တရုတ်ပြည်၏ အချမ်းသာဆုံးပုဂ္ဂိုလ် ဝမ်ကျန်းလင်ပိုင် Dalian Wanda ကုမ္ပဏီသည် ဗြိတိန်၊ အမေရိကန်နှင့် တရုတ်တို့ရှိ ကန်ဒေါ်လာ ၄ ဒသမ ၅ ဘီလီယံတန်ကြေးရှိ ဆောက်လုပ်ရေး စီမံကိန်းများကို ပြန်လည်ရောင်းထုတ်လျက်ရှိကြောင်း ရှန်ဟိုင်းအခြေစိုက် အိမ်ခြံမြေ သတင်းဝက်ဘ်ဆိုက်တစ်ခုတွင် ဖော်ပြသည်။
ဝမ်ကျန်းလင်၏ မိသားစုပိုင် ကုမ္ပဏီတစ်ခုဖြစ်သော Dalian Wanda Commercial Properties သည် ကွေးလင်၊ ချီကာဂို၊ လန်ဒန်၊ ဆစ်ဒနီနှင့် အခြားကမ္ဘာ့မြို့ကြီးများတွင် ဆောက်လုပ်ရေးစီမံကိန်းများစွာ အကောင်အထည်ဖော်လျက်ရှိရာ ယခုအခါ အဆိုပါစီမံကိန်းများကို ရောင်းချလာခြင်းဖြစ်သည်။
ဝမ်ကျန်းလင်ရောင်းထုတ်လျက်ရှိသော ဆောက်လုပ်ရေးစီမံကိန်းများတွင် သြစတေးလျနိုင်ငံရှိ စီမံကိန်း ၂ ခုလည်း ပါဝင်ရာ ဆစ်ဒနီရှိ One Circular Quay လူနေနှင့် ဟိုတယ်ဘက်စုံသုံး ဆောက်လုပ်ရေးစီမံကိန်း (တန်ကြေး-ကန်ဒေါ်လာ ၁ ဘီလီယံ) နှင့် Gold Coast ရှိ Jewel resort စီမံကိန်း (တန်ကြေး- ကန်ဒေါ်လာ ၁ ဒသမ ၆ ဘီလီယံ) တို့လည်း အပါအဝင် ဖြစ်သည်။
Dalian Wanda မှ ပြန်လည်ရောင်းချလျက်ရှိသော ဆောက်လုပ်ရေးစီမံကိန်းများတွင် လန်ဒန်ရှိ One Nine Elms စီမံကိန်း (ကန်ဒေါ်လာ ၁ ဘီလီယံ) ၊ ချီကာဂိုရှိ ဟိုတယ်နှင့် လူနေဘက်စုံသုံး Vista Tower စီမံကိန်း (တန်ကြေး- ကန်ဒေါ်လာ ၁ ဘီလီယံ) ၊ တရုတ်ပြည် အရှေ့တောင်ပိုင်း ကွေ့လင်းရှိ ဈေးဝယ်နှင့်လူနေဘက်စုံသုံးစီမံကိန်းများ ပါဝင်သည်။
နယ်စပ်ဖြတ်ကျော် အရောင်းအဝယ်များကို တရုတ်အစိုးရက အပြင်းအထန်ကိုင်တွယ်လာလျက်ရှိရာ Dalian Wanda မှာ ပြည်ပ ရင်းနှီးမြှုပ်နှံမှု ကြီးမားစွာပြုလုပ်ခဲ့သည့်ကုမ္ပဏီဖြစ်ခြင်းကြောင့် ယခုကဲ့သို့ ရှယ်ယာပြန်လည်ရောင်းထုတ်ခြင်းများ ပြုလုပ်လာလျက် ရှိခြင်း ဖြစ်သည်။
ပြီးခဲ့သော ဇွန်လအတွင်း တရုတ်အာဏာပိုင်တို့က Dalian Wanda ကုမ္ပဏီမှ အကောင်အထည်ဖော်လျက်ရှိသော ပြည်ပဖျော်ဖြေရေးဆိုင်ရာ စီမံကိန်း ၆ ခုအတွက် ဘဏ်ချေးငွေရယူခွင့် ပိတ်ပင်ခဲ့သည်။
ဝမ်ကျန်းလင်သည် တရုတ်ပြည်၏ အကြီးမားဆုံး အိမ်ခြံမြေ developer ဖြစ်သော Dalian Wanda တည်ထောင်သူဖြစ်သည့်အပြင် ကမ္ဘာကျော်စပိန်ဘောလုံးကလပ်အသင်းဖြစ်သည့် အက်သလက်တီကို မက်ဒရစ်အသင်း၏ ရှယ်ယာ ၂၀ ရာခိုင်နှုန်းကိုလည်း ပိုင်ဆိုင်ထားသည်။
ဝမ်ကျန်းလင်သည် တရုတ်နိုင်ငံတွင် အချမ်းသာဆုံးပုဂ္ဂိုလ်ဖြစ်ပြီး ဖော့ဘ်မဂ္ဂဇင်းကြီး၏ ခန့်မှန်းချက်အရ ကန်ဒေါ်လာ ၃၁ ဒသမ ၃ ဘီလီယံကြွယ်ဝသည်ဟု ခန့်မှန်းထားပြီး တစ်ကမ္ဘာလုံးတွင် နံပါတ် ၁၈ နေရာ၌ ရပ်တည်လျက်ရှိသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)