နေအိမ်တစ်လုံးနှင့် သစ်ပင်တစ်ပင်စာသာ အကျယ်အဝန်းရှိသည့် ကမ္ဘာ့အသေးငယ်ဆုံး လူနေထိုင်ရာ ကျွန်း

ကနေဒါနိုင်ငံနှင့် အမေရိကန်ပြည်ထောင်စုအကြားတွင် တည်ရှိသည့် စိန့်လောရင့်မြစ်အတွင်းတွင် ကျွန်းငယ်တစ်ခု တည်ရှိသည်။

အဆိုပါကျွန်းမှာ အလွန်သေးငယ်လှသည့် ကျွန်းကလေးတစ်ခုဖြစ်ပြီး မြေနေရာမှာ နေအိမ်တစ်လုံးနှင့် သစ်ပင်တစ်ပင်စာ အကျယ်အဝန်းသာရှိကာ ကမ္ဘာပေါ်တွင် လူနေထိုင်သည့် အသေးငယ်ဆုံးကျွန်းတစ်ကျွန်းလည်း ဖြစ်သည်။

Hub Island ဟုခေါ်ဆိုကြပြီး အချို့ကမူ Just Room Enough Island ဟုလည်း ခေါ်ဆိုကြသည်။

ယင်းကျွန်းကို ၁၉၅၀ ပြည့်လွန်ကာလများတွင် ချမ်းသာကြွယ်ဝသည့် မိသားစုတစ်ခုဖြစ်သော Sizelands မိသားစုက ဝယ်ယူလိုက်ကာ အားလပ်ရက်အပန်းဖြေရန် နေအိမ်တစ်လုံး ဆောက်လုပ်ခဲ့သည်။

နေအိမ်နှင့် သစ်ပင်တစ်ပင်အပြင် ကျွန်းအစပ်တွင် ကုလားထိုင်များလည်း ချထားရန် နေရာခန့်သာ ကျယ်ဝန်းလေသည်။

နယူးယောက်နှင့် အွန်တေရီယိုတို့ကို ပိုင်းခြားထားသည့် စိန့်လောရင့်မြစ်အတွင်းတွင် ကျွန်းငယ်ပေါင်း ၁၈၆၄ ခု တည်ရှိနေသည်။
ထောင်နှင့်ချီ၍ ရှိသောကျွန်းများသည် မိုင် ၅၀ ခန့်အတွင်း ဖြန့်ကျက်တည်ရှိနေခြင်းဖြစ်သည်။

ကျွန်းဟု သတ်မှတ်ရခြင်းခံရသည့် မြေနေရာတစ်ခုသည် တစ်နှစ်တာပတ်လုံး ရေပေါ်တွင် ပေါ်နေရမည်ဖြစ်ပြီး အနည်းဆုံး သစ်ပင်နှစ်ပင်ရှိရမည်ဟု ဆိုသည်။

အဆိုပါမြစ်အတွင်းရှိ အချို့ကျွန်းများတွင် နေအိမ်တစ်လုံးထက် ပိုမိုတည်ရှိကြသည်။

ဂျက်ဖာဆင်ခရိုင်ပိုင်နက်တွင် တည်ရှိသည့် Wellesley ကျွန်းတွင်ဆိုလျှင် ပန်းဥယျာဉ်တစ်ခု၊ ဟိုတယ်တစ်လုံး၊ ရေခဲမုန့်ဆိုင်တစ်ခုတို့ ပါဝင်သည်ဟု ဆိုသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)