခဲ့ဖူးသည်။

ယခုအပန်းဖြေစခန်းကိုလည်း မူလက ဘဟားမားအုပ်ချုပ်ရေးအဖွဲ့က ဝယ်ယူရန်စီစဉ်ရာ ကျွန်းနေအခွန်ဆောင်ပြည်သူတို့က ပြည်သူပိုင်ဘဏ္ဍာငွေများဖြင့် ဝယ်ယူခြင်း၊ လုပ်ငန်းလည်ပတ်ခြင်း၊ ပြုပြင်ထိန်းသိမ်းမှု ကုန်ကျစရိတ်များ အလွန်များပြားမည်ကို ရတက်မအေးဖြစ်ခဲ့ကြသည်။

“ပုဂ္ဂလိက စီးပွားရေးလုပ်ငန်းနယ်မှာ အစိုးရကဝင်ပါတာဟာ အကျင့်ပျက်ခြစားမှုတွေ ပေါက်ဖွားစေပြီး လွတ်လပ်တဲ့ဈေးကွက်ပုံစံအပေါ် ထိခိုက်စေတယ်ဆိုတာ သမိုင်းက သက်သေပြခဲ့ပြီးပါပြီ” ဟု Callenders & Co. ဥပဒေအကျိုးဆောင်အဖွဲ့မှ ရှေ့နေတစ်ဦးဖြစ်သူ ဖရက်ဒ်စမစ်က ပြောကြားသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)