ပုဂံဘုရားတွေပေါ် နေဝင်ချိန်တက်တာနည်းအောင် ဝင်ကြေးကောက်ခံဖို့ ဆွေးနွေးနေ

ပုဂံဘုရားတွေပေါ်မှာ နေ၀င်ချိန်တက်ရောက် ကြည့်ရှုသူဦးရေ လျှော့ချဖို့ ဘုရားပေါ်ကို တက်ရောက်သူတွေကို ၀င်ကြေးကောက်ခံဖို့ ဆွေးနွေးနေတာလို့ ရှေးဟောင်းသုတေသနနဲ့ အမျိုးသားပြတိုက်ဦးစီးဌာနကနေ သိရပါတယ်။

‘‘၀င်ကြေးကောက်ခံဖို့ အတွက်က ဘုရားပေါ်တက်တဲ့ လူဦးရေလျှော့ချနိုင်ဖို့ရည်ရွယ်ပြီး စီစဉ်နေတာဖြစ်ပါတယ်။ ဆွေးနွေးနေကြတုန်းဖြစ်တဲ့အတွက် ဘယ်လိုပုံစံနဲ့ ကောက်သွား မယ်ဆိုတာကိုတော့ အတိအကျ မဆုံးဖြတ်ရသေးပါဘူး’’လို့ ရှေးဟောင်းသုတေသနနဲ့ အမျိုးသားပြတိုက်ဦးစီးဌာန ညွှန်ကြားရေးမှူး ဦးအောင်အောင်ကျော်က ပြောပါတယ်။

အရင်တုန်းကတော့ ပုဂံဒေသရဲ့ နေ၀င်ချိန်ကြည့်ရှုတာတွေကို ဘုရားငါးဆူမှာ ခွင့်ပြုထားပေမယ့် ၂၀၁၆ သြဂုတ် ငလျင်လှုပ်ခတ်ပြီးနောက် ပုဂံဒေသက ဘုရားစေတီ အများအပြားထိခိုက်ပျက်စီးခဲ့တာကြောင့် အနည်းငယ်စိတ်ချရတဲ့ ရွှေဆံတော်နဲ့ တောင်ဂူနီဘုရားနှစ်ဆူပေါ်ကိုပဲတရားဝင်တက်ရောက်ဖို့ တရားဝင်ခွင့်ပြုထားတယ်လို့ သိရပါတယ်။

‘‘ဘုရားတွေပေါ်မှာ နေ၀င်ချိန်တက်ပြီး ကြည့်တာတွေ လျှော့ချနိုင်ဖို့အတွက် ၀င်ကြေးကောက်ခံမှုအပြင် တခြားနေရာတွေမှာလည်း ရှုခင်းတွေ ကြည့်နိုင်တဲ့ တောင်ကုန်းလေးတွေ လုပ်ပေးသွားဖို့ စီစဉ်ထားပါတယ်’’လို့ ဦးအောင်အောင်ကျော်က ပြောပါတယ်။

လောလောဆယ်မှာတော့ ဂျပန်အပြည် ပြည်ဆိုင်ရာဖွံ့ဖြိုးရေးအေဂျင်စီ (JICA)အကူအညီနဲ့ အနောက်ဖွားစောအနီးမောက်ရေကန် ကန်ပေါင်ကို တောင်ကုန်းတစ်ခုအဖြစ် မြှင့်တင်ပြီး နေ၀င်ချိန်ကြည့်ရှုနိုင်မယ့်နေရာ ဖန်တီးပေးဖို့ စီစဉ်နေပြီး အခြားနေရာနှစ်ခုခန့်လောက်မှာလည်း နေ၀င်ချိန်ကြည့်ရှုနိုင်မယ့် နေရာသစ်တွေ ဖန်တီးပေးဖို့ စီစဉ်နေတယ်လို့ သိရပါတယ်။

Credit: 7DayDaily