လယ်ယာမြေ ပြဿနာ အမြန်ဆုံး ဖြေရှင်းပေးမည်ဟု ဝန်ကြီးဌာန ကတိပေး

လယ်ယာကဏ္ဍ မူဝါဒရဲ့ ငါးနှစ်စီမံကိန်းမှာ တောင်သူတွေ ကြုံတွေ့နေရတဲ့ သိမ်းဆည်းခံ လယ်ယာမြေ ပြဿနာ တွေကို အမြန်ဆုံး ဖြေရှင်းပေးမယ်လို့ ဝန်ကြီးဌာနအနေနဲ့ ကတိကဝတ်တွေ ပေးခဲ့တယ်လို့ သိရပါတယ်။

“လယ်ယာကဏ္ဍမှာ ရှိတဲ့ တိုင်းဒေသကြီး ပြည်နယ် အစိုးရအသီးသီးက လယ်ယာကဏ္ဍမှာ သူတို့ကြုံတွေ့နေရ တဲ့ အခက်အခဲတွေကို မူဝါဒချပြတဲ့ပွဲမှာ ပြောကြတယ်၊ ဒီအခက်အခဲတွေဟာ ဦးတို့ ရေးဆွဲထားတဲ့ လယ်ယာ ကဏ္ဍ မူဝါဒထဲမှာ ပါဝင်ပါတယ်၊ ဒါပေမဲ့ နှစ်စဉ်စီမံကိန်းအနေနဲ့ ထည့်လုပ်သွားမှာပေါ့၊ သူတို့ အဓိကပြောတဲ့ သိမ်းဆည်းခံ လယ်ယာမြေ ပြဿနာကို အမြန်ဆုံး ဖြေရှင်းနိုင်အောင် ဆောင်ရွက်မယ်လို့လဲ ဦးတို့ဌာနအနေနဲ့ ကတိပေးလိုက်ပါတယ်” လို့ စိုက်ပျိုးရေး၊ မွေးမြူရေး နှင့် ဆည်မြောင်းဝန်ကြီးဌာနမှ ဒုတယအမြဲတမ်း အတွင်း ဝန် ဦးမျိုးတင့်ထွန်းက ပြောပါတယ်။

စိုက်ပျိုးရေး၊ မွေးမြူရေး နှင့် ဆည်မြောင်းဝန်ကြီးဌာနအနေနဲ့ ဒုတိယကာလတို ငါးနှစ် လယ်ယာကဏ္ဍ မူဝါဒမှာ ဆိုရင် သိမ်းဆည်းခံ လယ်ယာမြေ ပြဿနာများ အမြန်ဆုံး ဖြေရှင်းနိုင်အောင် ဆောင်ရွက်ရေး၊ လယ်ရှိ လယ် ယာမြေ ဥပဒေနဲ့ မြေလွတ်မြေလပ် ဥပဒေကို ပြန်လည် အသက်ဝင်အောင် ဆောင်ရွက်ရေးနဲ့ တခြားလယ်ယာ ကဏ္ဍမှာ လိုအပ်လျက်ရှိတဲ့ ကဏ္ဍတွေကိုပါ ဖြည့်ဆည်းဆောင်ရွက်နိုင်ရေးတွေ ပါဝင်တယ်လို့ သိရပါတယ်။

လက်ရှိမှာလည်း သိမ်းဆည်းခံ လယ်ယာမြေ ပြဿနာတွေကို အမြန်ဆုံး ဖြေရှင်းနိုင်ဖို့ သက်ဆိုင်ရာ အဖွဲ့အ စည်းတွေက ဆောင်ရွက်လျက်ရှိပြီး မြေလွတ်မြေလပ် ဥပဒေပိုင်းမှာလည်း လက်ရှိမှာ လိုအပ်တဲ့ အချက်အ လက်တွေကို ပြင်ဆင်လျက် ရှိတယ်လို့ သိရပါတယ်။

“မြေလွတ်မြေလပ်မှာဆိုရင် အခုကြုံနေရတဲ့ လေးနှစ်အတွင်း အကောင်အထည် မဖော်ရင် ဥပဒေအရ ပြန်လည် သိမ်းဆည်းခွင့်ရှိတယ်၊ ဒါပေမဲ့ ဥပဒေက အသက်မဝင်သလို ဖြစ်နေတယ်၊ ဒါလေးတွေလဲ ထပ်ပြီး ပြင်ဆင်နေရ တာပေါ့”လို့ ဦးမျိုးတင့်ထွန်းက ပြောပါတယ်။

သူကဆက်ပြီး “လယ်ယာမြေ ဥပဒေရဲ့ ပြင်ဆင်ချက်ထဲမှာဆိုရင်လဲ တောင်သူတွေ လက်ရှိ ကြုံတွေ့နေရတဲ့ မိမိပိုင်ဆိုင်တဲ့ လယ်ယာမြေတွေကို ရောင်းချခွင့်၊ ပေါင်နှံခွင့် ဥပဒေအရ ခွင့်ပြုထားပေမဲ့ လက်တွေ့လုပ်ကြတဲ့အခါမှာ လုပ်ထုံးလုပ်နည်းတွေအရ ခက်ခဲမှုတွေ ရှိနေတယ်၊ ဒါတွေလဲ ပြင်ဆင်ထားတယ်” လို့ ပြောပါတယ်။

လက်ရှိမှာတော့ လယ်ယာမြေ ဥပဒေ ပြင်ဆင်ချက်ကို ပြည်ထောင်စုရှေ့နေချုပ်ရုံးမှာ တင်ထားပြီး ဖြစ်ပြီးမြေလွတ်မြေလပ် ဥပဒေကိုတော့ ပြင်ဆင်နေဆဲ ဖြစ်တယ်လို့ သိရပါတယ်။


Credit: The Kumudra