မိမိတို့၏ပိုင်ဆိုင်မှုအတွက် ဥပဒေအရ စိတ်ပိုင်းဆိုင်ရာ လုံခြုံမှု ရရှိစေရန်ရည်ရွယ်၍ ကျေးရွာများက လိုလားလျှင် ညွှန်ကြားချက်နှင့် အညီ မြေငှားဂရန်များ ထုတ်ပေးသွားမည်

မကွေးမြို့နယ်အတွင်း ကျေးရွာနေပြည်သူများအနေဖြင့် မိမိတို့၏ပိုင်ဆိုင်မှုအတွက် ဥပဒေအရ စိတ်ပိုင်းဆိုင်ရာ လုံခြုံမှုများရစေရန်ရည်ရွယ်၍ အခြေအနေ အချိန်အခါ သင့်၍ ကျေးရွာများကလိုလားမှုရှိလျှင် ညွှန်ကြားချက်နှင့်အညီ မြေငှားဂရန်များ ထုတ်ပေးသွားမည်ဖြစ်ကြောင်း အောက်တိုဘာ ၂ ရက် ညနေ ၃ နာရီက ဒဟတ်ကန်ကျေးရွာ သာသနာ့ဝိပုလကာရီကျောင်းတိုက်တွင် ကျင်းပသော ကျေးရွာမြေငှားဂရန် ထုတ်ပေးခြင်းအခမ်းအနား၌ မကွေးမြို့နယ်အုပ်ချုပ်ရေးမှူး ဦးစောထွန်းဦးက ပြောကြားခဲ့သည်။
''ကျေးရွာမှာနေထိုင်သူတွေရဲ့ အိမ်တွေကို ပိုင်ဆိုင်မှု ဂရန်လုပ်ပေးခြင်းဖြင့် ပိုင်ဆိုင်မှုနယ်နိမိတ် အတိုင်းအတာ တိတိကျကျသိမယ်။ မိမိတို့နေထိုင်တဲ့အိမ်ဝိုင်းဟာ သားစဉ် မြေးဆက် လွှဲပြောင်းလို့ရ၊ ရောင်းချလို့လည်းရတယ်။

ဒို့မြေဒို့ ပိုင်တယ်၊ ဘယ်သူမှ ကျူးလို့မရဘူး၊ ကျော်လို့မရဘူးဆိုတဲ့ အသိနဲ့ ဥပဒေဆိုင်ရာအရ စိတ်ပိုင်းဆိုင်ရာ လုံခြုံမှုရရှိမှာပဲ ဖြစ်ပါတယ်။ မကွေးမြို့နယ်အတွင်း ကျေးရွာ ၁၄၆ ရွာအနက် ဒဟတ်ကန်ရွာမှာ ပထမဆုံးစမ်းသပ်ပြီး ကျေးရွာမြေငှားဂရန်တွေ ထုတ်ပေးတဲ့အခါမှာ အောင်မြင်မှုရှိတာကို တွေ့ရပါတယ်။ ဒီရွာလိုပဲ ပြဿနာအရှုပ်အရှင်းနည်းမယ်။ နောက်ဆက်တွဲ ပြဿနာမရှိဘူးဆိုရင် တစ်ရွာပြီးတစ်ရွာ ပေးသွားမယ့်အစီအစဉ် ရှိပါတယ်။ အခြေအနေ အချိန်ခါ
သင့်ရင် ကျေးရွာများကလည်းလိုလားရင် ညွှန်ကြားချက်နဲ့ အညီ မြေငှားဂရန်တွေ ထုတ်ပေးသွားမှာပါ'' ဟု မကွေးမြို့နယ်အုပ်ချုပ်ရေးမှူး ဦးစောထွန်းဦးက ပြောသည်။

