ကောက်ယူမွေးစားသည့် သားသမီးထံမှ မြေနှင့်အိမ်ကို ၀ယ်မည်ဆိုလျှင်

'မြေနဲ့ အိမ်ဝယ်ဖို့ သွားစုံစမ်း လိုက်တော့...'

''ဘာပြဿနာရှိနေလို့လဲ'' မိတ်ဆွေ၏ စကားမဆုံးမီမှာ စာရေးသူက မေးခွန်းထုတ်လိုက်ခြင်း ဖြစ်သည်။

''ပိုင်ရှင်အဘိုးကြီးကတော့ ဆုံးသွားပြီ။ အခုနေတဲ့ မွေးစားသားက ရောင်းမှာတဲ့''

''မွေးစားသားဆိုတော့ ကိတ္တိမ စာချုပ်နဲ့ မွေးစားထားတာလား''

''အဲဒါတော့ သေချာမသိဘူး။ မွေးစာသားဆိုလို့ ကန့်ကွက်ရန် ရှိ၊မရှိ သတင်းစာထဲမှာ ကြေညာလိုက်တယ်''

''ဒီတော့ ကန့်ကွက်သူ ပေါ်လာတယ်ပေါ့''

''ပိုင်ရှင် အဘိုးကြီးရဲ့ ဇနီးဆိုပြီး ကန့်ကွက်လာတယ်။ အဲဒါ ဘယ်လို ဖြစ်နိုင်သလဲလို့''

''သူငယ်ချင်းကို မေးမယ့် မေးခွန်းလေးတွေ ဖြေရင်းနဲ့ အဖြေ ရလာပါလိမ့်မယ်။ ကဲ- ပထမဦးဆုံး မြေကွက်က ဂရန်မြေပဲလား၊ အမည်ပေါက်က ဘယ်သူလဲ''

''ဂရန်အမည်ပေါက်ကတော့ ကွယ်လွန်သွားတဲ့ အဘိုးကြီး အမည်နဲ့ ဖြစ်တယ်''

''မွေးစား အဖေလို့ ပြောရမှာပေါ့ မဟုတ်ဘူးလား။ မွေးစား အဖေရဲ့ အမည်တစ်ဦးတည်း အမည်ပေါက် ဆိုရင်၊ သူ့ဇနီးက အမွေဆက်ခံမှာပေါ့''

''အခုဇနီးက ဒုတိယဇနီးလို့ သိရတယ်။ ပထမဇနီးကလည်း ကွယ်လွန်သွားပြီဖြစ်တယ်လို့ ပြောတယ်''

''ဒါဆိုရင် မွေးစားသားနဲ့ မိထွေးတို့ရဲ့ အမွေဆက်ခံရေး ဖြစ်နေတာပေါ့''

''မွေးစားသားက ရပိုင်ခွင့်ရှိရဲ့လား''

''မြန်မာ့ဓလေ့ထုံးတမ်း ဥပဒေ အရဆိုရင် မြန်မာဗုဒ္ဓဘာသာဝင်များဟာ သားသမီးမွေးစားခြင်း (၄)မျိုး ရှိတယ်။ ကိတ္တိမ မွေးစားခြင်း (အမွေခံ သားသမီးအဖြစ် မွေးစားခြင်း) နဲ့ အပတိဋ္ဌ မွေးစားခြင်း (ကောက်ယူမွေးစားခြင်း) နှစ်မျိုးသာ မွေးစားမိဘများထံမှ အမွေခံထိုက်တဲ့ သားသမီးများလို့ သတ်မှတ်ထားတယ်''

''ကိတ္တိမ မွေးစားခြင်းက မှတ်ပုံတင်စာချုပ် ချုပ်မှ တရားဝင် အမွေဆက်ခံခွင့်ရတယ်ဆိုတာ ဟုတ်သလား''

