အမေရိကန်ပြည် အရှေ့တောင်ပိုင်းတွင် ကျွန်းတစ်ကျွန်း ပင်လယ်ရေအောက်သို့ နစ်မြှုပ်လျက်ရှိရာ ကျွန်းသူကျွန်းသားများ ရွှေ့ပြောင်းနေထိုင်ရန်အတွက် အစိုးရက ကန်ဒေါ်လာ ၄၈ သန်း ချထားပေး

အမေရိကန်ပြည်ထောင်စု အရှေ့တောင်ပိုင်း၊ လူဝီစီယားနားပြည်နယ်၏ အရှေ့တောင်ဘက်တွင် အိုင်းလ် ဒဂျီးန် ချားစ်အမည်ရှိ ကမ်းမြောင်ဒေသတစ်ခု တည်ရှိသည်။

အဆိုပါဒေသသည် ဘလော့စီ-ချီတီမားချာ-ချော့တော်အင်ဒီးယန်းမျိုးနွှယ်မှ အိုင်းလ် ဒဂျီး ချားစ်မျိုးနွှယ်စုတို့ လွန်ခဲ့သည့် နှစ်ပေါင်း ၁၇၀ ခန့်ကတည်းက အခြေချနေထိုင်ရာ ဒေသဖြစ်ခဲ့သည်။

၁၉၅၅ ခုနှစ်က မြေအကျယ်အဝန်းနှင့် နှိုင်းယှဉ်လျှင် ကျွန်း၏မြေနေရာ ၉၈ ရာခိုင်နှုန်းခန့်မှာ မြေပြိုကျခြင်း၊ ပင်လယ်ရေအောက်သို့ နစ်မြှုပ်သွားခြင်းတို့ကြောင့် ပျောက်ကွယ်သွားခဲ့ပြီ ဖြစ်သည်။

ရာသီဥတုပြောင်းလဲမှုကြောင့် ပင်လယ်ရေမြင့်တက်လာမှုအတွက် မကြာမီကာလအတွင်း အဆိုပါကျွန်းမှာ ပင်လယ်ရေအောက်သို့ လုံးဝနစ်မြုပ်ကွယ်ပျောက်သွားတော့မည်ဟု ခန့်မှန်းထားသည်။

ယင်းကမ်းမြောင်ဒေသသည် ယခင်က အကျယ် ၅ မိုင်နှင့် အလျား ၁၁ မိုင်ခဲ့ရှိခဲ့သော်လည်း ရေတိုက်စားမှု၊ မြေပြိုမှု၊ သဘာဝပတ်ဝန်းကျင် ပြောင်းလဲမှုနောက်ပိုင်း ပင်လယ်ရေမျက်နှာပြင် မြင့်တက်လာမှုများကြောင့် အကျယ်မှာ တစ်မိုင်၏ လေးပုံတစ်ပုံခန့်သာ ရှိတော့ပြီး အလျားမှာလည်း ၂ မိုင်ခန့်သာ ရှိတော့သည်။

ပင်လယ်ရေမျက်နှာပြင် ဆက်လက်မြင့်တက်နေမှုနှင့် မြေပြိုကျမှုများ အမြဲဖြစ်ပွားနေမှုကြောင့် များမကြာမီကာလအတွင်း အဆိုပါ ကမ်းမြောင်ဒေသမှာ ပင်လယ်ရေပြင်အောက်သို့ နစ်မြုပ်ပျောက်ကွယ်သွားတော့မည် ဖြစ်သည်။
ယခုအခါ လူဝီစီယားနားပြည်နယ်အုပ်ချုပ်ရေးအဖွဲ့က ပြည်ထောင်စုရန်ပုံငွေကို အသုံးချကာ ကြံစိုက်ခင်းတစ်ခုကို ဝယ်ယူပြီး အိုင်းလ် ဒဂျီးန် ချားစ်မျိုးနွှယ်စုတို့ကို ပြောင်းရွှေ့ပေးရန် စီစဉ်လျက်ရှိသည်။

ပြောင်းရွှေ့ပေးမည့်နေရာမှာ ယခုကမ်းမြောင်ဒေသ၏ အနောက်မြောက်ဘက် မိုင် ၄၀ ခန့် ဝေးကွာသော ဒေသသို့ဖြစ်သည်။

ပြည်နယ်အုပ်ချုပ်ရေးအဖွဲ့က ဝယ်ယူရန်ဆွေးနွေးလျက်ရှိသည်မှာ ၂၀၈ ဟက်တာ ( ၅၁၅ ဧက) ခန့် ကျယ်ဝန်းသည့် မြေနေရာဖြစ်ပြီး စတိုးဆိုင်များ၊ စာသင်ကျောင်းများ၊ ဆေးခန်းများနှင့် နီးကပ်စွာတည်ရှိသည့်နေရာဖြစ်ပြီး လက်ရှိနေရာထက် ပိုမိုမြင့်မားသည့် ကုန်းမြင့်ဒေသဖြစ်သည်ဟု ဆိုသည်။

လာမည့် သီတင်းပတ်များအတွင်း အပြီးသတ်အရောင်းအဝယ်လုပ်နိုင်ရန် လူဝီစီယားနား လူ့အသိုက်အဝန်းဖွံ့ဖြိုးရေးရုံးက မျှော်မှန်းထားသည်။

အသစ်ဝယ်ယူမည့် မြေနေရာပေါ်တွင် ဆောက်လုပ်ရေးလုပ်ငန်းများကို လာမည့် ၂၀၁၈ ခုနှစ်၊ နှစ်ကုန်ပိုင်း (သို့မဟုတ်) ၂၀၁၉ ခုနှစ်၊ နှစ်စပိုင်းတွင် စတင်ရန် စီစဉ်ထားရာ ကျွန်းသူကျွန်းသားများအနေဖြင့် ဟာရီကိန်းမုန်တိုင်းရာသီ အနည်းဆုံးတစ်ခုခန့် ကြံ့ကြံ့ခံကာ ဆက်လက်နေထိုင်ကြရဦးမည် ဖြစ်သည်။

အိုင်းလ် ဒဂျီးန် ချားစ်သည် အမေရိကန်ဗဟိုအစိုးရက သဘာဝပတ်ဝန်းကျင်ပြောင်းလဲမှုကြောင့် ဆိုးကျိုးသက်ရောက်မှုများကို ကုစားရန်အတွက် ပထမဆုံး ထောက်ပံ့ငွေချထားပေးခြင်းခံရသည့် ဒေသဖြစ်လာသည်။

လက်ရှိကျွန်းပေါ်တွင် အမြဲနေထိုင်သူဦးရေမှာ ၈၀ ဦးခန့်သာရှိပြီး အဆိုပါဒေသခံများအတွက် မြေနေရာဝယ်ယူပေးခြင်း၊ နေအိမ်များဆောက်လုပ်ပေးခြင်းနှင့် ရွှေ့ပြောင်းနေရာချထားပေးခြင်းတို့အတွက် ကန်ဒေါ်လာ ၄၈ သန်း ခွင့်ပြုထားသည်။

ဝယ်ယူပေးမည့် မြေနေရာကို Acadia Agricultural Holdings မှ ပိုင်ဆိုင်ပြီး တန်ကြေးအားဖြင့် ကန်ဒေါ်လာ ၁၉ ဒသမ ၁ သန်းခန့် ရှိသော်လည်း အမှန်တကယ်ဝယ်ယူသည့် ဈေးနှုန်းမှာမူ တစ်ဝက်ခန့်သာရှိနိုင်ကြောင်းလည်း ခန့်မှန်းထားသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)