ဧပြီလကုန်တွင် ဖွင့်လှစ်မည်ဟု သိရသော မြ၀တီနယ်စပ်ကုန်သွယ်ရေး လမ်းကြောင်းရှိ ဂျိုင်းမြစ်ကူး ပွန်တွန်းတံတားသစ်

မြ၀တီနယ်စပ်ကုန်သွယ်ရေး လမ်းကြောင်းပေါ်ရှိ အသစ်တည်ဆောက်နေသော ဂျိုင်းမြစ်ကူး ပွန်တွန်းတံတားသစ်အား ဧပြီလကုန်တွင် ဖွင့်လှစ်နိုင်တော့မည့်ဖြစ်ကြောင်း ပွန်တွန်းတံတား တည်ဆောက်ရေးလုပ်ငန်းမှ သိရသည်။

အဆိုပါ ဂျိုင်းမြစ်ကူး ပွန်တွန်းတံတားသစ် တည်ဆောက်ရန်အတွက် ၂၀၁၈ ခုနှစ် ဒီဇင်ဘာ ၁၈ ရက်က ပြုလုပ်ခဲ့သော တင်ဒါရွေးချယ်မှုတွင် ‘ရာသက်ပန်’ ကုမ္ပဏီက တင်ဒါအောင်မြင်ခဲ့ကာ ၂၀၁၉ ဖေဖော်ဝါရီ ၁၁ ရက်မှစ၍ စတင်ဆောင်ရွက်ခဲ့ကြောင်း သိရသည်။

မဟာမဲခေါင်ဒေသခွဲ စီးပွားရေးစင်္ကြံလမ်းမကြီးပေါ်တွင် တည်ရှိနေသော ဂျိုင်း - ကော့ကရိတ် ကြိုးတံတားမှာ ၂၅ တန်ခံနိုင်ဝန်ရှိသော ကြိုးတံတားဖြစ်ခဲ့ပြီး ကာလကြာရှည်စွာ အသုံးပြုခဲ့ခြင်းကြောင့် ကြိုးတံတား၏ ခံနိုင်ဝန်ကျဆင်းလာခဲ့ကာ ယခုအခါ ၁၃ တန်နှင့်အောက် ယာဉ်များသာ ဖြတ်သန်း ခွင့်ပြုပြီး ၁၃ တန်အထက် ယာဉ်များအတွက် သစ်တောက်ငှက်ကုမ္ပဏီက တည်ဆောက်ထားသော ပွန်တွန်းဘောတံတားဟောင်းမှသာ သွားလာခွင့်ပြုခဲ့သည်။

လက်ရှိဘောတံတားကြံ့ခိုင်မှု လျော့ကျလာခြင်း၊ ကုန်သွယ်ပို့ဆောင်ယာဉ် များပြားလာခြင်းတို့ကြောင့် ကုန်စည်စီးဆင်းမှု မြန်ဆန်လွယ်ကူစေရေးအတွက် ‘ရာသက်ပန်’ ကုမ္ပဏီက အသစ်တည်ဆောက်မည့် တံတားကို လက်ရှိ အသုံးပြုနေသော ပွန်တွန်းတံတားနှင့် ပေ ၁၅၀ အကွာတွင် ပြည်နယ်အစိုးရ၏ ခွင့်ပြုချက်ဖြင့် တည်ဆောက်ခဲ့သည်။ဗောတံတားသစ်တည်ဆောက်ပြီးစီး ဖွင့်လှစ်ပါက ကုမ္ပဏီနှစ်ခုအနေဖြင့် ဝန်ဆောင်မှုများကို အပြိုင်စနစ် ကျင့်သုံးလာကြမည်ဖြစ်သည့်အတွက် တံတားအသုံးပြုသူများအတွက် ပိုမိုအဆင်ပြေလာမည်ဖြစ်သည်။

ထို့ပြင် JICA မှ အခိုင်အမာတည်ဆောက်မည့် RC တံတားတစ်စင်းကိုလည်း သုံးနှစ်တာကာလ ၂၀၂၁ ခုနှစ် မတ်အတွင်း ပြီးစီးဖွင့်လှစ်နိုင်ရေးအတွက် ယခုနှစ် ဇန်နဝါရီမှစ၍ စီမံကိန်းလုပ်ငန်းများကို စတင်အကောင်အထည်ဖော်လျက်ရှိပြီး လမ်းတံတားနှင့်မလွတ်သည့် မြေယာများကို ညှိနှိုင်းလျော် ကြေးပေးမှုများကိုလည်း ဆောင်ရွက်လျက်ရှိကြောင်း သိရသည်။

“တန် ၆၀ ခံနိုင်မယ့် ပွန်တွန်းတံတားအသစ်ကို ကျပ်ငွေသိန်းပေါင်း ၂၀၀၀၀ အကုန်ကျခံပြီး လေးလအတွင်း ယာဉ်တွေ ဖြတ်သန်းသွားလာလို့ရအောင် ကျွန်တော်တို့ ဆောင်ရွက်ခဲ့တာဖြစ်ပါတယ်။ ရည်ရွယ်ချက်ကတော့ မိုးကာလရောက်ရင် မြစ်ကရေများလာတာနဲ့အမျှ လက်ရှိတံတားကနေ ကုန်တင် ယာဉ်တွေ ဖြတ်သန်းဖို့ အခက်အခဲဖြစ်တဲ့အခါကျတော့ ကုန်စည်စီးဆင်းမှုတွေ နောက်ကျကုန်မယ်။ ကုန်ဈေးနှုန်းတွေတက်လာမယ်။ တံတားဖြတ်သန်းဖို့ ယာဉ်ကြောပိတ်ဆို့မှုတွေ ဖြစ်လာမယ်။ ပြောမယ်ဆိုရင်တော့ အများကြီးပေါ့” ဟု ရာသက်ပန်ကုမ္ပဏီဥက္ကဋ္ဌ ဦးကျော်မျိုးနိုင်က ပြောကြားသည်။

ယင်းဗောတံတားအတွက် ဗောတွဲ ၂၇ လုံးကို ဧရာဝတီရေတပ်စခန်းဌာနချုပ်ကနေ မှာယူဆောက်လုပ်ပြီး လေးလအတွင်း ကူးသန်းသွားလာနိုင်ရန် တည်ဆောက်ခဲ့ခြင်းဖြစ်ကာ ကျပ်သိန်းပေါင်း၂၀၀၀၀ ကုန်ကျကြောင်း သိရသည်။

Credit: Daily Eleven