''ဟုတ်ပါတယ်။ ကိတ္တိမ မွေးစားခြင်း မှတ်ပုံတင် အက်ဥပဒေ အရ စာချုပ်စာတမ်းရုံးမှာ ကိတ္တိမ မွေးစားစာချုပ်ကို မှတ်ပုံတင်ချုပ်ဆိုမှ တရားဝင် အတည်ဖြစ်ပြီး မွေးစားခံရသူဟာ မွေးစားမိဘတို့ရဲ့ သားရင်း၊ သမီးရင်းတို့နဲ့ တန်းတူ အမွေဆက်ခံခွင့် ရရှိလာမှာ ဖြစ်ပါတယ်''

''ကိတ္တိမ မွေးစားစာချုပ်နဲ့ မွေးစားခြင်း မဟုတ်ရင်တော့ ကောက်ယူမွေးစားခြင်း ဖြစ်သွားနိုင်တာပေါ့နော်''

''မှန်ပါတယ်။ ကောက်ယူမွေးစားခြင်းခံရတဲ့ သားသမီးတွေကတော့ မွေးစားမိဘမှာ သားသမီး၊ မြေး၊ မြစ်၊ ကိတ္တိမ မွေးစား သားသမီးတွေ မရှိမှသာ အမွေခံစားခွင့် ရှိမှာ ဖြစ်တယ်''

''ဒါဆိုရင် အခုကိစ္စမှာ မွေးစားသားက၊ ကိတ္တိမ မွေးစားစာချုပ်နဲ့ မွေးစားထားခြင်း ဟုတ်၊မဟုတ် အရင်စုံစမ်းရမှာပေါ့''

''ဟုတ်ပါတယ်။ ကိတ္တိမ မွေးစားသား ဖြစ်မယ်ဆိုရင်တော့ သားရင်း သမီးရင်းကဲ့သို့ အမွေဆက်ခံခွင့်ရမှာ ဖြစ်တယ်။ မွေးစားမိဘ နှစ်ဦးအနက်၊ တစ်ဦးဦး ကွယ်လွန်ပြီးနောက်မှာ ကျန်ရစ်တဲ့ မွေးစားမိဘက နောက်အိမ်ထောင်ပြုမယ် ဆိုရင် နောက်အိမ်ထောင်ပြုတဲ့ အချိန်ကစပြီး မွေးစားသားသမီးက အမွေတောင်းခံခွင့် ရှိမှာဖြစ်တယ်''

''အခု အိမ်နဲ့မြေကို ရောင်းမယ်ဆိုတဲ့ သူ့ကို အဘိုးကြီးကနေ ကိတ္တိမ သားအဖြစ် တရားဝင် စာချုပ်နဲ့ မွေးစားခဲ့မယ်ဆိုရင် မိထွေးဖြစ်သူနဲ့ အမွေခွဲဝေယူရမယ့် သဘောပေါ့''

''မှန်ပါတယ်''

''ဒါနဲ့ ကောက်ယူမွေးစားတဲ့ သားသမီးဆိုရင်ကော''

''အစောက ပြောခဲ့သလို အပတိဋ္ဌ သားသမီး၊ ကောက်ယူမွေးစားတဲ့ သားသမီးမျိုး ဖြစ်ရင်တော့ မွေးစားမိဘရဲ့ သားသမီး မြေး၊ မြစ်၊ ကိတ္တိမ မွေးစားသားသမီး မရှိမှသာ အမွေဆက်ခံခွင့် ရမှာဖြစ်တယ်။ မွေးစားမိဘရဲ့ ဇနီး၊ ခင်ပွန်း ရှိခဲ့ရင်တော့ မွေးစားမိဘရဲ့ ဇနီး၊ ခင်ပွန်းကပဲ ရခွင့်ရှိမှာ ဖြစ်တယ်''

''ကောက်ယူမွေးစားတဲ့ သားသမီးက မွေးစားမိဘနဲ့ အတူနေရင်လည်း မိထွေးနဲ့ယှဉ်ရင် ဆုံးရှုံးနိုင်တယ်ပေါ့''

