၅၁ လမ်းကွန်ဒိုအိမ်ရာသစ်အတွင်း ယခင်တိုက်ခန်းနေ ပြည်သူများကို နေရာပြန်ချထားပေး

အိမ်ရာများပြန်လည်ဖွံ့ဖြိုးရေးအစီအစဉ်အရ ဆောက်လုပ်ရေးဝန်ကြီးဌာနနှင့် ပုဂ္ဂလိက ကုမ္ပဏီနှစ်ခုတို့ အကျိုးတူပူးပေါင်းဆောင်ရွက်မှုဖြင့် ဆောက်လုပ်ပြီးစီးခဲ့သော ကွန်ဒိုနှစ်လုံးတွင် ယခင်တိုက်ခန်းနေပြည်သူများအတွက် နေရာပြန်လည်ချထားပေးမှုကို ရန်ကုန်မြို့ ၅၁ လမ်းတွင် ယနေ့နံနက်က ပြုလုပ်ခဲ့သည်။
ဗိုလ်တထောင်မြို့နယ် ၅၁ လမ်း ကွန်ဒိုအိမ်ရာသစ်အတွင်း ခေတ်မီလုံခြုံရေးစနစ်တပ်ဆင် ထားသော ဓာတ်လှေကားများအပါအဝင် ကားပါကင်များ၊ ကလေးကစားကွင်းများ၊ ကာရာအိုကေ ခန်းများ၊ ကော်ဖီဆိုင်များ၊ ဘိလိယက်ခုံများ ၊ အစည်းအဝေးခန်းများ၊ အားကစားလေ့ကျင့်ခန်းများ၊ အပန်းဖြေ ရေကန်ငယ်များနှင့် မျက်မမြင်အနှိပ်ခန်းများလည်းပါရှိသည်။ ဆောက်လုပ်ရေးဝန်ကြီးဌာန ဒုတိယဝန်ကြီး ဒေါက်တာဝင်းမြင့်က ''ယခင်အဆောက်အအုံအဟောင်းဟာ ၅၈ နှစ်ခန့် သက်တမ်းကြာခဲ့တာမို့ အိမ်ရာများပြန်လည်ဖွံ့ဖြိုးရေးအစီအစဉ်များအရ ပြည်ထောင်စုအစိုးရ အဖွဲ့ကိုတင်ပြပြီး ခွင့်ပြုချက်ရယူကာ ပထမဦးဆုံးဆောင်ရွက်ခဲ့တဲ့ Pilot Project ဖြစ်ပါတယ်''ဟု ပြောကြားသည်။

''လုပ်ငန်းဆောင်ရွက်စဉ် ကာလမှာလည်း မိသားစုများယာယီနေထိုင် အဆင်ပြေစေရေးအတွက် ကာလပေါက်ဈေးအတိုင်း အိမ်ငှားစရိတ်များ၊ ပြောင်းရွေ့စရိတ်များ ထုတ်ပေးခဲ့ပါ တယ်''ဟု ဒုတိယဝန်ကြီးက ဆက်လက်ပြောကြားသည်။ မူလအိမ်ခန်းတစ်ခန်းလျှင် စတုရန်းပေ ၄ဝဝ ခန့်သာ ကျယ်ဝန်းသော်လည်း တိုက်သစ်များတွင် တစ်ခန်းလျှင် စတုရန်းပေ ၆ဝဝ ကျယ်ဝန်းသည်။ အောင်မြင်ပြည့်စုံ ဆောက်လုပ်ရေးကုမ္ပဏီမှ ဆောက်လုပ်သည့် ကွန်ဒို၌ အခန်းပေါင်း ၁၉၇ ခန်းပါဝင်ကာ မဟာနဝရတ်မြေ မိသားစု ဆောက်လုပ်ရေးကုမ္ပဏီမှ ဆောက်လုပ်သည့် ကွန်ဒို၌ အခန်းပေါင်း ၁၈၁ ခန်း ပါဝင်သည်။တိုက်ခန်းနေ ပြည်သူဖြစ်သော ကိုအောင်ခိုင်က ''အခုဆိုရင်တာဝါ A နှင့် B က တိုက်ခန်းနေပြည်သူများ ပြန်လည်နေထိုင်နေကြပါပြီ။ အားလုံး အဆင်ပြေပါတယ်။ အခုလို ကျွန်တော် တို့ တိုက်ခန်းနေပြည်သူများအတွက် အဆင့်မြင့်တိုက်ခန်းများ ဆောင်ရွက် ပေးလိုက်လို့ တာဝန်ရှိသူများအားလုံးကို အထူးကျေးဇူးတင်ပါတယ်''ဟု ပြောသည်။

အဆိုပါ အိမ်ရာတိုက်ခန်းများမှာ ယခင် ၁၉၅၄-၅၅ ခုနှစ်က အိမ်ခန်း တစ်ခန်းလျှင် စတုရန်းပေ ၄ဝဝ ခန့်ရှိ ၈ ခန်းတွဲ ၄ ထပ်တိုက်များ ဖြစ်ပြီး အိမ်ထောင်စုဝင် ၂၂၄ ဦး နေထိုင် ခဲ့ကြသည်။ ဆောက်လုပ်ရေးဝန်ကြီးဌာန မြို့ရွာနှင့် အိုးအိမ်ဖွံ့ဖြိုးရေး ဦးစီးဌာနနှင့် ဆောက်လုပ်ရေး ကုမ္ပဏီ နှစ်ခုတို့ သဘောတူစာချုပ်ချုပ်ပြီး နောက် နှစ်နှစ်တာ ကာလအတွင်း အိမ်ရာသစ်စီမံကိန်း ဖြစ်ပေါ် ခဲ့ခြင်း ဖြစ်ကြောင်း မြို့ရွာနှင့် အိုးအိမ်ဖွံ့ဖြိုး ရေးဦးစီးဌာနမှ သိရသည်။

Credit: MOI Webportal Myanmar