ပစ္စည်းလွှဲပြောင်းရေး ဥပဒေနှင့် စပ်လျဉ်း၍ လိုက်နာဆောင်ရွက်ရမည့် အချက်အလက်များ

ပစ္စည်းလွှဲပြောင်းရေး အက်ဥပဒေပုဒမ-၅၃(က)အရ တံဆိပ်ခေါင်းခွန် ထမ်းဆောင်ထားခြင်းမရှိသော စာချုပ်တစ်စောင်ကို အသုံးပြုခွင့်မရှိပေ။ မြေကွက်အား လွှဲပြောင်းရောင်းချရာတွင်လဲ လက်ရောက်ပေးအပ်ခြင်းဖြင့် အရောင်းအဝယ်အထမမြောက်သေးပါ။ မရွှေ့မပြောင်းနိုင်သော ပစ္စည်းဖြစ်ပါက ပစ္စည်းလွှဲပြောင်းခြင်း အက်ဥပဒေပုဒ်မ-၅၄ အရ မှတ်ပုံတင်စာချုပ်ချုပ်ဆိုမှုပြုရမည်ဖြစ်ပါသည်။

ပစ္စည်းအား ရောင်းသူဝယ်သူ အမှန်တကယ်လွှဲပြောင်းရောင်းချခြင်းပြုကြောင်း ဝန်ခံကြလျှင်လဲ ပစ္စည်းလွှဲပြောင်းခြင်းမှာ အတည်မဖြစ်ပါ။ ပစ္စည်းလွှဲပြောင်းခြင်း ဥပဒေ(၃)အရ မရွှေ့မပြောင်းနိုင်သော ပစ္စည်းများလွှဲပြောင်းခြင်းမှာ ပစ္စည်းတည်ရှိရာ အရပ်ဒေသရှိတရားရုံးတွင် မဖြစ်မနေ မှတ်ပုံတင်ထားရှိရန် လိုအပ်ပါသည်။

ပစ္စည်းလွှဲပြောင်းခြင်း ဥပဒေပုဒ်မ-၇ အရ ပဋိဉာဉ်ပြုနိုင်သော အရည်အချင်းရှိသူသည့် ပစ္စည်းလွှဲပြောင်းမှု ပြုရာ၌ ခံစားခွင့်ရှိပြီး ပစ္စည်းအားလုံးကိုဖြစ်စေ၊ အစိတ်အပိုင်းကိုဖြစ်စေ၊ လွှဲပြောင်းလက်ခံနိုင်ရန် တည်ဆဲဥပဒေ၏ ခွင့်ပြုနည်းလမ်းများအတိုင်း ဆောင်ရွက်ပိုင်ခွင့်ရှိပါသည်။

ပစ္စည်းလွှဲပြောင်းခြင်း ဥပဒေပုဒ်မ - ၈ အရ ပစ္စည်းလွှဲပြောင်းခြင်းတစ်ရပ်သည် ဥပဒေနှင့်အညီ လွှဲအပ်ပြီး ပါကမြေဖြစ်လျှင် မြေနှင့်တစ်ဆက်တစပ်တည်း သုံးစွဲပိုင်ခွင့်၊ မြေငှားရမ်းခ၊ မြေနှင့်စွဲကပ်သောအရာများ၊ အာမခံထားရှိခြင်းများ၊ ၎င်းနှင့် သက်ဆိုင်သည့် တရားစွဲဆိုနိုင်သည့် အခွင့်အရေးများ၊ ၎င်းနှင့်သက်ဆိုင်သည့် ဝင်ငွေခံစားခွင့်များ အားလုံးပါဝင်ပါသည်။

ပုဒ်မ-၅၅ (၁)အရ ဆန့်ကျင်ကွဲလွဲပဋိညာည်တစ်ရပ်မရှိလျှင် မရွှေ့မပြောင်းနိုင်သောပစ္စည်းပစ္စည်း လွှဲပြောင်းခြင်းများ၌ ရောင်းသူမှ အောက်ပါအတိုင်း တာဝန်ရှိပါသည်။