''ကောက်ယူမွေးစားတဲ့ သားသမီးဟာ ကိတ္တိမ သားသမီးတို့ရဲ့ အခွင့်အရေးနဲ့ မတူဘူး။ မွေးစားမိဘနဲ့ အတူနေဖို့ လိုအပ်တယ်။ မွေးစားမိဘနဲ့ ခွဲခြားနေထိုင်ရင် အမွေဆက်ခံခွင့် ဆုံးရှုံးခံရမယ်လို့ ဥပဒေမှာ ပြဋ္ဌာန်းထားတယ်။ ဒါကြောင့် ကောက်ယူမွေးစားတဲ့ သားသမီးတွေဟာ မွေးစားမိဘနဲ့အတူ နေဖို့တော့ လိုတယ်''

''အခုအိမ်မြေရောင်းမယ်ဆိုတဲ့ သူအနေနဲ့ကတော့ ကိတ္တိမ မွေးစားစာချုပ်နဲ့ ချုပ်ဆိုထားတာ မဟုတ်ဘူးလို့ တစ်ဖက်က ကန့်ကွက်ထားတာ ရှိတယ်။ ဒီတော့ ကောက်ယူမွေးစားသားလို့ပဲ ယူဆရမယ့် သဘောဖြစ်နေတယ်။ အဲဒီလိုဆိုရင် မိထွေးကပဲ အမွေဆက်ဆံခွင့် ရမယ်ပေါ့။ ဒီလိုသဘောမျိုးလား''

''ဒါနဲ့ ပတ်သက်လို့ သူငယ်ချင်းကို ရှင်းအောင် ပြောပြရမယ်ဆိုရင် တရားရုံးချုပ်က ဆုံးဖြတ်ထားတဲ့ မစောမြ (ခ) မသန်းနွဲ့နှင့် မချိုချိုမာ ပါ နှစ်ဦး၊ ၁၉၈၁ ခုနှစ် မြန်မာနိုင်ငံ တရားစီရင်ထုံး စာမျက်နှာ ၂၅ အမှုမှာ မစောမြသည် ကွယ်လွန်သူ ဦးလှရွှေ၏ ဇနီးဖြစ်သဖြင့် အပတိဋ္ဌ သမီးဖြစ်သော မချိုချိုမာသည် မိထွေးဖြစ်သူ မစောမြနှင့် ယှဉ်ပြိုင်၍ မွေးစား ဖခင်ဦးလှရွှေ၏ အမွေကို ခံစားခွင့် မရှိ''ဆိုပြီး ဆုံးဖြတ်ထားပါတယ်။ ဒါကြောင့် အခုရောင်းမယ်ဆိုတဲ့ မွေးစားသားဟာ ကောက်ယူ မွေးစားသားဖြစ်ရင်တော့ မိထွေးနဲ့ ယှဉ်ရင် အမွေရခွင့်ရှိမှာ မဟုတ်ဘူး။ ဒါပေမယ့် အမွေဆိုင်မြေနဲ့ အိမ်မှာ မွေးစားသားကနေပြီး မိထွေးဖြစ်သူက သီးခြားနေတယ် ဆိုတာက စဉ်းစားစရာ ဖြစ်နေတယ်''

''မွေးစားသားပြောတဲ့ စကား အရတော့ မွေးစားအဖေက သူ မသေခင်ကတည်းက အဲဒီမိန်းမနဲ့ ကွဲသွားပြီး အမွေလည်း ခွဲပေးလိုက်တယ် ပြောတယ်။ သူက မွေးစားအဖေနဲ့ အတူနေ ပြုစုခဲ့တာလို့ ပြောတာပဲ''

''သူပြောတဲ့အတိုင်း တရားဝင် ကွာရှင်းပြီး ပစ္စည်းခန်းပါ ခွဲဝေပြီးပြီ ဆိုရင်တော့ အခု အိမ်နဲ့ မြေဟာ မွေးစားသားက ရပိုင်ခွင့်ရှိမှာဖြစ်တယ်။ ဒီတော့ အစစအရာရာ အသေးစိတ်စုံစမ်းပြီးမှ ဝယ်သင့်တယ် သူငယ်ချင်း''ဟု အကြံပြု ဆွေးနွေးပေးလိုက်ရင်း ဗဟုသုတ အဖြစ် ရေးသားလိုက်ပါသည်။

Credit : ထီယု(ဥပဒေအတိုင်ပင်ခံ)