အမေရိကန်-မက္ကဆီကိုနယ်စပ်တွင် နယ်ခြားတံတိုင်းတည်ဆောက်ရန် ဒေါ်နယ်ထရမ့်အမိန့်ပေးပြီ

ဒေါ်နယ်ထရမ့်သည် အမေရိကန်၏ ၄၅ ဆက်မြောက်သမ္မတအဖြစ် ကျမ်းသစ္စာကျိန်ဆိုပြီးနောက် ရွေးကောက်ပွဲကတိကဝတ်ကို အကောင်အထည်ဖော်သည့် ပထမဆုံးခြေလှမ်းအနေဖြင့် မက္ကဆီကိုနယ်စပ်တွင် တံတိုင်းတည်ဆောက်ရန် အမိန့်ထုတ်လိုက်ပြီ ဖြစ်ကြောင်း စီအင်န်အင်န်သတင်းတစ်ရပ်တွင် ဖော်ပြသည်။

ထို့အပြင် တရားမဝင်နိုင်ငံသားများကိုလည်း နေရပ်သို့ပြန်ပို့ရန် အရှိန်မြှင့်လုပ်ဆောင်သွားမည်ဟု ဆိုသည်။
ဒေါ်နယ်ထရမ့်သည် နယ်စပ်စည်းရိုးတည်ဆောက်ရန်
အမိန့်နှင့်အတူ နယ်ခြားစောင့်တပ်နှင့် လူဝင်မှုကြီးကြပ်ရေးအရာရှိ အင်အား တိုးမြှင့်ရန် အမိန့်နှစ်ရပ်ကို လက်မှတ်ရေးထိုးခဲ့သည်။

“ဒီနေ့ကစပြီး အမေရိကန်ပြည်ထောင်စုဟာ သူ့ရဲ့ နယ်စပ်တွေကို ပြန်ပြီးထိန်းချုပ်ပါပြီ” ဟု ထရမ့်က ဝါရှင်တန်ရှိ အမိမြေလုံခြုံရေးဌာန တွင် ပြောကြားသည်။
ရွေးကောက်ပွဲ မဲဆွယ်ကာလအတွင်း ထရမ့်ပြောကြားခဲ့ဖူးသည်မှာ နယ်စပ်ထိန်းချုပ်ရေးနှင့် လူဝင်မှုကဏ္ဍ ပြုပြင်ပြောင်းလဲရေးတို့အတွက် ကွန်ဂရက်တွင် ဥပဒေပြဌာန်းရန် မလိုအပ်ကြောင်း၊ ၎င်းအနေဖြင့် ရှိပြီးဖြစ်သော စနစ်၊ မူဘောင်အတွင်းမှ လုပ်ဆောင်သွားမည်ဖြစ်ကြောင်း ပြောကြားခဲ့ဖူးသည်။

“ကျွန်တော်တို့အတွက် ဥပဒေသစ်တွေ မလိုပါဘူး” ဟု အမိန့်နှစ်ရပ်ကို လက်မှတ်ရေးထိုးပြီးချိန်တွင် ဒေါ်နယ်ထရမ့်က ပြောကြားသည်။
နယ်ခြားစောင့်တပ်များတွင် အင်အား ၅၀၀၀ နှင့် လူဝင်မှုကြီးကြပ်ရေးတွင် အင်အား ၁၀၀၀၀ အင်အားဖြည့်တင်းခြင်းဖြင့် တရားမဝင်နေထိုင်သူများ မူရင်းနေရပ်သို့ ပြန်လည်ပို့ဆောင်ရေးတွင် အထောက်အကူဖြစ်စေမည်ဖြစ်ကြောင်း ထရမ့်က ဆိုသည်။

နယ်ခြားတံတိုင်းကို ပြည်ထောင်စုရန်ပုံငွေဖြင့် သုံးစွဲတည်ဆောက်သွားမည်ဖြစ်ပြီး မက္ကဆီကို၏ ကျခံထည့်ဝင်မှုရရှိရန်လည်း ကြိုးပမ်းသွားမည်ဟု ဒေါ်နယ်ထရမ့်က ပြောကြားသည်။
မက္ကဆီကိုသမ္မတကမူနယ်ခြားတံတိုင်းတည်ဆောက်မှုတွင် ငွေကြေးထည့်ဝင်မည်မဟုတ်ကြောင်း ထုတ်ပြောထားသည်။

ထရမ့်က မက္ကဆီကိုနှင့် ညှိနှိုင်းဆွေးနွေးမှုများ မကြာမီ ပြုလုပ်သွားမည်ဖြစ်ပြီး တံတိုင်းတည်ဆောက်မှုကို လပိုင်းအတွင်း အကောင်အထည်ဖော်သွားမည်ဟု ပြောကြားသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)