ရောင်းချသူသည် ပစ္စည်း၌ ချို့ယွင်းချက်ရှိက ထုတ်ဖော်ပြောကြားရန်၊ ပိုင်ဆိုင်မှုစာရွက်စာတမ်းများ အားလုံးကို ဝယ်ယူသူမှ စစ်ဆေးကြည့်ရှုနိုင်ရန် ထုတ်ဖော်ပြသရန်၊ ဝယ်ယူသူမှ ပစ္စည်းနှင့်စပ်လျဉ်း၍ မေးမြန်းသည့်အခါ အလုံးစုံဖြေဆိုရန်၊ သင့်လျော်သောအချိန်နှင့် နေရာတွင် ပစ္စည်းလွှဲပြောင်းခြင်း စာချုပ်စာတမ်းတစ်ရပ်အား ပြုလုပ်ချုပ်ဆိုပေးရန်၊ ပဋိညာဉ်ချုပ်ဆိုပြီးဖြစ်ပါက ပစ္စည်းလွှဲပြောင်းခြင်းနေ့မတိုင်မီထိ ပစ္စည်းနှင့် ပိုင်ဆိုင်မှုစာချုပ်စာတမ်းများအား ရောင်းချသူမှ ထိန်းသိမ်းစောင့်ရှောက်ပေးရန်၊ ပစ္စည်းအား ဝယ်သူ(သို့) ညွှန်ပြသူအား လက်ရောက်လွှဲပြောင်းပေးအပ်ရန်နှင့် ရောင်းချသည့်နေ့ မတိုင်ခင် ကြွေးမြီများ၊ အတိုးများအား ရောင်းချသူမှ ပေးဆပ်ရန် တာဝန်ရှိပါသည်။

ဝယ်ယူသူသည်လဲ ပုဒ်မ- ၅၅(၅) အရ ရောင်းချသူ အကျိုးခံစားခွင့်အတွက် မိမိသိရှိသော အချက်အလက် ရှိက တိုးပွှားမှုများရှိသည်ကို ထုတ်ဖော်ပြောကြားရန်၊ ရောင်းချခြင်းအား ရောင်းချသူ(သို့) ၎င်းညွှန်ပြသူကို တန်ဖိုးငွေအားလုံးပေးချေရန်၊ ပစ္စည်းအား လွှဲပြောင်းလက်ခံပြီးပါက ရောင်းချသူကြောင့် မဟုတ်သော ပျက်စီးဆုံးရှုံးမှုမှာမှာ ဝယ်ယူသူနှင့်သက်ဆိုင်ပါသည်။ ပစ္စည်းရောင်းစဉ်က ဝယ်ယူသူ တာဝန်ယူရန် သဘောတူ ထားအချက် အလက်များမှာ ဝယ်ယူသူနှင့် သက်ဆိုင်ပါသည်။

ထို့ပြင် ပုဒ်မ- ၅၅ (၆) အရ ဝယ်ယူသူသည် ပစ္စည်းလွှဲပြောင်းပြီးပါက ငှားရမ်းခများနှင့် အကျိုးခံစားခွင့်ပါ ရပိုင်ခွင့်ရှိပါသည်။ ဝယ်ယူသူမှ စရန်ပေးစာချုပ်ချုပ်ဆိုပြီး နောက်ပိုင်း နည်းလမ်းတကျ ငြင်းပယ်လျှင် စရန်ငွေ အား တောင်းခံပိုင်ခွင့် ပဋိညာဉ်အား သီးခြားဆောင်ရွက်ပေးစေလိုမှု၊ ဖျက်သိမ်းခြင်းနှင့် ရပိုင်ခွင့်များလဲရှိကြောင်း ဥပဒေဗဟုသုတအနေဖြင့် ရေးသားဖော်ပြပေးလိုက်ပါသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

iMyanmarHouse.com ၏ ဥပ​ဒေအကြံ​ပေး ပညာရှင်​အဖွဲ့ မှ အထူးရေးသားဖော်ပြသည်။

Credit: iMyanmarHouse.com