ပြည်တွင်းရင်းနှီးမြှုပ်နှံမှု ရာခိုင်နှုန်း ၆ဝ ဖြင့် ဗဟန်းမြို့နယ် ဆရာစံလမ်းမပေါ်တွင် ၂၄ ထပ်ပါ Royal Sayarsan Condominiun အဆင့်မြင့်ကွန်ဒိုအား တည်ဆောက်သွားမည်ဖြစ်ကြောင်း အောက်တိုဘာ ၄ ရက်က ပြုလုပ်ခဲ့သည့် အဆိုပါကွန်ဒို မိတ်ဆက်ပွဲအခမ်းအနားမှ သိရသည်။
Royal Sayarsan Condominium မှ အခန်းများအား တရားဝင် မရောင်းချခင် အချိန်အထိ အခန်းပေါင်း ၅ဝ ကျော်ခန့် ဝယ်ယူရန် ကြိုတင်စာရင်းပေးထားပြီးကြောင်းလည်း သိရသည်။ အဆိုပါကွန်ဒိုတွင် အခန်းပေါင်း ၁၆၄ ခန်း ပါရှိပြီး ဝယ်သူတစ်ဦးထဲမှ အခန်းရှစ်ခန်းအထိ ဝယ်ယူရန် ကြိုတင်စာရင်းပေးထားသူများလည်းရှိကြောင်း သိရသည်။
“ပြည်ပရင်းနှီးမြှုပ်နှံမှုက ရာခိုင်နှုန်း ၄ဝ လောက်ရှိတယ်။ ပြည်တွင်းက ရာခိုင်နှုန်း ၆ဝ လောက်ရှိပါတယ်။ မြှုပ်နှံတဲ့ ပမာဏကတော့ ပြောလို့မရပါဘူး။ တစ်ပေပတ်လည် (1 squarefeet) ကို အနည်းဆုံး သုံးသိန်းလေးသောင်းကနေ အမြင့်ဆုံး သုံးသိန်းကိုးသောင်းအထိ ရှိပါမယ်။ ဈေးကတော့ ထပ်လျော့ဖို့ရှိပါတယ်။ ဒါကတော့ Discount မလုပ်ရသေးတဲ့ဈေးပါ” ဟု Royal Sayarsan Condominium အား ဈေးကွက်မြှင့်တင်ရေးအတွက် တာဝန်ယူဆောင်ရွက်ပေးနေသည့် Min Zin Agency Co.Ltd မှ မန်းနေးဂျင်းဒါရိုက်တာ ဦးကျော်မင်းဇင်က ပြောကြားသည်။
အဆိုပါ ကွန်ဒိုဆောက်လုပ်မည့် နေရာသည် နှစ် ၉ဝ ဂရန်မြေ၊ ဝ ဒသမ ၅ ဧက အကျယ်အဝန်းရှိသော မြေနေရာတွင် ယခုနှစ်ကုန်ပိုင်းတွင် စတင်ကာ တည်ဆောက်မည်ဖြစ်ပြီး၊ ၂ဝ၁၈ ဒီဇင်ဘာလကုန်ပိုင်းတွင် အပြီးတည်ဆောက်ရန် လျာထားကြောင်း သိရသည်။
“ရင်းနှီးမြှုပ်နှံမှုအပိုင်းမှာ မြေရှင်နဲ့ ငွေရှင်ဆိုပြီး ရှိပါတယ်။ မြေရှင်ရှိပြီးသားဆိုတော့ မြေကိုဝယ်စရာ မလိုပါဘူး။ နိုင်ငံခြားရင်းနှီးမြှုပ်နှံမှုပုံစံမျိုး လာတာမဟုတ်ပါဘူး။ ပြည်တွင်းက ပိုများတယ်။ အရင်တုန်းက စိန်၊ ရွှေရတနာ ကုမ္ပဏီတွေက ဆောက်လုပ်ခြင်းဖြစ်ပါတယ်။ ဟောင်ကောင်က ရင်းနှီးမြှုပ်နှံမှုရဲ့ ၃ဝ၊ ၄ဝ ရာခိုင်နှုန်းလောက် ပါပါတယ်” ဟု ၄င်းက ဆက်လက်ပြောကြားသည်။
နှစ် ၉ဝ ဂရန်မြေပေါ်မှာ တည်ဆောက်မည့် Royal Sayarsan Condominium သည် ဂရန်မြေရရှိသည့် နှစ်ကာလကြာမြင့်ပြီဖြစ်သော်လည်း ဂရန်မြေက သက်တမ်းကုန်ဆုံးပါက သက်တမ်းတိုးရန် လိုအပ်မည်ဖြစ်ကြောင်း သိရသည်။
“နှစ် ၉ဝ ဂရန်မြေပေါ်မှာ ဆောက်မှာဖြစ်ပြီးတော့ ဂရန်မြေသက်တမ်းကုန်လို့ သက်တမ်းတိုးမယ်ဆိုရင် ထပ်တိုးမယ့်သက်တမ်းက နှစ် ၆ဝ ရမလား၊ နှစ် ၉ဝ ရမလား ဆိုတာကတော့ အစိုးရပေါ်မှာ မူတည်ပါတယ်” ဟု ဦးကျော်မင်းဇင်က ဆိုသည်။
Royal Sayarsan Condominium ကို ရင်းနှီးမြှုပ်နှံသူအဖြစ် သန်းထိုက်လူ ကျောက်မျက်ရတနာ သတ္တုတွင်းနှင့် ဆောက်လုပ်ရေးကုမ္ပဏီ၊ လင်းရီဆောက်လုပ်ရေး ကုမ္ပဏီတို့က ဖော်ဆောင်ခြင်းဖြစ်ပြီး၊ တရုတ်ကုမ္ပဏီ Chang Geng Enviromental Construction Co.Ltd နှင့် ဟောင်ကောင်ကုမ္ပဏီ HK City Sunshine တို့က တာဝန်ယူဆောက်လုပ်မည်ဖြစ်ကြောင်း သိရသည်။
Credit: Eleven Media
