လော့စ်အိန်ဂျလိတွင် အငှားအိမ်ရာကို ကွန်ဒိုပြောင်းလဲတည်ဆောက်မည့်စီမံကိန်း အကောင်အထည်မဖော်ရေးအတွက် ငှားရမ်းနေထိုင်သူတို့က မြို့ တော်အကြီးအကဲများထံ အသနားခံတင်ပြမှု အောင်မြင်

အမေရိကန်ပြည်ထောင်စု၊ လော့စ်အိန်ဂျလိတွင် အငှားအိမ်ရာကို ကွန်ဒိုပြောင်းလဲတည်ဆောက်မည့်စီမံကိန်း အကောင်အထည်မဖော်ပါရန် ငှားရမ်းနေထိုင်သူတို့က လော့စ်အိန်ဂျလိမြို့ တော် ဗဟိုဧရိယာစီမံကိန်းကော်မရှင်ထံ အသနားခံတင်ပြမှု အောင်မြင်ခဲ့ကြောင်း လော့စ်အိန်ဂျလိအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

လော့စ်အိန်ဂျလိမြို့  အနောက်ဘက် Hancock Park ရှိ အငှားအိမ်ရာကို ကွန်ဒိုမီနီယံအဖြစ် ပြောင်းလဲတည်ဆောက်ရန် စီစဉ်ခဲ့ခြင်းဖြစ်သည်။

လော့စ်အိန်ဂျလိမြို့ တော် ဗဟိုဧရိယာစီမံကိန်းကော်မရှင်၏ အစည်းအဝေးတွင် အိမ်ငှားတို့၏ အသနားခံမှုကို လက်ခံကြောင်း ကန့်ကွက်သူမရှိ အတည်ပြုလိုက်ခြင်းလည်း ဖြစ်သည်။

အသနားခံမှုကို စီမံကိန်းပြုလုပ်မည့်နေရာတွင် နေထိုင်သည့် အိမ်ငှားများနှင့် လော့စ်အိန်ဂျလိ အိမ်ငှားများသမဂ္ဂတို့က တင်သွင်းခဲ့ကြခြင်း ဖြစ်သည်။
ဗဟိုဧရိယာစီမံကိန်းကော်မရှင်၏ အစည်းအဝေး ကျင်းပသည့်နေရာသို့ အိမ်ငှားများကို ထောက်ခံသူများစွာ စုရုံးရောက်ရှိခဲ့ကြပြီး စီမံကိန်းအကောင်အထည်ဖော်မည့် အဆောက်အဦများကို ထိန်းသိမ်းစောင့်ရှောက်သွားပါရန် တိုက်တွန်းခဲ့ကြသည်။

လော့စ်အိန်ဂျလိတွင် Ellis Act အမည်ရှိ ဥပဒေတစ်ရပ်ပြဌာန်းထားရာ အဆိုပါဥပဒေအရ ကွန်ဒိုမီနီယံအဖြစ် ပြောင်းလဲဆောက်လုပ်မည့် အဆောက်အအုံများမှ အိမ်ငှားများကို နှင်ထုတ်နိုင်ခွင့် မြေရှင်များကို ပေးအပ်ထားသည်။
အဆောက်အအုံပိုင်ရှင်တို့၏ ကိုယ်စားလှယ်များက ပြောကြားရာတွင်မူ Ellis Act အတိုင်း ဥပဒေအရ လုပ်ဆောင်ရန် ရှိသည်များကို စတင်လုပ်ဆောင်နေပြီဖြစ်ပြီး အိမ်ငှားများအနေဖြင့် ပြောင်းရွှေ့ အခြေချနိုင်ရန် ကန်ဒေါ်လာ ၈၀၅၀ မှ ၂၀၀၅၀ အကြား ခံစားခွင့် ရရှိသွားဖွယ်ရာရှိကြောင်းလည်း ပြောကြားထားသည်။

ဖျက်သိမ်းမည့်အဆောက်အအုံရှိ အိမ်ငှားများမှာ အိမ်လခ ကန်ဒေါ်လာ ၁၉၅၀ မှ ၂၄၄၁ အကြား ပေးကြရသည်ဟု ဆိုသည်။

ယခုနေအိမ်ခန်းများကို ဖျက်သိမ်းပြီး ကွန်ဒိုပြန်လည်ဆောက်လုပ်ပြီးပါက တစ်ခန်းလျှင် ကန်ဒေါ်လာ ၁ သန်းမှ ၁ ဒသမ ၁၅ သန်းအကြား ဈေးနှုန်းများဖြင့် ရောင်းချသွားရန် ရည်မှန်းခဲ့ခြင်း ဖြစ်သည်။

မြို့ပြစီမံကိန်းပညာရှင် Lys Mendez ကမူ ယခုကဲ့သို့ ကွန်ဒိုစီမံကိန်းများတွင် အခန်းနေရာများ လျော့ကျမှုမှာ ရတက်မအေးဖွယ်ရာဖြစ်ကြောင်းနှင့် စီမံကိန်းနေရာတွင် ၁၄ ရာခိုင်နှုန်းအထိ နေရာဆုံးရှုံးမှုမှာ အိမ်ရာဈေးကွက်အပေါ် ဆိုးကျိုးများ သက်ရောက်လာနိုင်သည်ဟု ဆိုသည်။

စီမံကိန်းကော်မရှင်က အနိုင်ပေးဆုံးဖြတ်လိုက်စေကာမူ ယင်းအဆောက်အအုံများတွင် နေထိုင်သူတို့၏ အနာဂတ်မှာ မရေရာလှသေးချေ။
အဆောက်အအုံပိုင်ရှင်တို့အနေဖြင့် အခန်းများကို မငှားရမ်းဘဲ လစ်လပ်ထားခြင်း၊ ဖျက်သိမ်းခြင်းများ ပြုလုပ်လာနိုင်သည် (သို့မဟုတ်) အချိန်ကာလတစ်ခု စောင့်ဆိုင်းကာ ယခုအခန်းများကို ကွန်ဒိုအဖြစ် ပြောင်းလဲဆောက်လုပ်ရန် ပြန်လည်တင်ပြလာနိုင်လေသည်။

လော့စ်အိန်ဂျလိ အိမ်ငှားများသမဂ္ဂကမူ အိမ်ငှားတို့အနေဖြင့် နေအိမ်မှ နှင်ထုတ်မှုများကို ဆက်လက်တိုက်ပွဲဝင်သွားမည်ဖြစ်ကြောင်း အခိုင်အမာကတိပြုထားသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)