ရန်ကုန်တွင်၂၀၁၇ ၌ကွန်ဒိုအရေအတွက် တစ်သောင်းကျော်မည် ဟုဆို

အထပ်မြင့် အဆာက်အအုံ ဆောက်လုပ်မှု များပြားသော ရန်ကုန်မြို့တော်တွင် ၂၀၁၇ ခုနှစ်၌ လူနေအထပ်မြင့် ကွန်ဒိုအရေအတွက် တစ်သောင်းကျော်မည် ဖြစ်ကြောင်း Research & Analysis ကုမ္ပဏီ Frontier Myanmar ၏စစ်တမ်းအရ သိရသည်။

“၂၀၁၃ ခုနှစ်ကနေ ၂၀၁၇ ခုနှစ်အတွင်း အဆောက်အအုံ ဆောက်လုပ်မှုက အဲဒီလောက်ထိ ဖြစ်ပေမယ့် ဒီအရေအတွက်က အရမ်းနည်းနေပါသေးတယ်” ဟု အဆိုပါ ကုမ္ပဏီ စီမံခန့်ခွဲရေး အယ်ဒီတာ Mr. Claire Hammond က ပြောဆိုသည်။
၂၀၁၄ ခုနှစ်အတွင်း ရန်ကုန်မြို့တွင်း ဧရိယာတွင် အထပ်မြင့်ကွန်ဒို ဆောက်လုပ်မှု ၃၇ ရာခိုင်နှုန်းရှိပြီး မြို့ပြင်ဧရိယာတွင် ၁၆ ရာခိုင်နှုန်း ရှိကြောင်း အဆိုပါ စစ်တမ်းအရ သိရသည်။

အထပ်မြင့် ဆောက်လုပ်မှုများသည် ပြီးခဲ့သည့် နှစ်များကထက် ယခုနှစ်အတွင်း သုံးဆအထိ မြင့်တက်လာပြီး ၁၂ ထပ်နှင့်အထက် အဆောက်အအုံ ဆောက်လုပ်ခွင့်တွင်လည်း အလုံးရေ ၄၀ နီးပါးအထိ ယခုနှစ်အတွင်း ဆောက်လုပ်ခွင့်ပြုပြီး ဖြစ်ကြောင်း အထပ်မြင့် အဆောက်အအုံ တည်ဆောက်ရေး စီမံကိန်းများ ကြီးကြပ် စစ်ဆေးရေး ပညာရှင်အဖွဲ့ထံမှ သိရသည်။

“အထပ်မြင့် အဆောက်အအုံတွေ ဆောက်လုပ်လာတာတော့ တွေ့နေရပါတယ်။ ပြီးတော့ သူတို့တွေရဲ့ ကြော်ငြာချက်တွေအရ ဘယ်လောက် ရောင်းပြီး ကြောင်းတွေကိုလည်း တွေ့ရပါတယ်။ တကယ်တမ်း အိမ်၊ ခြံ၊ မြေဈေးကွက် ထဲမှာတော့ ဈေးမြင့်တဲ့ အိမ်ရာ ဈေးကွက်ကတော့ မရှိသလောက်ပါပဲ” ဟု Estate Myanmar အိမ်၊ ခြံ၊ မြေ အကျိုးဆောင်လုပ်ငန်း အုပ်ချုပ်မှု ဒါရိုက်တာ ဦးဟိန်းမိုးမြင့်လွင်က ဆိုသည်။

Credit: thevoicemyanmar