ရန်ကုန်မြို့နေ လူထု၏ မြို့ပြမွန်းကျပ်မှုများကို ဖြေလျှော့နိုင်ရန်နှင့် လူနေမှုဘဝ အရည်အသွေးကို မြှင့်တင်နိုင်ရန် နေရာလွတ်များ၊ လျှောက်လှမ်းသွားလာရ လွယ်ကူသည့် နေရာများ ဖန်တီးပေးရန်လိုကြောင်း မြို့ပြပညာရှင်များက ရန်ကုန်မြို့ပြ ရှေးဟောင်းအမွေအနှစ်များ ထိန်းသိမ်းခြင်းဆိုင်ရာ ဆွေးနွေးပွဲတွင် တောင်းဆိုလိုက်သည်။
“ရန်ကုန်မြို့ထဲမှာ ၁၉ လမ်း၊ လမ်း ၂ဝ တွေက လမ်းကျဉ်းတွေ၊ စဥ့်အိုးတန်းလမ်းက လမ်းလတ်၊ လသာလမ်းက လမ်းကျယ်တွေ ဖြစ်တယ်။ အဲဒီလမ်းတွေက အင်္ဂလိပ်တွေ တည်ဆောက်ခဲ့စဉ်က နှစ်ထပ်တိုက် အဆောက်အအုံတွေအတွက် ရည်ရွယ်ခဲ့တဲ့လမ်းတွေ ဖြစ်တယ်။ အခုက ခြောက်ထပ်၊ ခုနစ်ထပ် ကန်ထရိုက်တိုက်တွေ ဖြစ်နေပြီး လူနေသိပ်သည်းမှုက တအား တိုးလာခဲ့တယ်။ အဲဒီ အဆောက်အအုံတွေကလည်း နေမယ့်သူတွေအတွက် လူနေမှု အဆင်ပြေအောင် ထည့်တွက်မှု အရမ်းအားနည်းနေပါတယ်” ဟု ရန်ကုန်မြို့တွင်းရှိ လူနေအဆောက်အအုံများ၏ အခြေအနေကို ဆောက်လုပ်ရေးဝန်ကြီးဌာန၊ မြို့ပြစီမံကိန်း ရေးဆွဲရေးပညာရှင် ဒေါ်လှိုင်မော်ဦးက ပြောကြားသည်။
အဆိုပါ ကန်ထရိုက်တိုက် အဆောက်အအုံများမှာ အလင်းရောင် လုံးဝမဝင်ခြင်း၊ လေဝင်လေထွက် မကောင်းခြင်း၊ ကျဉ်းမြောင်းလွန်းနေခြင်း စသည့်အခြေအနေများကြောင့် မြို့နေလူထု၏ လူနေမှု အရည်အသွေး မြင့်မားလာစေရန် မြို့တွင်းအခြေခံ အဆောက်အအုံများ ဖွံ့ဖြိုးလာစေရန် လုပ်ဆောင်သင့်ကြောင်း မြို့ပြပညာရှင်များက အကြံပြုခဲ့ကြသည်။
ရန်ကုန်မြို့သည် လူနေသိပ်သည်းမှု အဆမတန် တိုးပွားလာသည့်နည်းတူ မြို့တွင်းဧရိယာများတွင် လူအများ သက်သောင့်သက်သာ လျှောက်လှမ်းသွားလာနိုင်သည့် အနေအထား မရှိတော့သလို စိတ်ကျဉ်းကျပ်မှုကို သက်သာစေမည့် နေရာလွတ်များလည်း မရှိတော့သည့် အနေအထားသို့ ရောက်ရှိနေပြီဖြစ်သည်။
ထို့ကြောင့် ရန်ကုန်မြို့နေ လူထု၏ လူနေမှုဘဝ အရည်အသွေး မြှင့်တင်နိုင်ရန် အဆိုပါကိစ္စများကို ဖြေရှင်းပေးရန် မြို့ပြပညာရှင်များက တောင်းဆိုခဲ့ခြင်းဖြစ်သည်။
ထို့အတူ ရန်ကုန်မြို့ရှိ မြစ်ရှုခင်း ဆိပ်ကမ်းဧရိယာများသည် အများပြည်သူအတွက် အသုံးချမှု နည်းပါးပြီး အစိုးရ အဖွဲ့အစည်းများကသာ ထိန်းချုပ်နေကြကြောင်း၊ ထို့အတွက် အများပြည်သူ အပန်းဖြေနိုင်သည့် မြစ်ကမ်းရှုခင်း ဧရိယာများ ဖန်တီးပေးသင့်ကြောင်း မြို့ပြပညာရှင်များက ထောက်ပြထားသည်။
ထိုသို့ ရန်ကုန်မြို့၏ ဆိပ်ကမ်းဧရိယာများတွင် မြစ်ရှုခင်းကို ကြည့်ရှုခံစားနိုင်စေရန်၊ အပန်းဖြေနိုင်စေရန် နောင်တွင် အကောင်အထည်ဖော်မည့် စီမံကိန်းများကို မြစ်ကမ်းဘေးနှင့် ၂၅ ပေခွာပြီး လုပ်ကိုင်ခွင့်ပြုရန်လည်း မြို့ပြပညာရှင်များက အကြံပြုထားသည်။
ရန်ကုန်မြစ်ကမ်းနံဘေးတွင် အများပြည်သူ အပန်းဖြေနိုင်သည့်နေရာမှာ ဗိုလ်တထောင်ဆိပ်ကမ်း အနီးတစ်ဝိုက် နေရာအနည်းငယ်သာရှိပြီး ထိုနေရာကိုပင် ရေပေါ်ဟိုတယ် ဆောက်လုပ်ကာ နေရာကန့်သတ်လိုက်သဖြင့် အများပြည်သူ အပန်းဖြေနိုင်သည့် ဧရိယာမှာ ပိုမိုကျဉ်းမြောင်းသွားကြောင်း သိရသည်။
ယင်းနှင့်ပတ်သက်၍ “လက်ရှိရန်ကုန်မြို့၏ ဆိပ်ကမ်းဧရိယာတွေမှာ မြန်မာ့ဆိပ်ကမ်း အာဏာပိုင်က ဂိုဒေါင်တွေနဲ့ ဖြစ်နေတယ်။ ဒါကြောင့် နောက်ပိုင်းမှာ အဲဒီနေရာတွေမှာ ဘာလုပ်မယ်ဆိုတာ Long Time Plan ရှိဖို့ လိုပါတယ်။ ဆိုလိုတာက အဲဒီနေရာတွေမှာ နောက်ပိုင်း ဘာလုပ်မယ်ဆိုတာ အစိုးရဌာန သဘောတူညီချက်ရော အများပြည်သူကို ချပြီးသား သဘောတူညီချက်တွေ လိုပါတယ်။ အခု ပုသိမ်မှာဆိုရင် ကမ်းနားမှာ ညနေဈေးလးတွေ၊ လမ်းလျှောက်လို့ရတဲ့ နေရာလေးတွေ လုပ်ပေးထားတယ်။ ဆိုလိုတာက ရန်ကုန်မှာလည်း အဲဒီလို လုပ်လို့ရနိုင်တယ်” ဟု ရန်ကုန်မြို့ပြ အမွေအနှစ် ထိန်းသိမ်းရေးအဖွဲ့မှ ဒါရိုက်တာ ဒေါ်မို့မို့လွင်က သုံးသပ်သည်။
Credit: eleven media group
