စံနှုန်းနှင့်မညီသော ဆောက်လုပ်ရေး ကုမ္ပဏီများကို အမည်ပျက်စာရင်း သွင်းမည်

သတ်မှတ် စံချိန်စံနှုန်းနှင့်အညီ တည်ဆောက်ခြင်းမရှိသော ဧရာဝတီတိုင်း ဒေသကြီးအတွင်းမှ ဆောက်လုပ်ရေး ကုမ္ပဏီများကို အမည်ပျက်စာရင်း (Black list ) သွင်း ဆောင်ရွက်သွားမည်ဟု တိုင်းဒေသကြီး အစိုးရအဖွဲ့အတွင်းရေးမှူး ဦးအေးကျော်က ပြောကြားလိုက်သည်။

အောက်တိုဘာလ (၁၇)ရက်နေ့က ပုသိမ်ကြီး ဧရာရွှေဝါခန်းမတွင် ဧရာဝတီတိုင်း ဒေသကြီးအတွင်းမှ ဆောက်လုပ်ရေး ကုမ္ပဏီပိုင်ရှင်များကို ခေါ်ယူတွေ့ဆုံ ပြောကြားလိုက်ခြင်း ဖြစ်သည်။

“သတ်မှတ်ထားတဲ့ ဒီဇိုင်းပုံစံ စံချိန်စံနှုန်းနဲ့အညီ သတ်မှတ်ကာလအတွင်း ဆောက်လုပ်ပေးရမှာ ဖြစ်ပါတယ်။ အထူးမှာကြား လိုတာကတော့ ဧရာဝတီတိုင်းအတွင်း ဆောက်လုပ်ရေး ကုမ္ပဏီများ အနေဖြင့် Sub ကန်ထရိုက်ပေးပြီး မဆောင်ရွက်ဖို့လည်း တင်ပြလိုပါတယ်။ ယင်းကဲ့သို့ ဆောင်ရွက်ခြင်း ကြားသိရရင် နာမည်ပျက်စာရင်း Black list စာရင်းသွင်း ဆောင်ရွက်သွားမှာပါ”ဟု ၎င်းကပြောသည်။

ဧရာဝတီတိုင်း ဒေသကြီးအတွင်း ကန်ထရိုက် ရယူထားသော အချို့ကုမ္ပဏီများမှ တာဝန်ရှိသူများသည် ရပ်ဝေးဒေသများတွင် နေထိုင်ပြီး အဆောက်အဦ ဆောက်လုပ်ရာနေရာများ လက်သမား ခေါင်းဆောင်၊ ပန်းရံခေါင်းဆောင်များဖြင့် စေခိုင်းထားသည်ဟု ဦးအေးကျော်က ထည့်သွင်း ပြောကြားခဲ့သည်။

အဆောက်အဦ ကန်ထရိုက်ယူထားသည့် ကုမ္ပဏီများအနေဖြင့် အဆောက်အဦ၏ ကြံ့ခိုင်မှုကို (၅)နှစ် အာမခံရန်လည်း တက်ရောက်လာသော ကုမ္ပဏီပိုင်ရှင်များကို တိုက်တွန်းခဲ့သည်။

“ကျေးလက်ဒေသ ဦးစီးဌာနမှာတော့ နာမည်ပျက်စာရင်းသွင်းတဲ့ ကုမ္ပဏီရယ်လို့ မရှိဘူး။ ဒါပေမဲ့ ပညာရေးဌာန အဆောက်အဦး ဆောက်တဲ့ ကုမ္ပဏီတစ်ခုတော့ Black list သွင်းလိုက်တယ်ကြားတယ်။ ဒီလိုမျိုး အရေးယူခံရတဲ့ ကုမ္ပဏီတွေကိုတော့ လုံးဝကို တင်ဒါတင်ခွင့် မပြုတော့ပါဘူး”ဟု ဧရာဝတီတိုင်းဒေသကြီး ကျေးလက်ဒေသ ဖွံ့ဖြိုးတိုးတက်ရေး ဦးစီးဌာန ညွှန်ကြားရေးမှူး ဦးစိုးသန်းက ပြောသည်။

ယမန်နေ့က ပြုလုပ်ခဲ့သော တိုင်းဒေသကြီးအတွင်းမှ ကုမ္ပဏီပိုင်ရှင်များ တွေ့ဆုံပွဲသို့ ဧရာဝတီတိုင်း ဒေသကြီး ၀န်ကြီး ဦးသိန်းအေးဝင်းနှင့် ဌာနဆိုင်ရာ တာဝန်ရှိသူများ၊ ကုမ္ပဏီလုပ်ငန်းရှင် စုစုပေါင်း (၆၀၀)ခန့် တက်ရောက်ခဲ့သည်။

Credit: messenger