ကန်ဒေါ်လာ တစ်ဘီလီယံတန်ကြေးရှိ ဘာရိန်း ဆေးဝါးမြို့တော်စီမံကိန်းအတွက် ကုမ္ပဏီပေါင်း ၂၉ ခု ယှဉ်ပြိုင်လေလံဆွဲမည်

ဘာရိန်းနိုင်ငံတွင်တည်ဆောက်မည့် ဘုရင်အဗ္ဗဒူလာဆေးဝါးမြို့တော်စီမံကိန်းကို ကန်ဒေါ်လာ တစ်ဘီလီယံခန့် အကုန်အကျခံ တည်ဆောက်မည်ဖြစ်ရာ လေလံဆွဲရန် အရည်အချင်းပြည့်မီသည့် ကုမ္ပဏီ ၂၉ ခု ရွေးချယ်ခြင်းခံထားရကြောင်း အရှေ့အလယ်ပိုင်း အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

အဆိုပါစီမံကိန်းကို ဘုရင် အဗ္ဗဒူလာ ဘင် အဗ္ဗဒူလာဇစ် အယ်လ် ဆတ်က ဘဏ္ဍာငွေခွင့်ပြုချက်ပေးခဲ့ခြင်းဖြစ်သည်။
စတုရန်းမီတာ တစ်သန်းအကျယ်အဝန်းရှိသော မြေနေရာပေါ်တွင် တည်ဆောက်မည်ဖြစ်ပြီး ဘာရိန်းနိုင်ငံတောင်ပိုင်းတွင် အကြီးမားဆုံးမြို့တစ်မြို့ဖြစ်သည့် ဒါရတ် အယ်လ်ဘာရိန်းတွင် ဖြစ်သည်။

ဆေးဝါးမြို့တော်သည် ဘက်စုံသုံးစီမံကိန်းတစ်ခုဖြစ်ပြီး ပညာရေး၊ ဆေးဝါးနှင့် သုတေသနဌာနများ ပါဝင်မည်ဖြစ်သည့်အပြင် မြို့တော်ဝန်းအတွင်း အခြေချနေထိုင်နိုင်မည့် အဆောက်အအုံများလည်း ပါဝင်မည် ဖြစ်သည်ဟု ဆိုသည်။

ပထမအဆင့်ဆောက်လုပ်မှုတွင် ကုတင် ၂၈၈ ဆံ့ ဆေးရုံတစ်လုံး၊ ဝန်ထမ်းအိမ်ရာနှင့် အခြားလူမှုရေးအဆောက်အအုံများကို တည်ဆောက်မည်ဖြစ်သည်။

ယင်းနောက်ပိုင်းတွင် ဆေးကုသဆောင်များ၊ ဆေးဝါးဆိုင်ရာ ဝန်ဆောင်မှုပေးသည့် အဆောက်အအုံ၊ ပင်လယ်ကွေ့ဒေသတွင် အဖြစ်များသည့် ကင်ဆာ၊ သွေးတိုးနှင့် အခြားရောဂါများ အထူးပြုလေ့လာသည့် ဌာနများ တည်ဆောက်သွားမည် ဖြစ်သည်။

ဆေးဝါးမြို့တော်ကို အာရေးဗီးယန်းပင်လယ်ကွေ့တက္ကသိုလ်မှ ကွပ်ကဲသွားမည်ဖြစ်ပြီး ဆေးဘက်ဆိုင်ရာဝန်ထမ်းပေါင်း ၇၀၀ ကျော် ခန့်အပ်သွားမည်ဟု ဆိုသည်။

စီမံကိန်းအပြီးသတ်ပြီးစီးပါက ကုတင် ၅၀၀ ဆန့် ဆေးရုံ၊
ဆေးကျောင်း၊ သုတေသန၊ ဆေးဘက်ဆိုင်ရာ ဟိုတယ်၊ ပြန်လည်ထူထောင်ရေး ဆေးရုံ၊ ကျောင်းသားများနှင့် ဝန်ထမ်းများအတွက် မြို့တော်ဝန်းအတွင်း နေထိုင်ရန်နေရာများ ရရှိလာမည် ဖြစ်သည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)