အိန္ဒိယသူဌေးကြီး တာတာ ကွယ်လွန်ချိန်တွင် သူ၏ အချစ်ရဆုံးခွေးလေး တီတိုးကို ရူပီး ကုဋေပေါင်းများစွာ အမွေပေးခဲ့

Tata Group ၏ ပဲ့ကိုင်ရှင် ကမ္ဘာ့အထင်ကရ အိန္ဒိယသူဌေးကြီး ရာတန် တာတာ ကွယ်လွန်ချိန်တွင် ညီအကို မောင်နှမများကို အမွေအနည်းငယ်သာ ပေးခဲ့ပြီး သူ၏ အချစ်ရဆုံး ဂျာမန်သိုးထိန်းခွေးကလေး တီတိုးကို ဒေါ်လာ သန်းရာချီ အမွေပေးခဲ့ကြောင်း dailymail သတင်းတစ်ရပ်တွင် ဖော်ပြသည်။

သူဌေးကြီးတာတာ၏ သေတမ်းစာတွင် ရူပီး ကုဋေ ၁၀,၀၀၀ ကို အမွေခွဲဝေပေးခဲ့ရာ၌ ခွေးကလေး တီတိုးကို အများဆုံးပေးခဲ့ပြီး မိမိကွယ်လွန်ပြီးနောက်ပိုင်းတွင် တီတိုးကို အထူးစောင့်ရှောက်ပေးရန် မှာကြားသွားခဲ့သည်။

တာတာသည် Tata Group ကို ကမ္ဘာသိကုမ္ပဏီကြီးဖြစ်လာစေရန် ပြောင်းလဲပေးခဲ့သူဖြစ်ပြီး မွမ်ဘိုင်းမြို့တွင် ယခုနှစ်အတွင်း ကွယ်လွန်ခဲ့ရာ ကွယ်လွန်ချိန်တွင် အသက် ၈၆ နှစ်ရှိပြီ ဖြစ်သည်။

အိန္ဒိယ၏ ထုံးစံအတိုင်းဆိုလျှင် အိမ်ထောင်မရှိ၊ သားသမီးမရှိသူ လုပ်ငန်းရှင်တစ်ဦး ကွယ်လွန်ပါက မွေးချင်းများကို အမွေပေးခဲ့လေ့ရှိသည်။

သို့သော် Tata Group ၏ ဥက္ကဌဟောင်း တာတာကမူ ညီဖြစ်သူ ဂျင်မီတာတာ၊ ညီမဝမ်းကွဲများဖြစ်သော Shireen နှင့် Deanna Jejeebhoy တို့ကို ဖြတ်ကျော်ကာ သူ၏ အချစ်တော် ခွေးကလေး တီတိုးကို မျက်နှာသာ ပေးခဲ့သည်။

တိုင်းမ်မဂ္ဂဇင်းကြီး၏ ဖော်ပြချက်အရ တာတာက သူ၏ သေတမ်းစာတွင် ခွေးကလေး တီတိုး၊ အထွေထွေ လက်ထောက်အကူ Konar Subbiah နှင့် စားတော်ကဲကြီး Rajan Shaw တို့မှာ မိမိ၏ ပိုင်ဆိုင်မှုမှာ များစွာရသင့်ကြောင်း ဖော်ပြထားသည်ဟု ဆိုသည်။

သူ၏ မွေးချင်း ဆွေမျိုးများမှာမူ အမွေ အနည်းငယ်မျှသာ ရခဲ့ကြသည်။

(ရာတန်တာတာကို သူ၏အချစ်ရဆုံး ဂျာမန်သိုးထိန်းခွေးလေး တီတိုးနှင့်အတူ တွေ့ရပုံ)

(တီတိုးကို အထူးစောင့်ရှောက်ပေးရန် မှာကြားသွားခဲ့သည်။ တာတာကွယ်လွန်ချိန်တွင် ဘေး၌ ခွေးလေးတီတိုး ရှိနေခဲ့သည်)

အိန္ဒိယတွင် အိမ်မွေးတိရ စ္ဆာန်များနှင့် ဝန်ထမ်းများကို ဤမျှရက်ရောစွာ အမွေပေးခဲ့ခြင်းမှာ အလွန်ရှားပါးသည်။

များပြားလှသော ဓနစည်းစိမ်တို့ကို ဆွေမျိုးမိသားစုများသာ ဆက်ခံကြလေ့ရှိသည်။

တာတာသည် တိရ စ္ဆာန်လေးများကို ချစ်မြတ်နိုးသူအဖြစ် ဘဝတလျှောက် လူသိများခဲ့သူ ဖြစ်သည်။

Tata Group ၏ ရုံးများတွင် လေလွင့်တိရ စ္ဆာန်လေးများကို တွေ့ပါက မည်သည့်အခါမှ မောင်းမထုတ်ရန် တာတာက တံခါးစောင့်များကို ညွှန်ကြားထားသည်။

တာတာ၏ မိတ်ဆွေရင်းဖြစ်သူ Suhel Seth က ပြောသည်မှာ တာတာက ဘဏ္ဍာထိန်းနှင့် ထမင်းချက်တို့အတွက် အမွေပေးခဲ့သောငွေမှာ အလွန်များပြားလှကြောင်း၊ ထို ၂ ဦးမှာ အသက် ၅၀ ကျော် အရွယ်များဖြစ်ပြီး တာတာမရှိသည့်နောက်ပိုင်း ခွေးလေးတီတိုးကို ကြည့်ရှုစောင့်ရှောက်ပေးနေကြောင်း ပြောသည်။

“တာတာက သူတို့ကို တကယ့်ကို ရက်ရက်ရောရာ ပေးသွားခဲ့တာပါ။ သူတို့တစ်ဘဝလုံး အလုပ်လုပ်စရာ မလိုတော့ပါဘူး” ဟု Seth က ပြောသည်။

(တာတာသည် လေလွင့်ခွေးလေးတစ်ကောင်ကို ဂိုအာဟု အမည်ပေးကာ မွေးထားသည်။)

(တာတာ၏ ဈာပနတွင် ခွေးလေး ဂိုအာကို တွေ့ရပုံ)

(အိန္ဒိယ၏ ဒိတ်ဒိတ်ကြဲ စီးပွားရေးလုပ်ငန်းရှင်ကြီး တာတာ ကွယ်လွန်မှုအပေါ် ကြေကွဲဝမ်းနည်းသူများ ဈာပနအခမ်းအနားသို့ တက်ခဲ့ကြပုံ)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Indian tycoon Ratan Tata leaves majority of $118M inheritance to dog rather than siblings (dailymail) Photo Credit-dailymail