ဒေါ်နယ်ထရမ့်၏သမီးနှင့်သားမက် ဝါရှင်တန်ရှိ နေအိမ်တစ်လုံးသို့ ပြောင်းရွှေ့တော့မည်

အမေရိကန်သမ္မတအဖြစ်လာမည့် ဇန်နဝါရီ ၂၀ တွင် ကျမ်းသစ္စာကျိန်ဆိုမည့် ဒေါ်နယ်ထရမ့်၏ သမီးဖြစ်သူ အိုင်ဗန်ကာ ထရမ့်နှင့် သူ၏ခင်ပွန်း ဂျရက်ဒ် ကွတ်ရ်ှနာတို့သည် ဝါရှင်တန်ဒီစီ၏ ဇိမ်ခံလူနေရပ်ကွက် ကာလိုရာမာရှိ နေအိမ်တစ်လုံးသို့ ပြောင်းရွှေ့ရန် ပြင်ဆင်လျက်ရှိကြောင်း အမေရိကန်အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

အဆိုပါနေအိမ်တွင် အိပ်ခန်း ၆ ခန်းနှင့် ရေချိုးခန်း ၅ ခန်းပါဝင်သည်။
သတင်းရင်းမြစ်တစ်ခု၏ ပြောကြားချက်အရ ယင်းနေအိမ်သည် အိုဘားမားတို့မိသားစုအခြေချမည့်နေအိမ်နှင့် ဘလောက်နှစ်ခုခန့်သာ ကွာဝေးသည်ဟု ဆိုသည်။

အုတ်ဖြင့်ဆောက်လုပ်ထားသော နေအိမ်ဖြစ်ပြီး အဖြူရောင်ဖြစ်သည်။
ပြီးခဲ့သော ဒီဇင်ဘာလအတွင်း အဆိုပါနေအိမ်သည် ကန်ဒေါ်လာ ၅ ဒသမ ၅ သန်းဖြင့် အရောင်းအဝယ်ဖြစ်ခဲ့သည်ဟုဆိုသည်။

သို့ရာတွင် အိုင်ဗန်ကာတို့ဇနီးမောင်နှံသည် ယင်းနေအိမ်ကို ဝယ်ယူနေထိုင်ခြင်းဖြစ်သည် (သို့မဟုတ်) ငှားရမ်းနေထိုင်ခြင်း ဖြစ်သည်ဟူခြင်းကိုမူ အတိအကျ မသိရချေ။
အချို့ကမူ အိုင်ဗန်ကာတို့ ဝယ်ယူလိုက်ခြင်းဖြစ်သည်ဟု ဆိုကြသည်။

နောက်ဆုံးအရောင်းအဝယ်မှတ်တမ်းမှာ ၂၀၁၃ ခုနှစ်အတွင်း ကန်ဒေါ်လာ ၃ ဒသမ ၅ သန်းဖြင့် အရောင်းအဝယ်ပြုလုပ်ခဲ့ခြင်းဖြစ်ပြီး ၂၀၁၅ ခုနှစ် စက်တင်ဘာတွင် ၅ ဒသမ ၆ သန်းဖြင့် အရောင်းဈေးကွက်တင်ခဲ့ခြင်း ဖြစ်သည်။

၁၉၂၃ ခုနှစ်တွင် ဆောက်လုပ်ခဲ့ခြင်းဖြစ်ပြီး မကြာသေးမီကမှ ပြန်လည်မွမ်းမံခဲ့သည်။
နေအိမ်အတွင်း သစ်မာသားများဖြင့် ကြမ်းခင်းပြုလုပ်ထားပြီး မီးလင်းဖို ၅ ခု ပါဝင်သည်။

နေအိမ်အတွင်းတွင် အိပ်ခန်း ၆ ခန်း ပါဝင်ခြင်းကြောင့် အိုင်ဗန်ကာတို့သည် ကလေး ၃ ဦးကိုပါ ခေါ်ဆောင်လာကာ အခြေချမည်ဟု ခန့်မှန်းကြသည်။
ကာလိုရာမာသည် စားသောက်ဆိုင်များ ပေါများသည့် ကွန်နက်တီကပ်ရိပ်သာလမ်းနှင့် ထိစပ်နေပြီး ဝါရှင်တန်ရှိ ပုဂ္ဂလိက သီးသန့်စာသင်ကျောင်းများနှင့်လည်း နီးကပ်စွာတည်ရှိသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)