ဒဟတ်ကန်ကျေးရွာအတွင်း မူလမြေကွက် ၁၄၅ ကွက်တွင် ယာမြေပေါ်ရှိ အခြားနည်းဖြင့် အသုံးချခွင့်လျှောက်ထားသည့် အကွက်၊ ကားလမ်းဘေး လမ်းဧရိယာနှင့် မလွတ်သည့် အကွက်နှစ်ကွက်၊ ဂရန်ထုတ်ပေး၍မရသော ဝ ဒသမ ဝ၂ ဧက၊ ပေ (၂ဝ x ၄ဝ ) မပြည့်သောအကွက်နှစ်ကွက်၊ ပိုင်ဆိုင်မှုအငြင်းပွားသည့် အကွက်သုံးကွက်၊ လူမနေ ဆက်သွယ်၍မရသည့် အကွက်နှစ်ကွက်မှလွဲ၍ ကျန်မြေ ၁၃၅ ကွက်အား တာဝန်ရှိသူများမှ ၁ဝ နှစ် သက်တမ်းရှိ ကျေးရွာမြေငှားဂရန်များ ထုတ်ပေးခဲ့ခြင်းဖြစ်ပြီး မြို့ပြပုံစံအတိုင်း အကွက်ရိုက်ပေးခြင်းမဟုတ်ဘဲ ကျေးရွာဒေသခံများက မူလပိုင်ဆိုင်သည့်မြေကို တိုင်းတာကာ ပိုင်ဆိုင်မှုအကျယ်အဝန်း အရှိအတိုင်းကို အထက်မြန်မာပြည် မြေနှင့်အခွန်
ဥပဒေပုဒ်မ ၅၁ (က) အရလည်းကောင်း၊ အောက်မြန်မာ
ပြည် မြေနှင့်အခွန်ဥပဒေပုဒ်မ ၂၉ အရလည်းကောင်း ကျေးရွာမြေငှားဂရန်များ ထုတ်ပေးခြင်းဖြစ်ကြောင်းတာဝန်ရှိသူတစ်ဦးက ပြောကြားခဲ့သည်။

မြေငှားဂရန်ချထားပေးမှုနှင့်ပတ်သက်၍ ဒေသခံတစ်ဦးဖြစ်သူ မဖြိုးဖြိုးဝင်းက ''အစ်မခံစားချက်ကို ပြောပါဆိုရင်တော့ ပျော်တာပေါ့။ အရင်က ယာစရိတ်လိုလို့ ချေးရင် ငါးကျပ်တိုး၊ တစ်ဆယ်တိုးချေးလို့လွယ်တာမဟုတ်ဘူး။ ဂရန်ထုတ်မပေးခင်တုန်းက ဝိုင်းဈေးက သိပ်မရှိဘူး။ ဂရန်ထုတ်ပေးမယ်ကြားကတည်းက ဈေးတွေကောင်းလာတာ။ ခုတကယ်ထုတ်ပေးတော့ ဈေးကောင်းပိုရပြီပေ့ါ။ ခုဆိုရင် ပေ (၈ဝx၆ဝ) တစ်ကွက်ကို သိန်း ၈ဝ လောက် တန်ကုန်
ပြီ။ ယာစရိတ်လိုရင် ငွေချေးဖို့ အာမခံချက်ကောင်းကောင်း ရပြီပေါ့'' ဟု ပြောသည်။

ဒဟတ်ကန်ကျေးရွာ ဒေသခံများအတွက် ကျေးရွာမြေငှားဂရန်များအား မကွေးတိုင်းဒေသကြီးလွှတ်တော်ကိုယ်စားလှယ် ဦးဟန်မောင်၊ မကွေးခရိုင်အုပ်ချုပ်ရေးမှူး ဦးအုန်းသန်းနှင့် တာဝန်ရှိသူများက စာရွက်စာတမ်းဖိုး ကုန်ကျစရာမလို၊ မြို့တစ်ခေါက်မှ လာစရာမလိုဘဲ လက်ဝယ်အရောက် လာရောက်ပေးအပ်ခဲ့ခြင်းဖြစ်ပြီး ကျေးရွာအနေဖြင့် မြေငှားဂရန်ရရှိပြီးဖြစ်၍ စည်ပင်သာယာနယ် နိမိတ်အတွင်း သွတ်သွင်းခြင်း၊ ပြည်ထဲရေးဝန်ကြီးဌာန ခွင့်ပြုချက်ဖြင့် မြို့ရပ်ကွက် ပြင်ဆင်ဖွဲ့စည်းသည့်အခါ မြို့ရပ်ကွက်အတွင်း ထည့်သွင်းခြင်းများ၊ ဆောင်ရွက်နိုင်သည့် အခွင့်အလမ်းတို့ ရရှိလာမည်ဖြစ်ကြောင်း သိရသည်။

Credit: MOI Webportal Myanmar